Ittra elettronika

Għażiża Maria,

Kif inti? Skużani li ma bgħattlekx mill-ewwel imma bħalissa mħabbta bix-xogħol tal-iskola u bl-istudji, bħas-soltu!

Vera ħadt gost meta fl-aħħar ittre għedtli li skont it-tobbam il-'pneumonia' kważi telqitlek għal kollox! Probabbilment ħa jkollok toqgħod xi ftit iktar jiem l-isptar ħalli tibda tiekol sew terġa'. 

Bħala klassi ħadna lezzjoni sħiħa nagħmlulek xi ħaġa sabiħa kull wieħed (anki Ms. Susan!). Meta nista' nġibhomlok? Kont qed naħseb jekk inġibhomx għada. Kuljum qegħdin nitolbu għalik. Jien għedtilha kemm-il darba li probabbilment inti tkun għajjiena minħabba l-mediċina li qed tieħu, imma xorta waħda tathomli biex intihomlok!Issa ser ikolli nħallik.

Tislijiet,

Stephanie.

Stephanie A. Borg (Form 2.1)

-----

Għażiża kuġina,

Bonġu. Ilna aktar minn xahrejn ma naraw lil xulxin. Ilbieraħ irċivejt l-ittre li bgħattli inti. 

Nibda billi ngħidlek li mmissajtek ħafna. Ilna ma niltaqgħu u t-tnejn li aħna noqogħdu Malta aħseb u ara kieku le! Jien vera ninsab kuntenta għax ix-xahar li għadda xtrajt kelb tar-razza Shih Tzu, kieku taf kemm hu ħelu! Jien lill-kelb xtrajtlu ħafna affarijiet. Insomma, intom kif intom? Hemmhekk kollox sew? Żidtu xi annimal jew? Naħseb annimali ieħor jonqosha z-zija Rosanna! Biżżejjed għandha ħamest itfal, żewġt iklieb u tliet għasafar. Aħna ħa narawkom fil-festi tal-Milied jew sejrin xi mkien ieħor?

Grazzi ħafna tal-ittre li bgħattli. Nispera li narawkom malajr kemm jista' jkun. Jekk tista' erġa' ibgħatli ittra. Sellili għal kulħadd. 

Tislijiet,

Nirvana.

Nirvana Chircop (Form 2.3)

-----

Bonġu Tereża,

Kif int? Naf li għedtli li ma tridx tkellimni imma qed inħossni ħażin ħafna minħabba l-mod li waqafna nitkellmu.

Irrid ngħidlek li jiddispjaċini li fil-prajvit poġġejt ħdejn Nina u mhux ħdejk imma int ma kellekx aptit titkellem miegħi wara u għalhekk qatt ma stajt ngħidlek għaliex poġġejt ħdejn Nina. Poġġejt ħdejha għax ħabibtha, Jenny kienet ma tiflaħx u għalhekk hi kienet waħedha. Ħsibt li kellek lil Zoe imma nsejt li kienet imsiefra. Naf li għamilt ħażin imma inti l-unika ħabiba li nħobb daqs oħti.

Jekk ma taħfirlix verament ħa nibki. Nispera li taħfirli u li tikteb lura jew iċċempilli!

Dejjem tiegħek,

Hanna.

Hanna Felice (Form 2.2)

Poeżija

Mixja bla ħsieb,
Ommi, jien u ż-żewġt iħbieb.
Għasafar ipespsu aħna smajna,
X'natura, kif iċċassajna!

Ir-Rabat wasalna, 
U pastizz kilna.
Jien xrobt kikkra kafè,
U ommi ħadet belgħa te.

Iltqajna ġol-Imdina,
Mal-kuġini u l-parrina.
Irkibna ċeklem il-karozzin,
U sellimna lill-Mostin. 

Imxejna sa San Ġiljan,
U ltqajna ma' raġel jismu Marjan.
Wasalna x-Xemxija,
U għamlet ħalba xita tal-ħamrija!

Żorna l-Melliħin,
u tawna ikel bnin.
Vista għamilna lill-Madonna,
Fis-Santwarju aħna morna.

Il-vapur qbadna,
Lejn Għawdex tlaqna.
Xi ġmiel naturali!
X'baħar kaħlani!

Ħadt gost x'mixja alenija!
U nixtieqkom taħsbu fija.
Illejla norqdu x-Xewkija,
u ntfajt nikteb din il-poeżija. 

Ann Marie Briffa (Form 1.3)

-----

Mixja f'Għawdex aħna morna,

It-tieqa tad-Dwejra, aħna żorna,

Kien żmien is-sajf, kollox sabiħ:

Nieklu l-ħawħ u d-dulliegħ.

Imxejna saċ-Ċittadella,

Induru dawra durella,

Tlajna fit-toroq dojoq,

Rajna ħafna fjuri bojod.

Ħadna ġelat,

F'daqqa waħda beda r-ragħad. 

Bdejna niġru għall-karozza,

Imbagħad bis-saħħa t'Alla,

Ħarġet qawsalla. 

Kien Awwissu,

Rajna għasfur itir fil-għoli,

Xtaqt immissu,

Kien kollu kuluri,

U deher ħafna kburi.

Morna sal-Ġgantija,

Kemm huma sbieħ it-tempji!

U kemm eżempji tal-ħila,

Tan-nies ta' qabilna,

Żgur imxejna triq twila,

Biex wasalna x-Xewkija.

Kemm imxejna u ħadt gost,

ġurnata mill-isbaħ

Żgur nerġa' mmur dak il-post!

Il-gżira tat-tliet għoljiet,

Mimlija bi ġmiel ta' bliet.

Ella Aquilina (Form 1.2) 

-----

Nhar il-Ħadd li għadu kemm għadda,

dawra mort man-nannu Nin,

sa Għawdex ħadna lkoll b'tal-linja,

lili u 'l-kuġini ċkejknin.

Il-vapur ilkoll irkibna,

miċ-Ċirkewwa sal-Imġarr,

u l-ġurnata aħna bdejna,

bil-pastizzi mingħan tal-bar.

Minn hemm morna nżuru d-Dwejra,

fejn ritratti ħadna mhux ftit,

u bil-mixi tlajna ta' Pinu,

għall-quddies u bħala rit.

Iċ-ċkejknin il-ġuħ qabadhom,

u għalhekk morna Marsalforn,

jiena ħadt għaġin mill-aqwa,

u n-nannu ħa patata l-forn.

L-aħħar stadju qabel tlaqna,

il-presepju ħaj jien żort,

u ritratt għall-okkażjoni,

aħna ħadna fuq il-pont.

Din il-mawra ma tantx ninsa,

għax gost ħadna u mhux ftit,

man-nannu Nin kulħadd igawdi,

u kulħadd jagħmel dak li jrid. 

Christa De Giovanni (Form 1.1)

Storja tad-daħk

Meta ntilef in-nannu

X'jagħmillek iż-żmien la tixjieħ! Miskin in-nannu li jaf x'jiġifieri. L-istorja kollha bdiet meta jien kelli biss seba' snin.

Darba waħda, il-Ħadd, jien u l-familja tiegħi konna ddeċidejna li mmorru dawra sa Sant'Anton. Missieri ċempel lill-ġenituri anzjani tiegħu biex iħajjarhom jiġu magħna. It-tnejn li huma ma qalux le u f'ħakka t'għajn rajthom wara l-bieb. Malli kulħadd lesta, qbadna t-triq għal San Anton.

Wara xi nofs siegħa, wasalna u kulħadd niżel mill-karozza. Dħalna ġewwa u jien u ħija kellna seba' mitt sena biex immorru niġru u nduru ġol-labirint. Malli dħalna ġo fih, jien u ħija qgħadna flimkien għax ma ridniex nintilfu. In-nannu ddeċieda li jiġi magħna wkoll, imma billi jien u ħija bdejna niġru 'l quddiem, in-nannu ma bediex ilaħħaq magħna u f'kemm ilni ngħidlek, ma baqax jidher wara dawk il-ħitan għoljin tal-ħaxix aħdar.

F'daqqa waħda bdejna nisimgħu l-għajjat tiegħu hu u jipprova jfittixna, imma jiena u ħija ma konniex nafu x'ħa naqbdu nagħmlu. Wara ftit, smajna lil ommna tipprova tgħidlu minn fejn għandu jgħaddi biex forsi jsibna. Aħna ma ċċaqlaqniex minn fejn konna, biex forsi xi darba, jasal in-nannu u jarana. Fl-isfond, stajt tisma' lin-nanna tgħajjat u tippanikja. Fl-istess ħin, jien u ħija konna ħa ninfaqgħu bid-daħk!

Fl-aħħar tfaċċa n-nannu, b'nifsu maqtugħ u aħmar nar. Wara dik il-battikata kbira, it-tlieta li aħna bdejna mexjin lura lejn l-entratura bl-għajnuna t'ommi. Wara din, in-nannu qatt ma' reġa' daħal magħna ġol-labirint!

Martina Vella (Form 2.1)

-----

Meta ssakkart barra

F'ġurnata bellezza tas-sajf, wara li kont ilni neqred li rrid li nagħmlu t-twieqi 'double glazed,' kienu ġejjin il-'Window Brothers' sabiex iwettqu xewqti għax bħal ma jgħid il-Malti, ejta li tgħajjex fiha, delliha u sewwiha. Fid-disgħa waslu u kaxkru l-apparat tqil kollu li kellhom bżonn. Fil-ħdax bdew it-tieqa tal-bejt u hawn ġratli waħda tinkiteb.

Mario, wieħed mill-ħaddiema, qalli biex noħroġ fuq il-bejt sabiex ngħinu billi ngħidlu kif tidher minn barra, bl-użu tas-sinjali. Hekk kif ħriġt, Mario sakkar il-bieb tal-bejt, niżel isfel u xorob kikkra te sħuna, paċpaċ ftit u għen lill-oħrajn, iżda lili nesieni hemm barra. B'kumbinazzjoni tal-akbar kumbinazzjonijiet, il-ġara ħaslet il-gallarija tagħha u l-ilma kollu li użat waqa' fuqi mill-pajp li jiġi fuq il-bejt tiegħi. Ippruvajt inwerżaq kemm niflaħ iżda fl-aħħar qtajt qalbi! Sirt qisni fellus li kien għadu kemm qasam l-Imsida wara ħalba xita qawwija. Ix-xemx tikwi bdiet taħraqli l-ġilda u ħassejtni qisni ħanżir li qiegħed jinxtewa, issa stajt nifhem eżatt x'ikun qed iħoss dak il-povru annimal!

Fl-aħħar, wara tliet sigħat u nofs fuq il-bejt, waħdi, imxarrba u fix-xemx, ġie lura u xħin dħalt ġewwa ħassejt il-frisk tad-dell ma' ġildti u ħassejtni fis-seba' sema. Xħin rani Marjo jidħak kemm jifħal u xħin rajtu jidħak bija aktar inħraqt, ħassejt id-duħħan ħiereġ minn widnejja u kelli aptit inwaddablu xi ħaġa għal wiċċu iżda bħal ma jgħid il-qawl Malti, bil-kwiet u bil-kalma tirbaħ l-arma u kelma żejda fuq ġieħ issir mitħna tar-riħ.

Qabel ma telqu, skużaw ruħhom ta' dak li ġara u għallinqas tawni skont ta' għaxra fil-mija. Anzi ggwadanjajt xi ħaġa minn dik it-trawma! 

Kaya Camilleri (Form 2.2)

-----

Iċ-ċajta li għamilna lill-għalliema tal-Malti

Ma nafx jekk qattx kellna ħarġa bħal tal-lum. Bħal ma jagħmlu kull sena fi żmien il-Milied, l-għalliema joħduna ċ-ċinema. Jiena u sħabi Martina, Mikela, Gabriella u Kerrie ċempilna lil xulxin biex niftehmu dwar l-ikel li ħa nieħdu magħna.

L-għalliema tal-Malti kienet responsabbli tal-istudenti tat-tieni sena ma' għalliema oħra. Fit-tmienja u nofs ġiet għalina x-xarabank biex naraw il-film tad-disgħa u nofs. Kulħadd kien ferħan ħafna. Fit-triq bdejna niftehmu fuq iċ-ċajta li konna ħa nagħmlu. Kien hemm min ma bediex jaqbel ma' din iċ-ċajta għax qalu li ħa naqalgħuha. Kważi kulħadd beda jaqbel u ftehmna li ċ-ċajta ħa ssir xorta waħda.

Kif wasalna, l-għalliema tal-Malti bdiet tgħoddna biex tara li kulħadd kien qiegħed hemm. Madankollu sabet ħamsa neqsin. Minn dak il-ħin, kull għalliema bdiet tgħodd l-istudenti għal diversi drabi. Kien kollu ta' xejn! Wara, l-għalliema kollha bdew jistaqsu lill-istudenti u anki ġewwa ċ-ċinema imma r-risposta kienet dejjem li ħadd ma kien rahom. Imma fejn kienu marru? L-għalliema bdew jgħidu li forsi baqgħu l-iskola għax insejniehom? Wara ħmistax-il minuta tfaċċaw.

F'idejhom kellhom kartuna li kien hemm miktub il-kelma 'ċajta' fuqha. Dawn bdew jgħajtu, "Ċajta!" Qalulna li kienet tad-daħk imma għall-għalliema ma kinitx. Iċ-ċamata qlajnieha kollha kemm aħna! 

Kelsey Schembri (Form 2.3)

Storja t'Avventura

Darba waħda, tifla ċkejkna jisimha Ella bdiet iżżejjen id-dar għall-Milied ma' ommha Emma u ma' missierha Adam. Waqt li bdiet tiftaħ il-kxaxen, sabet ktieb qadim li probabbli kien tal-bużnanna tagħha Lara. Il-bużnanna kienet toqgħod fl-istess dar. 

Mimlija sa ruħ ommha bil-kurżità, Ella qabdet dan il-ktieb u ħallietu fil-kamra tagħha biex tara x'kien fih. Kif kienet qiegħda tqalleb il-paġni, rat li dan il-ktieb kien ktieb t'avventura sħiħa li darba l-bużnanna Lara kienet esperjenzat ħafna snin ilu.

F'daqqa waħda, filwaqt li Ella kienet qiegħda tħares lejn stampa ta' foresta, rat dawl qawwi ħiereġ mill-ktieb u Ella, mistgħaġba għall-aħħar, ħassitha dieħla fil-ktieb. Għalqet għajnejha għax bdiet tibża'. Kif fetħet għajnejha, ma riditx temmen għax kienet sabet ruħha fl-istess foresta li kien hemm fil-ktieb. 

Kif ħassitha aħjar, Ella bdiet miexja fis-silġ għax kienet ix-xitwa. Fil-bogħod rat kastell fuq għolja u bdiet miexja 'l hemm. Taħt siġra rat prinċipessa li qaltilha li fil-kastell kien hemm saħħara li kienet ser tibdilha f'kelba jekk ma tiżżewwiġx lit-tifel tagħha li kien krudil. Il-prinċipessa li kien jisimha Sabrina, talbitha tgħinha. 

Ella telqitilha lejn il-kastell. Ella sabitu msakkar imma f'daqqa waħda l-kanċell iswed u ppuntat beda jinfetaħ waħdu. Ella daħlet u mxiet tul is-swali tal-kastell imma f'daqqa waħda, dehru għexieren ta' suldati bil-lanza f'idejhom li mxew magħha fuq kull naħa. Għaddew minn ħafna swali twal u mżejnin b'għamara u tapiti. 

Fl-aħħar waslu ġo sala kbira u fuq kien tad-deheb u l-fidda. Kien hemm mara mill-isbaħ, liebsa lbies fin magħmul mill-ħarir. Din kienet is-saħħara. Hija sejħet lil Ella b'isimha u Ella, kważi tirtogħod, resqet bil-mod lejha. X'ġara wara, hu s-suġġett ta' storja oħra...

Emma C. Gatt (Form 1.3)

-----

Marta kien imissha tmur tgħin lin-nanna fit-tindif tad-dar. Kif daħlet mill-bieb ta' barra nannitha għamlitilha kikkra te u newlitilha biċċa biex tnaddaf biha. Wara li xorbot it-te, Marta ddeċidiet li tibda tfarfar il-librerija. 

Wara li kienet qed tfarfar, Marta bdiet tara xi kotba li kienu jidhru antiki. Waqfet ħdejn vetrina enormi li kienet tgħatti l-ħajt. Bdiet tirranġa xi kotba li kienu mgħawġin. 

Marta ndunat li kien hemm ktieb 'il barra aktar mill-oħrajn. Hi mbuttatu 'l ġewwa u l-ixkaffa bdiet tiċċaqlaq. Marta resqet lura bil-biża'. Din l-ixkaffa resqet waħedha u feġġ passaġġ. 

Bdiet timxi ġol-passaġġ u daħlet ġo għar. F'daqqa waħda waqgħet il-kesħa xxoqq il-għadam. Kien hemm dlam ċappa u skiet taqtgħu b'sikkina. Ma kien hemm l-ebda sinjal ta' ħajja. 

Fid-distanza, Marta rat dawl ħiereġ minn vażun il-ġmiel tiegħu. Bil-mod il-mod, Marta resqet aktar viċin tal-vażun. Marta qabditu u ċekċkitu sabiex tipprova tiskopri x'kien hemm fih. F'daqqa waħda ħareġ spirtu minn ġol-vażun u ħa l-forma ta' raġel.

L-ispirtu qal, "Jien nista' naqtagħlek tliet xewqiet kull darba li tiġi tarani." Marta veru ħadet pjaċir meta semgħet dan. Ma damitx ma bdiet issemmilu x'riedet. 

La mmur id-dar nixtieq li nsib xadina fil-kamra tiegħi lesta biex tilgħab miegħi. Malli noħroġ minn hawn nixtieq li n-nanna tatini l-ħelu u nixtieq li fit-triq xi ħadd jagħtini l-flus."

L-ispirtu xejjer idejh u sparixxa. Marta reġgħet lura għal-librerija. Hemmhekk sabet lin-nanna b'ħafna ħelu f'idejha u meta kienet fit-triq mara tatha ħamsin ewro. Malli waslet id-dar, telgħet tiġri għall-kamra tagħha u sabet xadina fuq is-sodda mdawra bil-ġugarelli.

Marta għoġobha wisq ix-xogħol u bdiet tmur iktar ta' spiss biex tfarfar għand in-nanna u kull darba kienet tagħti titwila lill-ġenju ta' ġol-vażun. 

Tereża Zammit (Form 1.1)

-----

Il-Ħadd li għadda filgħodu, jien u l-familja tiegħi morna piknik. Peress li kienet ġurnata sabiħa, il-papà ħadna sal-Ġnejna fejn għandna garaxx. Billi r-riħ kien frisk, il-ftit nies li kien hemm stajt tgħoddhom fuq subgħajk. 

Wara li kilna, jien u oħti tlabna lill-ġenituri biex immorru passiġġata n-naħa tal-blat. Ġara li waqt li konna mixjin, rajna vapur antik tal-qlugħ riesaq fuq ix-xatt. Meta wasal naqra viċin sibna li fuqu kellu ħafna pirati. Dak il-ħin, immaġinajt li kienu ġejjin għall-ġlied. Bil-qatgħa li kelli fuqi, għedt lil oħti biex nistaħbew għax it-tnejn konna mwerwrin. Ma stajniex immorru lura għax konna mxejna biċċa sewwa. Meta l-vapur ġie max-xatt, bdew niżlin minnu ħafna pirati armati bil-pistoli u x-xwabel. Bdew tilgħin 'il fuq inkiss inkiss biex jattakkaw razzett fil-quċċata ta' għolja. F'daqqa waħda, smajna leħen jgħajjat 'cut' bl-Ingliż; kien id-direttur tal-film. Xħin jien u oħti ħriġna mill-moħba, stajna naraw kameras, dwal u grupp ta' nies li kienu qed jgħinu. Ħadna r-ruħ meta ndunajna li kienu qed jiġbu film u ma kinux vera pirati. 

Billi kellna seba' mitt sena biex ngħidu kollox lill-ġenituri, tlaqna minn hemm. Ħaffifna kemm stajna, imma qgħadna attenti minħabba li l-art kienet imħarbta. Tant kienet avventura stamba, li l-ġenituri lanqas riedu jemmnuna għall-ewwel.

Mariah Farrugia (Form 1.2) 

Komponiment dwari

Jien jisimni Carla Falzon iżda sħabi jafuni bħala Ċaksi. Għandi ħdax-il sena u qiegħda fl-ewwel sena tas-sekondarja. Jien l-ewwel wild fil-familja tiegħi u għandi oħti iżgħar minni u noqgħod San Ġwann. 

Jien inqis ruħi bħala tifla responsabbli u nistinka biex nagħmel mill-aħjar fl-iskola. Għandi ħafna ħbieb f'ħajti u nħobb nikkomunika u nsir naf lil nies ġodda kull fejn immur. Nieħu pjaċir meta fil-ħajja niltaqa' ma' sitwazzjonijiet differenti li jgħallmuni affarijiet ġodda kuljum. 

Il-ħolma tiegħi, għal meta nikber, hija li nsir ballerina professjonali. Bħalissa jien nattendi l-lezzjonijiet taż-żfin klassiku ħames darbiet fil-ġimgħa. Nattendi dawn il-lezzjonijiet mal-ħabiba tiegħi tal-qalb, Ella. Ta' spiss ommi tirrabja miegħi għax indum biex ninżel wara l-lezzjoni minħabba li jien u Ella nintilfu nitkellmu. Infatti, jgħidulna d-di u d-do.

Alla biss jaf x'inhu ġej fil-futur iżda jien nemmen li fil-ħajja kemm jista' jkun għandi nkun pożittiva fi ħsibijieti u b'daħka fuq fommi. B'hekk nista' nkun aktar kuntenta. Fuq kollox wara l-maltemp jiġi l-bnazzi!

Carla Falzon (Form 1.3)

-----

Bħal ħafna tfal oħra, il-ġimgħa tiegħi hija bieżla ħafna. Bħal ma jgħidu, filli t-Tnejn u filli l-Ġimgħa! Lanqas inkun naf kif għaddiet il-ġimgħa tiegħi!

Kull filgħodu kif inqum, nipprepara għall-iskola. Il-vann iwassalni lura għand in-nanna, peress li l-mamà u l-papà jkunu għadhom ix-xogħol. Jien inbiddel, niekol u nagħmel ix-xogħol għad-dar illi jagħtuna l-iskola. Meta l-mamà tiġi għalija, immur id-dar u nitma' 'l-fenka tal-indi tiegħi. Jien inqatta' ftit ħin ħdejha, imbagħad immur naqra ftit u nipprattika l-pjanu. 

Peress li jien immur xi attivitajiet wara l-iskola, jien ikolli fejn immur kuljum! Nhar ta' Tnejn, immur għal-lezzjoni tal-pjanu. Nhar ta' Tlieta u nhar ta' Ħamis immur għal-lezzjoni tad-duttrina u kull nhar t'Erbgħa u kull nhar ta' Ġimgħa, immur għal-lezzjoni tal-'ballet.'

Fi tmiem il-ġimgħa, kif inqum, nieħu l-kolazzjon u mbagħad nibda nistudja. Jien nagħmel ftit teorija, naqra, niekol f'nofsinhar u mmur nistrieħ. Nhar ta' Sibt, jiena nnaddaf il-gaġġa tal-fenka tal-indi tiegħi u filgħaxija (jekk it-temp jippremetti) noħroġ mal-familja tiegħi. Il-Ħadd f'nofsinhar, il-familja tiegħi, flimkien mal-kuġini, immorru niltaqgħu għand in-nanna min-naħa tal-mamà jew għand in-nanna tan-naħa ta' missieri. Aħna nieklu hemm u mbagħad mmorru xi dawra fil-kampanja jew passiġġata fejn il-baħar. Filgħaxija nerħulha lejn id-dar ħalli nistrieħu qabel ma terġa' tibda ġimgħa bieżla oħra. 

Jien nispera li nibqa' f'saħħti biex inkun nista' nkompli nagħmel dawn l-affarijiet tant sbieħ u nkun nista' niżviluppa dawn it-talenti li tani Alla. Kif jgħid il-qawl Malti, "dak li jagħmel Alla, ma jħassru ħadd," u allura jien nirringrazzjah għal kull ġurnata sabiħa li jagħtina!

Martina Micallef (Form 1.2)

-----

Jisimni Andrea Riolo. Għandi ħdax-il sena u noqgħod fiċ-ċentru tal-Mosta ftit lil hinn mir-Rotunda. Min jafni, jaf li jiena enerġetika ħafna. Ħafna jgħidu li m'għandix kwiet f'ġismi u l-ħin kollu rrid nagħmel xi ħaġa.

Il-ġimgħa tiegħi dejjem tkun mimlija daqs bajda. Wara l-iskola qatt ma ssibni d-dar. Il-biċċa l-kbira tal-ħin liberu tiegħi nqattgħu nipprattika ż-żfin klassiku. Immur ħames lezzjonijiet fil-ġimgħa. Fil-fatt, il-ġurnata favorita tiegħi hija l-Ħamis għax ikolli żewġ lezzjonijiet taż-żfin u waħda minnhom immur fuq ponot subgħajja, "en pointe" bħall-ballerini professjonali. 

Għalkemm għadna fir-raba' ġimgħa tal-ewwel sena tas-sekondarja, is-sistema diġà togħġobni aktar minn dik tal-primarja għax ħafna aktar organizzata. Waħda mill-affarijiet li jogħġbuni huma l-għaqdiet u s-suġġetti l-ġodda. L-aktar ġurnata li nkun qed nistenna hija l-Ħamis għax ikoli l-lezzjoni tal-fotografija. Kull ġimgħa jkollna tema differenti u b'hekk jintlaqtu l-gosti ta' kulħadd. B'mod speċjali, inkun qed nistenna ż-żewġ lezzjonijiet tal-għawm fil-ġimgħa u għalkemm l-ilma jkun iffriżat, inkun qed nistennieha bil-ħerqa. 

Fi tmiem il-ġimgħa, inħobb inqum tard u nqatta' kemm jista' jkun ħin mal-familja tiegħi. Is-Sibt filgħaxija mmorru l-familja kollha għand iz-zija u noqgħod nilgħab mal-kuġini. Il-Ħadd, immorru piknik fil-kampanja jew inkella mmorru ġurnata ħdejn il-baħar. Jien nippreferi meta morru l-baħar għax magħna nieħdu l-kajjikk u jien u missieri nagħmlu t-tlielaq fuq il-baħar. 

Bla dubju, l-aktar ħaġa li togħġobni fid-dinja hija ż-żfin. Il-ħolma tiegħi hi li mmur nistudja ż-żfin f'Londra ma' kumpanija professjonali u nsir "Prima Ballerina." Mill-banda l-oħra l-aktar affarijiet li nobgħod nagħmel huma li naħsel u nnaddaf, u aħjar ma nafx xi tqabbadni milli tqabbadni nnaddaf, speċjalment il-kamra tal-banju!

Andrea Riolo (Form 1.1)

Ottubru, ix-xahar iddedikat għal Dun Karm

Attività li saret waqt ix-xahar t'Ottubru, ix-xahar iddedikat lil Dun Karm, mill-istudenti tal-ewwel u t-tieni sena fis-sekondarja. 

Serqa Kbira

Illum il-Ħadd filgħodu, jien u l-familja tiegħi ddeċidejna li se nieħdu liz-zija ta' missieri li ġiet mill-Ingilterra ġurnata Għawdex. Qed nieħdu tazza te sħuna u ftit ħobż mixwi biex issa nilbsu għax sar ħafna ħin.

Diġà għaddiet siegħa u għadna ma wasalniex iċ-Ċirkewwa għax it-traffiku miexi bil-mod il-mod qisu fekruna. Fl-aħħar wasalna u se nirkbu l-vapur biex immorru fil-gżira sabiħa t'Għawdex. Deħlin ir-Rabat fejn hawn suq enormi b'ħafna ħwejjeġ, ikel u oġġetti differenti ta' kull daqs u għamla. Ommi qed tixtri suvenir għaz-zija ta' missieri biex jibqa' tifkira. 

Ħdejn is-suq, hawn bank tal-flus u qegħdin naraw żewġt irġiel libsin iswed tuta. Qed nissuspettaw li huma ħallelin. Il-familja kollha beżagħna u wiċċna abjad karti bil-biża'. Jidher li ġej vann b'veloċità qawwija u minnu ħerġin tliet irġiel b'pistola f'idhom u deħlin dritt ġol-bank. Qed jisparaw bla ħniena u hemm ukoll xi nies feruti. Ommi qed iċċempel għall-ambulanza għax il-ftira sħuna tajba. Indunajna li aħna ma konniex żbaljati għax qed narawhom jisirqu l-flus u jpoġġuhom ġol-ixkejjer f'minuta.

Dal-mument missieri qed iċempel lill-pulizija biex jiġu malajr kemm jista' jkun qabel ma jaħarbu mill-post. Lanqas għaddew ħames minuti li waslu l-pulizija fil-post. Il-ħallelin qed jippruvaw jaħarbu imma mhux se jirnexxilhom għax il-pulizija qed jibblokkaw id-dawra tat-triq kollha. Il-pulizija qabduhom u mmanettjawhom u ser joħduhom l-għassa tal-pulizija. 

Ninsab ċerta li l-pulizija se tagħmel xogħolha sew u l-ħallelin se jieħdu dak li ħaqqhom. Jalla jispiċċaw il-ħabs biex jitgħallmu jekk iridu xi ħaġa jaħdmu għaliha u mhux jagħmlu ħerba u jisirqu. Din hija l-akbar serqa li qatt rajt! 

Sharona Zammit (Form 2.2)

-----

     Bank renomat ħafna b'ħaddiema responsabbli u b'servizz mill-aqwa huwa dak tal-'Bank of Valletta.' Wieħed dejjem jieħu gost jinqeda mill-bank tal-BOV f'Birkirkara.

     Anna qed taqdi l-aħħar klijent tal-ġurnata waqt li qalbha qed tħabbat sitta sitta. Jirnexxilha ġġib ruħha bħas-soltu mal-kollegi u l-klijenti tagħha. Il-ħin kien qed isir ġmielu. Stenniet l-arloġġ idoqq is-sitta biex tibgħat il-messaġġ lil sħabha li fl-istess waqt kienu qed jippreparaw biex jagħmmlu l-ikbar serqa li qatt saret. Anna toħroġ mill-bank bħas-soltu u terħilha lejn id-dar b'tal-linja. Ħadd ma kien raha titfi s-sirena, kienet ċerta minn dan. Omm u bint jidħku bejniethom, raġel xiħ jaqra l-gazzetta u xufier isaffar mad-diska ferriħija li qed tinstema' fuq ir-radju, kienu fuq il-bank ta' quddiemha. Ħadd ma jaf x'se jseħħ minn hawn u ftit sigħat oħra. Anna biss taf. Anna biss ħa ssir sinjura kbira, flimkien ma' sħabha, f'qasir żmien. 

     Jitkaxkru għal erba' sigħat sħaħ biex jgħaddu mill-passaġġ ta' taħt l-art li kienu ilhom iħaffru għal dawn l-aħħar sentejn. It-tliet ħallelin ibatu mhux ftit sa ma jaslu l-bank, imma għalkemm huma għajjenin, jinsabu wkoll eċitati, nervużi u mbeżża'. L-ewwel jisirqu d-djamanti u d-deheb kollu li jiġi f'idejhom, imbagħad jgħaddu biex jisirqu elufijiet ta' ewro li qegħdin hemm jistennewhom. Jirnexxilhom jerġgħu jmorru lura bla inkwiet u jċemplu lil Anna. B'idejhom jirtogħdu biex jgħidulha li l-pjan kien irnexxa.

     Kull stazzjon tat-televixin ixandar l-aħbar xokkanti li nsteraq il-bank tal-BOV f'Birkirkara. Hemm min hu impressjonat, hemm min hu ddiżgustat u hemm min hu inkwetat. Anna u sħabha qegħdin fil-ġenna tal-art, fuq iżola 'l-bogħod mill-bank tal-BOV, jirrilassaw, jixorbu u jieklu bla rażan, bħal ma jafu jagħmlu s-sinjuri!

Emma Camilleri (Form 2.3)

-----

     Jumejn ilu, wasalna fi Sqallija għal vaganza. Tlajna maz-ziju u maz-zija għax tawna din il-vaganza bħala rigal għal għeluq snini.

     Il-lukanda kienet spazjuża ħafna u arjuża wkoll. Morna nżuru l-postijiet ta' kultura, bajjiet u ħafna ġonna. Filgħaxija morna nieklu barra mil-lukanda. Illum, fit-tmienja ta' filgħodu niżlin nieklu ġor-ristorant tal-lukanda għax qed inħossuna għajjenin ħafna. Iz-ziju ddeċieda li jniżżel il-"laptop" tiegħu miegħu biex jara l-logħba tal-Juventus li tibda fid-disgħa. Għadha ma bdietx u z-ziju jsib l-okkażjoni li jidħol jiċċekkja l-kamera tas-"CCTV" tad-dar tiegħu. 

     Fid-daqqa u l-ħin, nisimgħu l-mowbajl taz-ziju u dak taz-zija jdoqqu flimkien. Iz-ziju u z-zija jħarsu lejn xulxin u lejn il-mowbajls u jaraw in-numru tad-dar tagħhom! Iz-ziju Alan jerġa' jmur fuq il-"laptop" u jibda jiċċekkja is-"CCTV" ta' kull kamra. Kif jasal fil-kamra tal-pranzu jilmaħ ħalliel ineħħi pittura u jsib sejf li jkun qed jipprova jiftħu. Jerġa' jmur fil-kamra tas-sodda u jara ħalliel ieħor igerfex fil-kxaxen kollha sakemm isib il-ġojjelli taz-zija Audrey u jitfagħhom ġo basket. 

     Fil-pront missieri ċempel 'il-pulizija ta' Malta u b'xorti tajba qed jinfurmawh li karozza tal-pulizija diġà tinsab fi triqithom lejn id-dar taz-zijiet. Bis-"CCTV" li hemm barra, qed jaraw iż-żewġ ħallelin ħerġin bil-għaġla minn ġod-dar taz-zijiet. F'ħakka t'għajn jiġu l-pulizija u l-ħallelin isibu ruħhom wiċċ imb'wiċċ ma' erba' pulizija mingħajr ebda ċans li jaħarbu.

     Fil-pront nindunaw li qed iċemplulna l-pulizija biex jinfurmawna li kollox jinsab taħt kontroll u li l-affarijiet misruqin ser ikunu d-'Depot.' Sejrin lura fil-kamra biex nippakkjaw l-affarijiet u niġu lura Malta. M'hemmx x'tagħmel, vaganza se tintemm ħesrem, imma rasna mistrieħa li kollox spiċċa b'wiċċ il-ġid. 

Giulia Farrugia (Form 2.1)

Poeżija: Natura

Natura, natura,
Natura ma' kullimkien,
Kull fejn tara, kull fejn tħares,
Natura bħal ta' Malta,
Qatt mhu ħa tara mkien.

Siġar, fjuri, ħaxix,
Tara ġo kull ġnien,
U x'tista' tgħid ħlief il-frażi,
"Xi ġmiel."

Jgħixu, jieklu, jixorbu,
Kollox bħalna, 
U nirringrazzjaw lil Alla,
ta' din in-natura li hi tagħna.

Kuluri ma' kullimkien,
Papoċċa, lelluxa, warda,
Qisek qed tgħix ġo xi dinja tal-fantasija,
U b'hekk għandna nieħdu ħsiebhom.

Siġar qosra, siġar ippuntati, 
Siġar twal, siġar nani, 
Mal-ġmiel tagħhom madwar id-dinja, 
Qas biss nidhru aħna l-umani. 

Martina Cortis (Form 2.2) 

Frażijiet li wieħed jista’ juża biex iżewwaq il-kitba tiegħu