Poeżija - Mixja

Hekk kif toħroġ ġo darek,
tara n-nies jimxu madwarek. 
Min fit-triq min mal-bankina,
min jiġri qisu xadina.

Kulħadd jimxi bla paċenzja. 
Jekk iridu jistennew, 
il-karozzi jridu jieqfu,
lil kulħadd issa ġennew.

Ejja mexxi ħalli naslu, 
xemx u xita anke riħ. 
Illum nimxu f'temp imħawwad, 
għada nimxu f'temp sabiħ. 

Fejn irridu sew wasalna, 
imbażwrin u għajjenin.
Għandna bżonn nixorbu l-ilma, 
għax bil-għatx aħna mejtin. 

Marta Casha (Form 1.1)

Ittre

Lil: sara.abela@gmail.com
Mingħand: anthea.wright@gmail.com
Suġġett: L-isptar

Għażiża Sara,

Kif int? Naf li bħalissa mhuwiex l-aħjar żmien għalik, minħabba li qiegħda l-isptar għall-operazzjoni ta' sieqek. Jien għalhekk qed niktiblek din l-ittra elettronika forsi nferrħek xi ftit. 

Allura Sara, x'qegħdin jagħmlulek hemm? Qed jittrattawk sew? Jekk le, għidli ta' u niġi jien stess! Kif inhu l-ikel? Tajjeb jew le? Meta kienet marret ommi qaltli li lanqas tazza misħun ma jafu jagħmlu!

Insomma, nispera li ġegħeltek tidħak ftit u jekk ikollok bżonn xi ħaġa tiddejjaqx tgħidli. Meta nista' niġi narak? Nistenna mingħandek. 

Il-ħabiba tiegħek, 

Anthea. 

Anthea Wright (Form 2.3)

-----

Lil: rebecca.c@gmail.com

Mingħand: rixa.mifsud@gmail.com

Suġġett: Xogħol għad-dar

Għażiża Rebecca,

L-ewwel ħaġa, kif inti? Nispera li tinsab tajba. Mhux soltu li m'intix qed tkun fil-klassi u ngħidlek il-verità hemm wisq silenzju mingħajrek. F'din l-ittre ħa ngħidlek x'għamilna l-iskola.

Insomma, ma tantx hemm xi ngħid għax m'għamilna xejn speċjali. Fil-matematika kellna ħafna lezzjonijiet ħielsa u fil-Franċiż l-għalliem ġabar it-testijiet tagħna u jrid tiegħek malajr kemm jista' jkun. Kif taf, fil-lezzjonijiet l-oħra kellna xi testijiet imma għallinqas kienu ħfief.

Nispera li tiġi lura magħna l-iskola. Nispera li tfieq malajr. Sellili għall-familja tiegħek.

Il-ħabiba tiegħek,

Rachel

Rachel Mifsud (Form 2.2) 

Storja Umoristika

Meta morna Ħajk u Seħibti ġiet bit-Takkuna

Għodwa waħda kien it-Tnejn. Jennifer, waħda mill-ħbieb tal-qalb tiegħi ċemplitli biex is-Sibt ta' wara fil-ħamsa u kwart immorru ħajk. Jiena mill-ewwel għedt iva iżda għedtilha wkoll biex nistiednu lil Paula tiġi magħna.

Paula hija tifla ħelwa immens iżda ħa ngħidlek, xi kultant teqred ukoll. L-aktar ħaġa li tħobb hija l-moda. It-tlieta li aħna konna eċitati! Fl-aħħar is-Sibt wasal u l-ħamsa u kwart daqqu. Paula ovvjament damet sa tmiem id-dinja biex tasal! Meta fl-aħħar waslet kien laħaq kiber il-ħaxix kollu ta' madwarna. Malajr indunajna għalfejn damet għax ġiet b'takkuna twila daqs lasta ta' xkupa, xagħarha u l-irtokk kienu bħal meta tkun qisha sejra xi tieġ ta' xi ħadd demmu blu u ħafna aktar dandin. 

Lanqas ilħaqna mxejna passejn li ma sabitx ħofra, waqgħet u lwiet saqajha. Tgħidx kemm karbet bl-uġigħ u gergret. 'Addio' l-maskara li tefgħet fuq għajnejha għax kollu fuq ħaddejha spiċċa tant kemm għamlet għaġeb u bkiet. Kien qisu miet xi ħadd! Kienu għaddew ħames minuti biss u kont diġà ddejjaqt bix-xenati li għamlet. F'ħin minnhom għaddiet waħda mara minn ħdejna u jiena stħajt minflok Paula. Kulħadd beda jidħak b'dak iż-żarbun redikolu li kienet liebsa Paula. 

Insomma, fl-aħħar morna d-dar u naħseb li jiena u anki Jennifer naqblu li qatt m'aħna ser immorru ħajk ma' Paula. Ninsabu ċerti li żgur terġa' tagħmel xi waħda minn tagħha! 

Lara Fenech (Form 2.3) 

------

Meta Ntilef in-Nannu

Kien is-Sibt filgħodu. In-nannu Charlie kien sejjer il-Buskett bil-mixi. Waqt li kien miexi bil-kwiet ma ndunax li kien ħa triq b'oħra u spiċċa Ħad-Dingli. Hu baqa' miexi sakemm induna li xi ħaġa kienet ħażina. Din mhix it-triq li s-soltu jieħu, beda jgħid bejnu u bejn ruħu. Ħares madwaru u nduna li kien f'post differenti milli ħaseb. 

Issa n-nannu Charlie beda jinkwieta għax lanqas kien jaf fejn kien. Forsi kien għadu r-Rabat? Jew forsi sab ruħu xi mkien in-naħa l-oħra tad-dinja? Kien intilef waħda u sewwa u ma kienx jaf x'ser jaqbad jagħmel. Issa veru li ż-żmien isajjar il-bajtar imma dan il-qawl ma kienx jgħodd għan-nannu Charlie. 

Kompla miexi u sab ruħu għand tal-ħobż, daħal u staqsa 'l-furnar minn fejn kellu jgħaddi biex imur il-Buskett. Hi qaltlu biex meta joħroġ imur fuq ix-xellug imma meta n-nannu ħareġ mar fuq il-lemin. Spiċċa mar minn quddiem il-knisja u spiċċa ħdejn il-grawn tal-futbol. In-nannu issa qata' qalbu u ċempel lil ibnu biex jiġi għalih biex iwasslu l-Buskett. In-nannu ddeskriva fejn kien u ibnu qallu li kien ġej. 

Iben in-nannu ġie bil-karozza ħdejn il-grawnd tal-futbol. In-nannu daħal ġol-karozza u marru l-Buskett. In-nannu irringrazzjah u wara li telaq ibnu mar ġol-Buskett u qgħad hemmhekk għall-kwiet. 

Demetria Bugeja (Form 2.2)

Vjaġġ għal Mars

Mela darba kien hemm xjentist jismu Marjo li kellu xewqa li jivvjaġġa ġol-ispazju, imma sfortunatament, dix-xewqa qatt ma setgħet isseħħ għax Marjo kien jiżen 'il fuq minn mija u għoxrin kilo!

Iva, qrajt sew. Kien oħxon ħafna! U taf għaliex? Marjo jiekol sitt ċikkulati 'Mars' kuljum! (Kemm iħobb dak il-karamel jinħall ġo ħalqu!) Kemm-il darba pprova jagħmel dieta imma qatt ma rnexxietlu. Darba fost l-oħrajn, naħseb li kiser ir-rekord tad-dinja u kiel tużżana ċikkulati 'Mars' iżda l-għada ġrat xi ħaġa inkredibbli.

Meta qam filgħodu, ħass ġismu jirtab aktar u aktar matul il-ħin, sakemm imbagħad ħares lejn il-mera u ħa l-akbar xokk ta' ħajtu u ħassu ħażin.

Sab ruħu f'ambjent differenti. Lemaħ qishom fosos fl-atmosfera, seba' blalen ġganteski. Wara, irrealizza li l-fosos kienu stilel u l-blalen kienu pjaneti. Kien liebes ilbies abjad u tqil ħafna, u f'rasu kien liebes elmu. Fejn kien ma setax jimxi imma jifflowtja biss seta', u kien ġo dinja differenti ħafna mid-dinja tagħna. Kien ġod-dinja tal-ispazju fejn tant xtaq imur hu. Ma damx wisq ma qabdu l-ġuħ, imma hemm ikel ma kienx hemm u kien diġà jaqbad jirrabja, waqa' u ħabat rasu ma' sieq is-sodda.

Malajr intebaħ li l-vjaġġ li kien għamel sal-pjanetà Mars ma kien xejn għajr ħolma sabiħa. 

Michaela Zammit (Form 1.1)

Jien

Jien jisimni Courtney Magri u għandi ħdax-il sena. Noqgħod il-Ħamrun ħdejn il-Liċeo. Għandi xagħri u għajnejja kannella u għandi ġilda bajdanija. 

Wara l-iskola mmur nagħmel ix-xogħol tad-dar u nistudja. Jekk ikolli xi ħin liberu noqgħod nilgħab fuq il-mowbajl. Ġieli jkolli xi attività bħall-'ballet' u l-mużew. Fi tmiem il-ġimgħa nlesti xi xogħol tad-dar li forsi ma nlaħħaqx nagħmel matul il-ġimgħa. Inħobb nilgħab xi logħba fuq il-kompjuter u filgħaxija noħroġ mal-familja. 

Jien inħobb niżfen u nagħmel il-ġinnastika fil-ħin liberu tiegħi. Inħobb inpinġi u naqra wkoll. Il-kotba favoriti tiegħi huma "Pietru Pitravu" u "Ġrajjiet in-Nannu Ċens." Jien ma nħobbx l-insetti u u 'l-annimali perikolużi. Għandi żewġt iklieb jisimhom Marley u Maya u qishom id-di u d-do. Dawn ma joqogħdux fid-dar tagħna iżda fid-dar tan-nanna. Jiena avventuruża u nħobb immur fuq rikbiet tal-logħob tal-biża'. 

Darba kont qed ninħasel u rajt brimba mal-ħajt u ppanikjajt għax ma kontx naf jekk hijiex velenuża jew le, u ħriġt niġri mid-doxxa. Esperjenza oħra kienet meta mort il-baħar u rajt serp kbir. Ġratli l-istess ħaġa għax ma kontx naf jekk huwiex velenuż u ġrejt kemm stajt. Minn dakinhar 'l hawn bdejt nibża' mill-annimali velenużi però nħobb 'l-annimali domestiċi kollha. 

La nikber nixtieq insir għalliema jew żeffiena. Nixtieq insir għalliema għax inħobb ngħallem lit-tfal u nixtieq insir żeffiena għax dak hu d-delizzju tiegħi.

Courtney Magri (Form 1.1)

Serqa Kbira

Għadhom is-sitta u nofs ta' filgħaxija imma diġà dlam ċappa. Illum m'għandix għażla, se jkolli noħroġ f'dan il-bard biex immur nixtri l-imberkin pitazzi li għandi bżonn għal għada, għall-iskola. Illejla l-pjazza tar-raħal tidher totalment differenti, fejn dejjem ikun hawn pandimonju sħiħ, illum ma tarax ruħ barra f'dil-kesħa. 

Wasalt viċin ħanut tad-deheb u bħalissa qed nilmaħ karozza tieqaf quddiem dan il-ħanut. Żewġt irġiel imlibbsin maskri suwed faħma u ħwejjeġ skuri ħerġin mill-karozza. F'idhom għandhom pistola u resqin lejn il-ħanut tad-deheb. Qalbi qed tħabbat sitta sitta kif qed nara l-ħallelin fil-ħanut. 

Wieħed mill-ħallelin qed jipponta pistola lejn sid il-ħanut waqt li qiegħed jgħeddu, il-ħalliel l-ieħor qed jitfa' d-deheb u l-ġojjelli kollha li qed jara quddiemu ġo xkora kbira. Sid il-ħanut għandu ħass ħażin kbir fuqu. Se nċempel lill-pulizija biex nirraporta dan kollu li qed iseħħ quddiem għajnejja. Bħalissa kull minuta tgħodd... iva! Qiegħda nisma' s-sireni tal-pulizija! Kollox qed jiġri f'ħakka t'għajn! Il-pulizija deħlin armati sa snienhom fil-ħanut biex iwaqqfu s-serqa. Mit-tieqa qed nara lill-ħallelin jiġu mmanettjati u b'geddumhom sal-art ħerġin b'rashom baxxuta bil-mistħija. Is-serqa ma rnexxietx u issa ħaqqhom ipattu qares għal din. 

Jien sejra d-dar b'idi f'idi. Il-pitazzi ma xtrajthomx imma nħossni sodisfatta li s-serqa ma rnexxietx bis-saħħa tiegħi u li kollox spiċċa b'wiċċ il-ġid. 

Martina Buttigieg (Form 2.2)

-----

Illum is-Sibt, ġurnata speċjali għalija għax ser nagħmel il-Griżma fil-Katidral tal-Imdina. Issa kulħadd lest mill-preparamenti allura ħerġin avolja għadu kmieni ħafna. Qed noqorbu lejn il-Katidral. Kuntenta imma fl-istess ħin imbeżża' għax irrid naqra l-Ewwel Qari u nippreżenta r-rigal lill-Arċisqof filwaqt li kulħadd ikun qed iħares lejja!

Qed nara wiċċ ommi jinbidel u issa fhimt għalfejn. Jien, ommi, missieri u oħti qed narawhom. Hemm karozza sewda pparkjata u żewġt irġiel irqaq u t-tnejn libsin barnuża sewda, deħlin fiha. Kellhom kalċi, ostji u deheb f'idejhom. Oħti qed tieħu n-numru tal-karozza. Telqu u dieħla fil-Katidral u nsib lill-Arċipriet mixħut mal-art mitluf minn sensieh. Missieri dieħel ukoll u qed iċempel lill-pulizija u għall-ambulanza. Qed nisimgħu is-sireni fil-qrib u issa waslu. X'ġenn hawn!

Qed nara lil sħabi ġejjin, dawk ma kellhomx jagħmlu l-Griżma miegħi għax għadhom ma jafux bil-biċċa tal-ħallelin. Ġejjin xi ġurnalisti jagħmlu xi mistoqsijiet ukoll. Issa għaddew sagħtejn ta' mistoqsijiet u ġenn fil-pjazza tal-Imdina u ninsabu fi triqitna lejn id-dar. Hawn ħafna traffiku, speċjalment is-Saqqajja u fi Triq il-Buskett. Naħseb il-kelma ġriet ferm iktar malajr milli ħsibt għax naħseb li kulħadd l-Imdina sejjer. 

Issa wasalna d-dar wara li domna ħafna mwaħħlin fit-traffiku. Il-kurżità tiegħi hija min kienu l-ħallelin u jekk hemmx xi nies oħra involuti. Kulħadd għajjien u kollha kemm aħna ntfajna fuq is-sufan u qed nixegħlu t-televixin biex nara l-aħbarijiet. Ġabu ritratt tagħna u qalu li sabu lil min seraq u weġġa' lill-Arċipriet, u hekk kissru ċirku ta' kriminali ieħor bis-saħħa tagħna! Aħna lkoll qed nagħmlu festin!

Julia Bezzina (Form 2.3)

Kitba Argumentattiva

L-internet ħela ta' ħin?

L-internet mhux ħela ta' ħin fl-opinjoni tiegħi. L-internet huwa importanti ħafna f'ħajjitna. Għandu ħafna vantaġġi u kif ukoll xi ftit żvantaġġi, imma trid tużah sew. 

Bis-saħħa tal-internet, jien insibha interessanti meta nfittex xi riċerka għall-iskola. Faċli nikteb fuq xiex qed infittex u mbagħad naqra l-informazzjoni. Anki xi vidjow interessanti nieħu gost nara, speċjalment vidjows tad-daħk.

Meta jkolli xi xogħol tal-iskola li rrid nagħmel ma' xi tfal oħra, insib l-internet ta' użu tajjeb meta nibagħtu xi ittri elettroniċi lil xulxin biex niftehmu fuq x'ħa nagħmlu. Xi ġranet oħra noqgħod nibgħat lil sħabi fuq x'inkun qed nagħmel jew xi ħaġa oħra.

Kemm nieħu gost nibgħat liz-zija li tgħix l-Awstralja! Hi toqgħod tibgħatli xi ritratti tal-Awstralja u fuq kif inhi u x'qed tagħmel. Ġieli nagħmlu xi 'video call' flimkien u tiġi n-nanna ħdejja. Iz-zija ma tiħux gost bl-internet. Hi tgħid li llum il-ġurnata inqattgħu wisq ħin fuqu u li nkunu qed naħlu l-ħin. Jiena ma naqbilx ma' ziti. L-internet mhux ħela ta' ħin sakemm ma tqattax wisq ħin fuqu. 

Meta tkun fuq l-internet tista' tagħmel ħafna affarijiet. Ma tridx tqatta' ħafna ħin fuqu iżda m'hemm xejn ħażin billi tuża xi naqra internet u tużah bħala mezz ta' komunikazzjoni jew tużah għal xi riċerka.

Martina Sciclina (Form 2.2)

-----

It-televixin, ġid jew ħsara?

It-televixin ilu jeżisti madwar sittin sena, illum tista' tgħid li kważi kulħadd għandu wieħed. It-teknoloġija avvanzat u minn televixin żgħir, li kważi ma stajt tara xejn minnu, illum għandna televixin li bil-kontra, kważi jieħu ħajt sħiħ.

Mit-televixin, wieħed jista' jitgħallem affarijiet importanti, ngħidu aħna li ġeneralment ma titgħallimhomx l-iskola, bħal x'qed jiġri f'pajjiżi oħra. Nistgħu wkoll nitgħallmu fuq l-affarijiet li qegħdin jinbiegħu jew li qegħdin fuq offertà. Ikun hemm ukoll reklami ta' fejn ikun sejjer xi ħadd famuż. 

Min-naħa l-oħra, it-televixin jista' jieħu post l-istudju u tkun għajjien għall-iskola għax ikun ilek ħin twil tara t-televixin. Minflok tqatta' l-ħin mal-familja jew mal-ħbieb, tista' tqattgħu quddiem it-televixin minflok. 

It-televixin għandu l-effetti pożittivi wkoll bħal meta ma jkollok xejn x'tagħmel id-dar. Jekk tkun waħdek id-dar jew ma' xi ħabiba, l-iktar filgħaxija. Tajjeb għax tkun tista' tisma' lil xi ħadd jew xi ħaġa. 

Min-naħa l-oħra, it-televixin, jekk tara wisq minnu, issir skjav tiegħu. Jekk issir skjav, ħafna affarijiet jistgħu jiġru bħal li ma tmurx l-iskola u ma tagħmilx ix-xogħol tad-dar. Jista' jkun li tibda tinjora lill-ħbieb u jista' jkun li titlifhom. 

It-televixin għandu aspetti pożittivi u negattivi. Jien naħseb li t-televixin jgħin ħafna affarijiet iżda jibqa' l-fatt li jista' jintuża b'mod ħażin. Fl-aħħar mill-aħħar jiena naħseb li dejjem jista' jkun kemm it-tajjeb u kif ukoll il-ħażin tiegħu.

Gaby Attard (Form 2.3)

-----

L-iskola, filgħodu jew filgħaxija?

Jiena personalment l-iskola ma tantx togħġobni però żgur nippreferi li mmur filgħodu u mhux filgħaxija bħal ma jagħmlu f'xi pajjiżi oħra. Ħafna jgħidu li jekk l-iskola tkun filgħaxija, ikollok iktar ċans biex torqod, eżempju jekk tqum fis-sitta u nofs minħabba l-iskola filgħodu, tqum fid-disgħa għaliex ikollok l-iskola filgħaxija. 

Meta tmur l-iskola filgħodu vera li dejjem u kuljum trid tqum kmieni minħabba li jkollok tmur l-iskola, però mbagħad tkun qomt sewwa jkollok ħafna enerġija. Hemm ħaġa oħra, li jekk l-iskola tkun fil-ħin ta' filgħodu tkun tista' terġa' tmur lura d-dar kmieni u tkun tista' tagħmel ix-xogħol għad-dar tal-iskola, tistudja u tkun tista' tmur xi attività li jkollok. In-norma hija li l-iskola jkollha sitt sigħat, mela jekk l-iskola tibda fit-tmiena u kwart, tispiċċa fis-sagħtejn u kwart, filwaqt li jekk l-iskola ta' filgħaxija tibda fl-erbgħa, tispiċċa fl-għaxra u meta tasal, torqod mill-ewwel.

Jiena ma naqbilx mal-iskola ta' filgħaxija, dan għaliex trid xorta tqum filgħodu biex tagħmel ix-xogħol għad-dar tal-iskola u trid tistudja. Ħin għall-attivitajiet tiegħek ma jkollokx ċans tagħmel. L-unika ħaġa li naqbel magħha perfettament hija li ma jkollokx tqum kmieni bl-irbit għall-iskola.

F'dan l-argument hemm ħafna li jaqblu miegħi, però hemm ukoll dawk li jkunu jridu l-iskola filgħaxija. Fl-aħħar mill-aħħar nibqa' ngħid li l-iskola nkun irridha filgħodu u mhux filgħaxija. 

Kirsten Pace (Form 2.1) 

Rapport

Ir-Rabat, It-Tlieta l-25 t'April, 2017

Denfil jinsab fil-bajja ta' Marsalforn

Illum kmieni filgħodu nstab denfil żgħir ftit 'il barra mill-bajja popolari ta' Marsalforn. Rawh l-ewwel koppja miexja mal-baħar u lemħuh jgħum f'wiċċ l-ilma bħal qisu mitluf. 

Madwar l-għaxra ta' filgħodu waslu xi bugħaddasa u xjentisti. Dawn qalu li d-denfil jidher żgħir wisq biex ikun imbiegħed minn ommu u jaħsbu li spiċċa hemmhekk minħabba l-maltempata tal-bieraħ. Il-bajja ġiet magħluqa sakemm ix-xjentisti għamlu l-investigazzjoni tagħhom. 

Fl-aħħar, ikkonkludew li l-omm tad-denfil għandha tiġi tfittex lil binha. Nisperaw li kollox jispiċċa b'wiċċ il-ġid. 

-----

Ħaż-Żebbuġ, It-3 ta' Mejju, 2017

Aħbar Ħażina

Dalgħodu kien hemm diżgrazzja fatali li ħalliet lil tnejn mejtin. Il-pulizija għadhom qegħdin jinvestigaw il-każ. 

It-traġedja saret f'kamra tan-nar f'Wied il-Għajn, fis-sebgħa ta' filgħodu. Iż-żewġ ġuvintur li kienu ġol-kamra tan-nar kienu qegħdin ilestu l-murtali għall-festa meta f'daqqa waħda sploda murtal. In-nies tal-irħula semgħu ħoss u ċemplu 'l-pulizija. Il-pulizija indunaw li kienu mejtin.

Il-pulizija għadhom qegħdin jipprovaw jaraw kif seta' sploda l-murtal. Naġġornawkom b'aktar aħbarijiet li tidħlilna aktar informazzjoni. 

-----

Ħaż-Żebbuġ, It-2 ta' Mejju, 2017

Studenti Maltin b'Suċċess f'Kompetizzjoni Ewropea fil-Bulgarija.

Grupp ta' tmien studenti mill-kulleġġ ta' San Alwiġi kisbu suċċess meta kklassifikaw it-tieni fil-Konferenza Ewropea għall-Edukazzjoni u r-Robotika f'Sofia, il-Bulgarija.

L-istudenti mill-ewwel sena tal-kulleġġ ingħaqdu f'tim bl-isem ta' "Aloybotics" u kkompetew permezz ta' robot li jimxi fuq 'gameboard' u jitma l-ħidma li jwettqu l-bdiewa fl-għelieqi, fosthom li jpoġġi t-tiben u l-ilma f'posthom fir-razzett, jiżra ż-żerriegħa fil-ħamrija u jitma' lill-bhejjem.

Il-kompetizzjoni ttellgħet fl-aħħar ġimgħa ta' April u kkompetew fiha timijiet fosthom il-Polonja, il-Bulgarija, l-Awstralja, il-Belġju u l-Albanija.

Deskrizzjoni ta' post

Naħseb li mill-postijiet kollha tad-dinja, m'hemmx kamra li nobgħod iżjed mill-kamra fejn nagħmel l-eżami tal-mużika. Tassew li tinsab ġewwa r-raħal żgħir u kwiet ta' Ħal Lija iżda naħlef li m'hemmx post iżjed tal-biża' għalija.

Din il-kamra tinsab ġewwa r-residenza tal-Università ta' Malta. Hemm kamra mwarrba mill-bini l-ieħor. Il-faċċata tal-kamra hija miżbugħa bajda b'bieb kannella fin-nofs. Hekk kif tidħol hemm sufan minn żmien żemżem u żewġ siġġijiet kollha susa. Dawn jintużaw għan-nies li jkunu qegħdin jistennew biex jidħlu għall-eżamijiet. Meta nkun qiegħda hemm inħoss l-għaraq ixoqq għalija u qalbi tibda tħabbat sitta sitta.

F'din il-kamra żgħira u mdawla hemm skrivanija tal-kewba mgħottija b'riżma karti kif ukoll pjanu. Ġeneralment ikun hemm siġġu mal-ġenb ukoll. Mal-art hemm tapit imberfel u kkulurit, kif ukoll lampa li rat żmien aħjar. Hekk kif tidħol tolqtok ir-riħa tal-għeluq u taż-żebgħa ġdida. Tisma' ħafna melodiji u allegriji kif ukoll xi strumenti jintunaw. Kemm-il darba tisma' xi tfal jibku jew jidħku jekk ikunu marru tajjeb. Dal-post ma tantx jogħġobni għaliex bħal ħafna nies, ma tantx nieħu gost immur għal xi eżami, speċjalment wieħed tal-mużika!

Il-kamra tal-eżami tal-mużika dejjem tqanqalli l-biża' u t-tensjoni. Sfortunatament qatt ma ħadt gost f'dan il-post u ċerta li qatt m'jien se nieħu gost. Għalkemm nobgħod dan il-post b'qalbi u ruħi kollha, qatt ma kelli għalfejn għaliex dejjem ħriġt minn hemm bi tbissima u riżultati tajbin!

Katrina Conrad (Form 1.1)

-----

Ragusa hi belt ewlenija ġo Sqallija. Hi waħda mill-ikbar ibliet li hemm fuq din l-art u ġo fiha hemm ħafna villaġġi żgħar li kull wieħed minnhom għandu karatteristiċi uniċi. 

Ragusa hi maqsuma fi tnejn, il-parti l-qadima u l-parti l-ġdida, waħda tinsab fuq għolja filwaqt li l-oħra tinsab fuq art baxxa. Hi belt mogħnija b'ħafna affarijiet fosthom baħar sabiħ, għoljiet u widien mill-isbaħ, kif ukoll raba' li tinħadem min-nies tal-lokal. 

Il-bdiewa f'din il-belt ikabbru ħafna ħxejjex differenti. Hemm ukoll ħafna rziezet tal-annimali, l-aktar baqar. Dawn tarahom jirgħu fuq l-għoljiet u l-widien tal-madwar. Il-prodotti li jkabbru l-bdiewa jintużaw f'ħafna platti tal-ikel mill-aktar bnini. Platti magħmulin minn ħaxix frisk u kif ukoll diversi platti tal-laħam, ħut u frott tal-baħar. Minbarra l-bdiewa, Ragusa hi wkoll belt popolari ħafna mas-sajjieda. Huma diversi l-portijiet imdawrin mal-kosta ta' Ragusa li jservi ta' kenn għall-vapuri u d-dgħajjes tas-sajjieda tan-nies tal-lokal. 

Ragusa hi belt magħrufa ħafna wkoll mat-turisti. Hemm diversi lukandi kif ukoll numru t'attrazzjonijiet li huma ferm popolari mat-turisti. Fosthom, wieħed jista' jara l-katidral ta' San Ġwann, kif ukoll il-knisja ddedikata lil Santa Marija u San Ġorġ. Ma jonsqux ukoll il-mużewijiet, ġonna mill-isbaħ u kastelli antiki ta' ġmiel liema bħalu. 

Jessica Sciberras (Form 1.2)

-----

Il-Belt Valletta hija l-belt kapitali ta' Malta u hija mibnija fuq peniżola. Il-Belt Valletta ħadet il-post tal-Imdina, li kienet il-belt kapitali ta' qabel. Din il-belt hija famuża ħafna minħabba l-istorja tagħha. Hija sabiħa ħafna u hemm ħafna affarijiet li tista' tara u hemm ukoll ħafna x'tagħmel. 

Il-post favorit tiegħi fil-Belt huwa l-Barrakka ta' Fuq. Jiena nħobb immur hemm filgħodu biex nara l-ġnien u l-veduta. Kuljum, għall-ħabta ta' nofsinhar jisparaw il-kanun. Ħafna nies imorru biex jaraw il-kanuni. Jiena qatt ma nixba mmur hemm biex nieħu r-ritratti.

Hemm ħafna tipi ta' ħwienet fil-Belt. Hemm xi ħaġa għal kulħadd. Filgħodu jkun hemm il-monti, hemm ukoll post li tista' tixtri l-laħam, ħwienet tal-ħelu, affarijiet tad-dar u ħafna ħwienet tal-ħwejjeġ u ż-żraben. Madwar il-ħwienet hemm ħafna ristoranti, kafetteriji u ħwienet oħrajn tal-ikel. 

Jekk trid ukoll hemm iċ-ċinema fejn tista' tmur tara film. Hemm ukoll it-Teatru Manoel, tista' tgħid ukoll it-teatru nazzjonali ta' Malta, fejn tista' tara l-Orkestra Filarmonika Nazzjonali u ħafna talenti oħrajn. It-Teatru Rjal jinsab ukoll fil-Belt Valletta. Hemmhekk jorganizzaw ħafna tipi ta' divertimenti differenti. 

Kif tista' tara, ħafna affarijiet jinsabu ġewwa l-Belt Valletta. Jiena semmejt ftit minnhom biss. In-nies jiġu minn madwar id-dinja biex jaraw is-sbuħija tal-Belt tagħna sabiħa u antika.

Hannah Jameson (Form 1.3)

Riċensjoni ta' Ktieb

Il-ktieb favorit tiegħi bħalissa huwa "Tereża" miktub minn Deborah Abela u addattat għall-Malti minn Leanne Ellul u Clare Azzopardi. L-iskola ta' dan il-ktieb huwa li n-nies ikunu jafu kif kienet il-ħajja fit-Tieni Gwerra Dinjija.

Tereża hija l-karattru prinċipali u dan il-ktieb jirrakkonta tfulitha. Din il-povra tifla kienet tgħix fil-gwerra u dak iż-żmien, il-ħajja ma kinitx faċli għall-Maltin. Tereża u familtha batew il-ġuħ u saħansitra tilfu darhom ukoll. L-Awstralja ser tkun id-dar il-ġdida ta' Tereża, b'futur promettenti jistennieha. Il-vjaġġ huwa twil u diffiċli, u Tereża bdiet taffaċċja nies ġodda meta waslet, fosthom il-'bullies.' Tereża hija ċerta li ser tagħmel lil familtha u l-Malta kollha kburin, fil-futur u dejjem talbet lil Alla jħarisha minn kull għajn.

Il-karattru favorit tiegħi huwa Albert. Dan kien suldat fil-gwerra u bata ħafna. Żmienu fil-gwerra kien żmien ta' agunija għax tilef lil sħabu f'kamp tal-konċentrament. Huwa jbati b'marda jgħidulha 'Battle Fatigue,' tkun qisek imweġġa' imma ma jkollokx feriti jew għadam miksur, allura tkun aktar diffiċli biex tfieq minnha. Alla skont il-muntanja jagħtiha s-silġ u kien hawn li sab lil Tereża li tgħinu jbiddel ħajtu u min-naħa l-oħra hu jsalvaha mill-'bullies.'

L-istorja fiha ħafna azzjoni. Il-ħajja fi żmien il-gwerra kienet mgħaġġla, b'ħafna nies jiġru 'l hawn u 'l hinn, u jippruvaw igawdu l-ftit ħin sabiħ li kellhom. Fl-Awstralja l-ekonomija hija żviluppata u fit-triq ikun hemm ħafna traffiku, b'serbut karozzi wara xulxin, għaliex kulħadd għaddej bi ġlieda kontra l-ħin.

Il-ktieb jogħġobni għax Tereża hija eżatt bħall-awtriċi meta kienet żgħira, enerġetika u għalkemm kienet tgħix fi żmien ferm diffiċli, ħajjitha kienet tgawdiha u żżommha mimlija daqs bajda.

Martina Cortis (Form 2.2)

-----

 "L-Istejjer tar-Ronnie" ta' Joe Friggieri... kemm daħħakni! Qrajt il-ktieb u spiċċajt nogħxa bid-daħk! Veru ktieb sabiħ, interessanti u bi kliem sempliċi, perfett għalina t-tfal. Jekk inti ma tħobbx kotba tan-niket u tad-dwejjaq imma tħobb kotba tal-ferħ u tad-daħk, dan huwa l-ktieb perfett għalik!

X'taħseb li jismu l-protagonist? Ovvjament jismu Ronnie imma n-nies tar-raħal jgħajtulu r-Ronnie. Dan huwa raġel simpatiku u li jagħmel ħafna diżastri. Għandu familja t'erbat itfal, tarbija, tewmin imżewqin u tifel kbir. Dan il-ktieb huwa fuq il-ħajja tar-Ronnie li jinkludi kull tip t'aspett fil-ħajja Maltija. Ġo dan il-ktieb hemm sebgħa u għoxrin kapitlu kollha tad-daħk u ċajt imma llum ħa nkellimkom fuq tnejn biss.

"Id-Dramm tal-Passjoni" huwa l-erbatax-il kapitlu. Din l-istorja hija fuq ir-Ronnie li ta' kull sena daħal biex jieħu sehem fid-dramm ġos-sala tal-knisja u għamel il-partijiet kollha ħlief dawk li fihom irid jitkellem.Din is-sena hu lagħbha tal-ħalliel il-ħażin u kellu jgħid sentenza waħda. Ma setax  jiftakarha bl-ebda mod imma qabel ma ħareġ fuq il-palk fakkruhielu. Issa... Il-kapitlu li jmiss huwa "Il-Kwiżż." Din l-istorja hija fuq kwiżż li jieħu sehem fih ir-Ronnie li jintwera fuq it-televiżjoni. Hu wieġeb il-mistoqsijiet kollha tajbin għal sitt ġimgħat sħaħ. Wara, waslet il-finali u ma nistax ngħid! Biex tkunu tafu x'ġara waqt id-dramm u jekk rebaħx il-kwiżż jew le, aqraw il-ktieb. 

Joe Friggieri, l-awtur tal-ktieb, twieled fl-1946 ġewwa Ħal-Lija. Hu kien professur tal-Filosofija, poeta, direttur tad-drammi u senat tal-Università tya' Malta. Il-pubblikazzjonijiet tiegħu jinkludu tliet volumi ta' poeżiji, tliet ġabriet ta' stejjer qosra, numru ta' drammi u bosta aktar. Hu rebħa ħafna premji tal-letteratura fosthom in-'National Literacy Prize' għal tlett darbiet. 

Giulia Grech (Form 2.1)

-----

"Bella Berger" huwa ktieb li jogħġobni ħafna. Dan huwa ktieb fuq tifla li jisimha Bella li ma kinitx komda b'persunitha. Dawk kollha ta' madwarha jibqgħu jinkuha biex tinbidel. 

Dan il-ktieb huwa fuq tifla li tixtieq tkun bħal ħabibtha Jasmine li għandha l-għadam l-għadam ta' ġenbejha mqabbżin 'il barra jew bħal oħtha Darlene, b'figura ta' ballerina. Qatt ma taraha b'xi libsa jew dublett, dejjem bil-'jeans' u flokk kbir ħafna, għal kull okkażjoni. In-nanna ta' Bella għenitha ħafna u tagħtina naqra kunfidenza imma Bella dejjem moħħha f'dawk ta' madwarha u trid tara dawk l-affarijiet li għandhom li jagħmluhom aħjar minnha. 

Bella xtaqet issir attriċi bħal nannitha u kienet tieħu ħafna interess fid-drama. Bella waqfet tiekol u biex tirqaq din saret marda li ħafna żgħażagħ jgħaddu minnha. Hija mardet imma n-nanna baqgħet tipprova tgħinha u tagħtiha l-kuraġġ. Bella kienet lesta biex tinbidel. 

Dan il-ktieb jogħġobni ħafna għax naħseb li jgħin ħafna lin-nies, speċjalment nies li huma għaddejjin minn dik il-marda, jagħmel kuraġġ lill-persuni u jurihom li huma m'għandhomx għalfejn joqogħdu jinkwetaw fuq dak li jgħidu ta' madwarhom. Meta Rita Saliba kitbet dan il-ktieb hi wkoll għaddiet minn affarijiet simili f'ħajjitha u tisħaq dwar il-fatt li kulħadd jgħaddi minn stadji bħal dawn f'ħajtu. 

Rebecca Poulton (Form 2.3)

Komponiment deskrittiv dwar persuna

Il-Ħabiba Tiegħi

Jien iltqajt ma' Ella l-ewwel darba ħafna snin ilu, meta bdejt l-iskola primarja. Ma tantx tkellimna għall-ewwel ftit li konna bdejna nsiru nafu lil xulxin. Waqt l-aħħar sena tal-primarja, bdejna niltaqgħu u nilagħbu flimkien qabel ma' jibdew il-lezzjonijiet u hekk bdiet il-ħbiberija li ngħożż tassew. 

Ella niexfa għuda u xagħarha lixx qisu spagetta minbarra t-truf li xi kultant jimbarmu. Wiċċha tawwali u spiss ikollha par wardiet roża, iktar u iktar meta tkun ġriet xi ġirja. Imneħirha twil, dritt u rqiq u magħmul sabiħ. Għajnejha kannella bħaċ-ċikkulata skura u mislutin sbieħ. Hija ma tużax nuċċali. Xofftejha sbieħ u mlaħħmin. Ella ftit itwal minni u saqajha twal u tiġri bħar-riħ u taqbeż bħal xi gidi. Timxi b'mod eleganti. Is-swaba' ta' idejha twal u rqaq, dejjem indaf. Il-lewn ta' wiċċha ċar u bla ponot jew nemex.

Hi kważi dejjem tkun kuntenta u ferħana. Meta tkun qiegħda titkellem itteptep għajnejha xi ftit. Ella simpatika, ħelwa u kwieta. Hija tifla intelliġenti u brava ħafna kif ukoll leali. Hi taf taqra bil-Franċiż, bl-Ingliż u bil-Malti. Ella tħobb tiżfen il-'ballet' u hi tajba fil-ġinnastika. Fis-sajf li għadda telgħat Londra għal kors tal-'ballet' u dalwaqt se tieħu sehem f'kompetizzjoni barra minn Malta. Meta tikber, Ella trid issir ballerina. 

Jien kuntenta ħafna li Ella hija l-ħabiba tiegħi. Ngħaddu ħafna żmien flimkien meta nistgħu, pereżempju waqt il-ħin liberu fl-iskola. Għandna ħafna affarijiet komuni u naħsbu l-istess ideat u xewqat. Nixtieq li dejjem nibqgħu ħbieb.

Sarah Valerie Casha (Form 1.2)

-----

Il-ġara tiegħi

Il-ġara tiegħi hija mara li tħobb taqra u tiżfen. Il-ġara tiegħi kollox tħobb tagħmel, issajjar, tilgħab bil-kompjuter, iddoqq il-pjanu u tkanta. 

Il-mara temmen fid-diversità. Minn dejjem kienet hekk. Meta kienet żgħira kienet parti minn komunità biex jikkonvinċu lin-nies li kulħadd huwa differenti imma kulħadd għandu jiġi trattat l-istess. Hi dejjem ferħana u jekk tara lil xi ħadd imdejjaq tkun trid tferrħu. 

Din il-mara għandha karattru simpatiku u ferrieħi. Xi drabi tkun vera storbjuża, għax kull filgħodu tixgħel ir-radju bil-volum miftuħ kollu. Xorta niggustaha għax hi toqgħod faċċata tiegħi u dejjem naraha tiżfen mad-daqqa tal-mużika. Josephine tħossha maħbuba u kuntenta, għandha qalbha tad-deheb. Meta tarani dejjem tixtrili l-ħelu. Jien dejjem nirringrazzjaha. Il-ġara tiegħi ma kont inbiddilha ma' xejn.

Bħal kulħadd, Josephine jkollha mumenti diffiċli. L-iktar ħaġa li ddejjaqni fiha huma l-manjeriżmi tagħha għaliex kull meta tkellimni, toqgħod iċċaqlaq idejha. Darba anki laqtitni tant kemm kienet qed iċċaqlaqhom. Ħafna drabi Josephine toqgħod tiġġieled ma' tal-posta għax iġġibilha l-ittri tard.

Josephine rqiqa u twila qisha lasta. Hi għandha wiċċha ċatt u kollu bil-ponot u bin-nemex. Josephine għandha farrett fuq xofftejha. Għandha xagħarha nnukklat u ppermjat. Xagħarha huwa kulur is-sema u għandha xi 'high lights' vjola. Kont ngħidilha li meta nikber nagħmel xagħri bħal tagħha. 

Josephine hija l-ġara favorita tiegħi. Ma nbiddilha ma' xejn. Inħobbha qisha z-zija tiegħi. Hi vera mara tal-ġenn.

Seyana Pisani (Form 1.3)

-----

Ħija Beppe

Għandi ħija jismu Beppe. Għandu erba' snin biss, jiġifieri jiena nieħu ħsiebu mal-papà u l-mamà. Jien noqgħod ma' Beppe f'Tas-Sliema, ġo dar kbira u sabiħa bi ġnien bil-fjuri ta' kull kulur.

Għandu wardiet ħomor u par għajnejn żoroq. Xagħru bjond u jleqq fix-xemx, filwaqt li l-kulur ta' wiċċu abjad karti. Iħobb jiekol il-pastizzi u għalhekk dejjem nixtrilu xi wieħed wara l-iskola. Iħobb jixrob il-ħalib u qatt ma tgħaddi ġurnata li ma jixrobx ftit minnu! Iħobb jilgħab noli miegħi u ma' ħija Gianni. Jilgħab ta' spiss ma' sħabu u mal-kuġini tiegħu.

Il-karattru tiegħu huwa wieħed ċajtier, dejjem jipprova jdaħħakni. Iħobb jitkellem u huwa simpatiku u ħelu. Imur għal-lezzjonijiet tal-futbol kull nhar ta' Sibt u narawh jilgħab bil-ballun. Beppe jħobb jara programm fuq it-televixin li jismu "Il-Ħajja ta' Ġugarell." Għandu żewġt iħbieb, Martin u Lucy li jiġu d-dar u joqogħdu jaraw it-televixin ma' Beppe. Aħna noqogħdu fl-istess kamra u xi drabi niġġieldu għaliex jiena nkun irrid nagħmel ix-xogħol u Beppe joqgħod jgħajjat u jagħmel ħafna storbju, b'hekk itellifni! 

Beppe huwa tifel bravu u jobdi lill-ġenituri tiegħu. Meta kont żgħira u kien għadu kif twieled, bkejt ħafna bil-ferħ. Għadni sal-lum ferħana bih u naħseb li huwa tifel speċjali ħafna. Jiena nħossni ffortunata ħafna li għandi lil Beppe bħala ħija.

Maya Micallef (Form 1.1)

Rakkont fit-tielet persuna

Kien is-Sibt filgħodu. It-tewmin, Lara u Emma kienu mehdijin fil-kċina. Lara kienet qed tiżbarazza l-kċina u Emma kienet qed tipprepara l-ikel. 

Lara semgħet ħoss ħafif ħafna ta' tħaxwix. Qalet lil Emma u waqfu jissemmgħu. Issa l-ħoss kien jinstema' aħjar, kien ħoss ta' brix. Mad-daqqa u l-ħin raw ġurdien għaddej fuq il-bank tal-kċina. Bil-fixkla li ħakmitha, Lara waqqgħet munzell platti li kienet se tpoġġi fid-'dish washer' u Emma waqqgħet id-dqiq li kienet qed tuża biex tagħmel l-għaġina għat-torti tal-irkotta. 

Lara marret tiġri u qabdet l-ixkupa waqt li Emma qabdet taġen. Lara, biex tipprova taqbad 'il-ġurdien, bdiet tagħti daqqiet ta' xkupa mal-bank tal-kċina u tajret kull ħaġa li kien hemm fuq il-bank. Il-fruttiera mimlija larinġ, tuffieħ u għajn baqar waqgħet mal-art. Kemm kien hemm frott li beda jittrembel mal-bank u mal-art kollha tal-kċina! Il-ġurdien laħaq ħarab.

Emma dehrilha li rat 'il-ġurdien tiela' mal-bankiiet tal-kċina u tat daqqa ta' taġen tant kbira li laqtet il-vetrina. Kull ma kien hemm fiha waqa' mal-art. Kien hemm ħoss qawwi ħafna ta' ħġieġ jinkiser. Bil-ħasda, il-ġurdien tela' fuq il-'microwave' fejn kien hemm kollezzjoni ta' buqari tat-te. Lara u Emma marru jaqbżu fuq il-ġurdien meta fl-istess waqt ħabtu f'xulxin u waqqgħu l-buqari kollha. Reġgħu semgħu t-tħaxwix. Ħarsu 'l fuq u lemħu 'l-ġurdien jaħrab għal ġol-ġnien. 

Dak il-ħin ħarsu madwarhom u raw id-diżastru li għamlu. Mhux biss ma qabdux 'il-ġurdien imma ġabu l-kċina fi stat ta' ħerba.

Alexia Spiteri (Form 1.3)

-----

Kien wasal l-anniversarju tal-ġenituri ta' Fiona u Olivia, żewġt aħwa. Ġiethom ix-xoqqa f'moxtha u ddeċidew li jsajru ikla sorpriża għal ommhom u missierhom, waqt li dawn ikunu għadhom ix-xogħol.

Fiona u Olivia ħerqanin, bdew jippreparaw il-borom, l-ingredjenti u l-fradal biex isajru. Wara ħafna ħin ta' diskussjoni, l-aħwa qatgħuha li jsajru għaġin biz-zalza. Olivia ddeċidiet li tlesti l-borma bil-misħun u tgħalli l-għaġin u Fiona ddeċidiet li tagħmel iz-zalza. F'qasir żmien, bdew isajru. 

Waqt li kienu qed isajru, Fiona waqqgħet xi qoxra tat-tadam u nsiet tiġborha. Olivia tefgħet l-għaġin fil-borma u xħin rat li l-għaġin kien sar, tfiet il-kuker, qabdet il-borma u mxiet biha għal ħdejn is-sink. Sfortunatament, hi żelqet fuq il-qoxra tat-tadam li waqqgħet oħtha. Il-misħun u l-għaġin fil-borma tar u spiċċa fuq id Olivia. Tgħidx kemm bkiet! Qabdu jippanikjaw u ċemplu lill-ġenituri tagħhom. Huma malajr ġew u ħadu lil Olivia l-isptar.

Għall-ġenituri ta' Fiona u Olivia, ma kienx l-isbaħ anniversarju u s-sorpriża sfaxxat fix-xejn. Minflok għamlu ikla bnina, spiċċaw bi kċina li spiċċat diżastru. Għall-inqas Olivia ma kellhiex ġrieħi gravi. Dan l-inċident seta' ġie evitat bi ftit aktar attenzjoni!

Martina Buttigieg (Form 1.1)

-----

Il-ħajja hija mimlija esperjenzi u avventuri. Xi drabi ngħaddu minn esperjenza li ma nkunu qatt ħlomna li ser ngħaddu minnha u għalhekk ma nkunux qed nistennewha. Hekk ġralha z-zija tiegħi meta nħarqet il-kċina tagħha. 

Kien il-Ħadd filgħodu u bħas-soltu z-zija Marija kienet qed tipprepara l-ikel għal nofsinhar. Il-kuġina kienet ilha tgħidilha sabiex taqli l-patata. Għalhekk iddeċidiet li taqtgħalha xewqitha. 

Iz-zija Marija hija mara qalbha tajba ħafna. Kienet taħdem bħala ħajata li jkollha x'tagħmel ħafna. Taħdem daqs kelb u dejjem bin-nies id-dar. Dakinhar, eżatt kif tefgħet iż-żejt fit-taġen, ċempel it-telefown. Waqt li kienet qed titkellem, nesiet iż-żejt u fid-daqqa u l-ħin bdiet tara d-duħħan ħiereġ. 

Iz-zija Marija ħarġet fil-gallarija sabiex tgħajjat għall-għajjut u b'xorti tajba kien hemm raġel miexi fit-triq u malajr ċempel lil tat-tifi tan-nar. Il-pumpiera malajr tfew in-nar iżda l-kċina saret ħerba sħiħa. Kien hemm duħħan kullimkien id-dar tagħha. 

Dakinhar aħna morna nżuru liz-zija Marija u rajnieha tnaddaf il-kċina mill-ħruq. Kien hemm kullimkien mimli duħħan. Iz-zija kellha qatgħa kbira fuqha għax ma setgħetx temmen kif seta' ġralha hekk! Qatt f'għomorha ma ħasbet li ser tgħaddi minn esperjenza kerha bħal din iżda li għandha tirringrazzja 'l Alla li kollox għadda b'wiċċ il-ġid. 

Jade Gerada (Form 1.2)

Ittra Formali

99, Triq Santa Marija,
Ħad-Dingli,
DNG 4321

L-24 ta' Jannar, 2017

Skola Santa Dorotea,
Triq l-Imdina,
Ħaż-Żebbuġ,
ŻBĠ 4032

Sinjura Anastasi,

Dan l-aħħar aħna l-istudenti nnotajna li inti, flimkien mal-għalliema qegħdin tisimgħu ħafna l-opinjoni tagħna u ta' dan nirringrazzjawkom. Intom ukoll qegħdin tagħtu ħafna mill-ħin tagħkom biex torganizzaw ħafna attivitajiet, li bihom qed nieħdu pjaċir u nitgħallmu minnhom fl-istess ħin. 

L-attività tal-ġimgħa l-oħra kienet ta' suċċess. Jien u sħabi ħadna gost ngħinu f'din l-attività u biha konna kuntenti li bil-flus li ġbarna għamilna l-ġid għax dawn ingħataw lil Puttinu. Aħna ħadna pjaċir ħafna niżfnu ż-żumba. Dik li għallmitna vera kienet brava. Nispera li nibqgħu nagħmlu attivitajiet bħal dawn. Jien kont qed naħseb biex forsi nagħmlu xi logħba kontra l-għalliema u niġbru l-flus għall-missjoni.

Nirringrazzjak mill-ġdid f'ismi u f'isem sħabi tal-klassi. 

Tislijiet, 
(firma)
Lexine Farrugia. 

Lexine Farrugia (Form 2.2)

-----

96, "Santa Marija,"

Ħal Għargħur,

GĦR 1295

It-2 t'April, 2020

Skola Santa Dorotea,

Triq l-Imdina,

Ħaż-Żebbuġ,

ŻBĠ 1234

Sinjura Caroline Anastasi,

Qed nibgħatlek din l-ittra biex ngħidlek grazzi talli torganizza l-attivitajiet fl-iskola għalina l-istudenti. Jien vera nieħu pjaċir meta jkollna l-attivitajiet għax l-iskola torganizza attivitajiet li jogħġbuni ħafna.

L-aktar li jogħġobni huwa l-isport, b'mod partikolari l-'volleyball' għax jien għandi ħafna enerġija u malajr naħliha meta nilgħab. Jiena vera napprezza meta tiġi fil-klassi tagħna u tistaqsi dwar liem huma l-attivitajiet li rridu għax b'hekk turina li jimpurtak dwar dak li naħsbu aħna.

Nerġa' nirringrazzjak tal-attivitajiet kollha u vera napprezza x-xogħol kollu li tagħmel għalina.  

Tislijiet,

(firma)

Jade Amato. 

Jade Amato (Form 2.3)

-----

"Rosewood,"

Triq Ġużè Abela,

Ħaż-Żebbuġ,

ŻBĠ 1234

Il-25 ta' Jannar, 2017

Skola Santa Dorotea, 

Triq l-Imdina,

Ħaż-Żebbuġ,

ŻBĠ 1234

Sinjura Caroline Anastasi,

Nispera li tinsab tajba. Jien xtaqt niktiblek din l-ittra biex inkun nista' nirringrazzjak tal-attivitajiet kollha li inti torganizza fl-iskola tagħna. 

L-ewwel nett, nixtieq ngħidlek grazzi kbira tal-attività li għamiltilna s-sena l-oħra fuq l-'anti-bullying' li vera għenet lit-tfal. Grazzi wkoll tal-attività tal-isport li torganizzalna ta' kull sena. Aħna vera nieħdu gost għax inkunu nistgħu nuru t-talenti tagħna f'din il-ġurnata u fl-istess ħin nieħdu gost mal-ħbieb. Grazzi wkoll tal-ħruġ edukattivi li torganizzalna matul is-sena.

Dawn l-attivitajiet interessanti li torganizzalna ħa jibqgħu fil-memorji tiegħi għal dejjem u ma nixtieq qatt li tasal il-ġurnata li nispiċċa nattendi ġewwa din l-iskola.

Tislijiet,

(firma)

Miriana Spiteri.

Miriana Spiteri (Form 2.1)

Ittra informali

24, Triq il-Peprin,
Ħal Warda,
WRD 9489

Is-17 ta' Jannar, 2017

Għażiża Karina, 

Nispera li tinsab tajba. Qed niktiblek biex ngħidlek dwar sorpriża li tawni l-ġenituri tiegħi. 

Il-ġimgħa l-oħra, f'għeluq snini, il-ġenituri tiegħi qaluli li konna se mmorru nieklu. Tlaqna mid-dar fis-sitta u kif tlajt fil-karozza, marret għajni bija. 

Meta qomt, sibt ruħi l-Imġarr, Għawdex. Jien staqsejthom għalfejn konna hemm, iżda l-ġenituri qaluli, "Issa tara!." Ftit wara, dħalna fid-daħla ta' lukanda lussuża u skoprejt li kelli nqatta' tlett ijiem hemmhekk. Tgħidx kemm fraħt!

Ħadt ħafna pjaċir, ngħum, nilgħab it-tenis, nistrieħ u ngawdi lill-ġenituri tiegħi. Inti kellek xi sorpriża sabiħa dan l-aħħar?

Dejjem tiegħek,
Francesca.

Francesca Anastasi (Form 1.1)

-----

"Camelia,"

Triq il-Belt Valletta,

Il-Mosta,

MST 9013

Is-17 ta' Jannar, 2017

Għażiża Sandra,

Kif int? Nittama li tinsab tajba. Qiegħda niktiblek biex ngħidlek dwar sorpriża li kelli, nhar il-Ħadd. Ma stennejthiex, imma qatt ma ninsieha!

Kif taf, nhar il-Ħadd għalaqt snini. Il-ġenituri tiegħi flimkien ma' ħija, - kmieni sabiex immorru għand in-nanna biex tawgurali ġurnata tajba. Minflok, mingħajr ma ndunajt, morna restorant, hemmhekk kien hemm il-familja għażiża tiegħi. 

Wara li kilna ikla, kulħadd tani rigali veru sbieħ. Wara, rajt lil ħija miexi b'kejk daqsiex! Ħadt ħafna gost b'kulħadd u nixtieq li jerġgħu jagħmluli sorpriża bħal din!

Dejjem tiegħek,

Carla. 

Carla Muscat (Form 1.3)

-----

8, Triq Dun Karm Frendo,

Ħad-Dingli,

DGL 1173

It-18 ta' Jannar, 2017

Għażiża Elisa,

Nispera li tinsab tajba. Għadni kif qrajt ittra li bgħattli dwar is-sorpiża li tawk il-ġenituri. Issa ħa ngħidlek naqra dwar is-sorpriża li tawni l-ġenituri.

Minn meta kelli disa' snin, kont nixtieq li ndoqq il-pjanu imma ħsibt li jkun aħjar jekk tibda titgħallem strument meta tkun għadek żgħira ħafna. Darba minnhom, il-ġenituri qaluli li ħa jkolli pjanu u tgħidx kemm fraħt! Qishom kienu jafu xi xtaqt! Meta darba wasalt id-dar mill-iskola, sibt il-pjanu.

Issa qiegħda mmur il-lezzjonijiet. Sewwa jgħidu li Alla jsebbaħ u Alla jibgħat. Dik kienet l-aqwa sorpriża. Sellili!

Dejjem tiegħek,

Julia.

Julia Bezzina (Form 1.2)