Thursday, April 23, 2015

Deskrizzjoni ta' post

Qatt ma nista' ninsa meta mort fid-dinja tal-fantasija tiegħi, fil-ħolm. Ħlomt li kont qiegħda l-ġenna fejn Ġesù, fil-Ġnien tal-Eden, ġnien impitter, perfett, mhux mittifes mill-bnedmin u mpinġi b'id Alla.

Ir-raġġi tax-xemx niżlu b'kalmezza u trankwillità liema bħalha biex isaħħnu 'l-għadira. Xmara mdaqqsa kienet qed titkaxkar mal-blat f'għoli ta' madwar sitt metri. Il-blat ħadrani għall-bidu ħsibt li kien miżbugħ imma xħin ħarist u qgħadt niflih, rajt li kien miksi b'ħażiż jiżloq. 

Il-qawsalla li kienet qed issebbaħ din id-dinja tal-fantasija tiegħi, stħajjiltha mpenġija. Smajt dak l-ilma nieżel, stħajjiltu xita nieżla bil-qliel. Fl-ilma safi kien hemm bosta ħut ikkulurit tal-ilma ħelu. Xelta kbira ta' pjanti tal-ilma kemm bil-fjuri u kemm bla fjuri, filwaqt li rajt ukoll żewġ ċinji bojod jgħumu fil-kwiet, u bla ebda ħjiel ta' għaġġla, qisu bħal li kieku waqaf l-arloġġ. 

Il-weraq tas-siġar kienu qed jiċċaqalqu bl-istess żiffa ħelwa li kien qed joħloq iċaqlaq l-ilma jitgerbeb fil-ġenna li ħlomt dwarha, bla toroq u allura bla karozzi. Post trankwill, bla ebda ħsejjes bojod, tisfir u tpespis tal-għasafar u tħaxwix tal-ilma. Arja safja u mingħajr ebda sinjali ta' duħħan. L-istess żiffa kienet iġġorr magħha riħa ħelwa ta' fjuri ta' kull tip. Riħa ta' għasel.

Kif tista' tqum u tħalli din il-ħolma warajk?
Kif tista' ma tqumx tard? 

Hailey Ciantar (Form 1.2)
----------

Darba waħda kont waħdi d-dar. Jien kelli n-ngħas u allura mort norqod. Kont qed noħlom illi jien kont ġo dinja ta' paċi. Kien hemm ħafna siġar u pjanti.

Kien hemm ħafna kwiet u kif ukoll paċi. Bdejt inxomm riħa ta' siġar. Hemm kien hemm ukoll ix-xmara sabiħa u nadifa, u kien hemm ukoll il-papri u ż-żrinġijiet ġox-xmara. F'dan il-post ta' paċi kien hemm ħafna annimali sbieħ u kbar. Kien hemm ukoll ħafna frott li kien kbir u kien tajjeb ħafna. Hemm tista' tisma' l-ħoss tal-kaskata nieżla wkoll. Meta inti tkun qed tisma' dan il-ħoss, inti tikkalma u meta l-ilma tal-kaskata jinstabat mal-blat u jittajjar it-taqtir għal fuq wiċċek, inti tħoss dik in-naqra ilma fuq wiċċek. F'dan il-post ta' paċi, it-temp kważi l-ħin kollu jkun dak ta' xemx u l-pjanti ma jmutu qatt. 

Hemm ħafna insetti sbieħ u kbar. Hemm ħafna tipi ta' annimali pereżempju ġiraffi, iljuni, tigri, iljunfantim qtates u klieb. Dawn huma ħafna tipi ta' annimali li huma verament sbieħ. Hemmhekk insibu wkoll dar li hi vera sabiħa, kbira, nadifa u għandha ħafna maġija. Ġo din id-dar isir l-ikel, minn fejn ikunu jistgħu jieklu l-annimali u n-nies li jgħixu hemm. 

Jien kieku mmur hemm għax vera sabiħ il-post speċjalment peress li jien inħobb il-paċi. 

Joanna Gauci (Form 1.1)
----------

Iċ-'Chadwick Lakes' jinsab fil-limit tar-Rabat, eżattament f'Wied il-Qlejgħa. Dan il-post huwa wieħed mill-ftit postijiet ta' Malta li għadu fl-ambjent naturali tiegħu. 

F'dan l-ambjent, tista' xxomm arja friska u r-riħa tfuħ tal-fjuri. F'dan il-post tista' tisma' 'l-għasafar jgħannu u tisma' l-ilma nieżel li jkun ġej minn ġol-widien. Dan il-post mhux biss għandu l-ambjent sabiħ imma għandu sens ta' ġabra għax fl-aħħar tal-ġimgħa jilqa' ħafna familji. 

L-unika ħaġa li ddejjaqni hi meta mmur f'dan il-post u jkun hemm xi vandaliżmu, bħas-siġar maqtugħin. Il-ħitan ħafna minnhom impinġijin bl-'ispray' u mwaqqgħin. Xi nies imorru jfittx l-bebbux u meta jċaqalqu l-ġebel kbir ma jpoġġuhx f'postu. Ħaġa oħra li ddejjaqni hi meta n-nies joħorġu bil-kelb tagħhom u ma jnaddfux wara li l-kelb jagħmel il-bżonnijiet tiegħu. Dan kollu mhux talli jagħmel ħsara lill-ambjent imma wkoll lill-annimali jew 'l-insetti li jgħixu f'dan il-post. 

Malta huwa pajjiż żgħir u ma tantx għandna postijiet ta' ġmiel bħal dawn. Din hija r-responsabbiltà tagħna ċ-ċittadini biex nieħdu ħsieb 'l-ambjent biex postijiet bħal dawn ingawduhom aħna u dawk li jiġu warajna. 

Martina Micallef (Form 1.3)

Wednesday, April 15, 2015

Rapport

Il-Belt Valletta, Il-15 t'April, 2015

Inċident tat-traffiku traġiku
It-traġedja li ħalliet persuna mejta.

Il-Ħamis, id-9 t'April, għall-ħabta tas-sitta u nofs ta' filgħaxija, seħħ inċident f'Wied f'Ħal Qormi. F'dan l-inċident li kien bil-karozza, kien hemm mara ta' tletin sena li issa tinsab fil-periklu tal-mewt. Is-sewwieqa kienet qiegħda ssuq b'veloċità qawwija. Hija tilfet il-kontroll tal-karozza tagħha u baqgħet dieħla f'siġra. Xi nies li kienu f'dawk l-inħawi ppruvaw jagħtu l-ewwel għajnuna imma kine kollu ta' xejn. Wara dik it-traġedja, waslet l-ambulanza u ttieħdet l-isptar. Hija kienet qed issofri ġrieħi gravi u sfortunatament mietet l-għada stess.

Kelsey Azzopardi (Form 2.3)
----------
Is-Siġġiewi, It-2 t'April, 2015

Tfal Jisirqu u Jaqilbu Karozza ġol-Parapett ta' Żewġ Anzjani

Tliet subien serqu karozza li nqalbet u spiċċat ġo parapett ta' żewġ anzjani. Is-subien, li isimhom ma jistax jissemma' peress li huma taħt l-età, serqu l-karozza ta' Silvian Cassar ta' ħamsa u erbgħin sena. Saqu l-karozza mir-Raħal Ġdid sa Santa Luċija, iżda fi Triq iż-Żnuber tilfu l-kontroll tal-karozza u baqgħu deħlin ġol-parapett ta' Victor u Marthese Titley ta' tlieta u sittin u sittin sena. Marthese Titley qaltilna, "Meta wasalt id-dar u sibt karozza maqluba ġol-parapett, ħadt qatgħa kbira. Ċempilt 'il-pulizija li waslu f'leħħa ta' berqa. It-tfal ippruvaw jaħarbu iżda l-pulizija rnexxielhom jaqbduhom." Wieħed mis-subien qalilna, "Konna biss qed nisselfu l-karozza biex immorru dawra biha, u wara konna se nirritornawha." Il-ġimgħa d-dieħla l-każ ser jitressaq il-qorti. 

Nicole Riolo (Form 2.1)
---------
Ħaż-Żebbuġ, L-Erbgħa, il-11 ta' Mejju, 2015

Waqa' Ajruplan
Ajruplan tal-'Germanwings' waqa' fl-Alpi

Kulħadd tkexkex kif sema' bl-aħbar li l-ajruplan tal-'Germanwings' kien waqa' fl-Alpi Franċiżi. Intqalu ħafna affarijiet, ħafna minnhom veri u oħrajn qlajjiet, kif jiġri dejjem. Fuq l-ajruplan kien hemm mija u ħamsin persuna, żewġ trabi u kien hemm ftit tfal tal-iskola. Il-ko-pilota kien qed ibati minn dipressjoni u t-tabib kien qallu biex ma jmurx xogħol. Sfortunatament ħadd ma salva u nstabet il-kaxxa s-sewda li din turi x'ġara. Fi tmien minuti l-ajruplan waqa'. Huwa nstab f'biċċiet. Min jaf kif ħassewhom il-familji li tilfu lil xi ħadd speċjali. 

Corinne Zammit (Form 2.2)

Thursday, April 2, 2015

Komponiment deskrittiv dwar persuna

Jien ħa nitkellem dwar oħti ż-żgħira li jisimha Aimee. Aimee għandha tmien snin u għalhekk iżgħar minni sentejn. Hija tagħlaq sninha fis-sitta ta' Mejju, għalhekk din is-sena ser tagħlaq disa' snin. 

Aimee għandha xagħarha kannella skur bi ftit strixxi ta' kannella ċar. Hi għandha għajnejha kannella. Oħti hija rqiqa u għandha wiċċha bi ftit wardiet roża. Aimee tħobb ħafna ikel differenti, però dak favorit tagħha huwa l-ispagetti biz-zalza ħamra. Hi tħobb tixrob l-ilma u tħobb tiekol il-frott frisk, speċjalment il-frawli. 

Aimee hija persuna kuntenta u ferriħija. Ma' nies oħra, hija simpatika u kwieta. Hi tħobb tgħin lil kulħadd. Il-passatempi tagħha huma li taqra, tiżfen il-'ballet,' toħroġ mal-familja u tilgħab miegħi. L-istaġun li Aimee tieħu gost fih huwa s-sajf. Dan għaliex tkun tista' tmur il-baħar, ikollha aktar ħin liberu biex tipprattika l-passatempi tagħha, kif ukoll tkun tista' tiekol xi ġelat tajjeb. Peress li oħti tħobb ħafna l-qtates sufin, fis-sajf hi tkun tista' tqatta' aktar ħin tilgħab mat-tlett iqtates sufin li għandha. Meta tinzerta tkun ġurnata sabiħa, anki fl-istaġun tar-rebbiegħa, ommi u missieri kemm-il darba joħduna 'horse riding.' Dan jgħina biex inqattgħu aktar ħin bħala familja. 

Għalkemm xi kultant jiena u oħti niġġieldu qisna kelb u qattus, dejjem nerġgħu nagħmlu ħbieb. Aħna nħobbu ħafna lil xulxin u mingħajr xulxin m'aħna xejn. 

Kylie Agius (Form 1.1)
----------

Thea hija tifla ta' ħdax-il sena. Din hi waħda mill-akbar ħbieb tiegħi u se niddeskrivi l-karattru tagħha. 

Thea dejjem ferħana u kuntenta b'dak kollu li jkun għaddej madwarha. Meta titkellem tħobb iċċaqlaq idejha. Dejjem simpatika mal-ħbieb tal-klassi u meta ġieli tgħidilha xi ċajta ma nkunux nistgħu nieqfu bid-daħk.

Hija dejjem lesta li tgħin lil kull min ikollu bżonn fil-klassi. Għandha ħafna passatempi sbieħ, imma l-aktar favoriti tagħha huma l-qari, iż-żfin, il-logħob bil-kompjuter u l-għawm. Kull nhar ta' Erbgħa tmur tistudja l-pjanu wkoll. Thea tħobb ħafna l-annimali. Darba minnhom rat kelb jiġri fuq il-ħaxix u daħħal xi xewka ġo jdejh. Malli semgħat il-kelb jibki, marret tiġri biex tara x'kien ġralu u rnexxielha toħroġhielu. 

Thea hija tifla simpatika u intelliġenti. Fl-eżamijiet dejjem tmur tajjeb u tiġi minn ta' quddiem. Hija samra b'xagħarha u għajnejha kannella. Għandha xagħarha twil u lixx iżda ta' spiss tiġbru f'toppu jew tagħmlu malju fil-ġenb. Għalkemm Thea għad għandha biss ħdax-il sena, ġabet ruħha għax għandha figura sabiħa ta' tfajla ġmielha. Għall-età tagħha, twila mhux ħażin. Għandha wiċċha bil-wardiet roża wkoll.

Lil Thea nħobbha ħafna għax dejjem ġabitli rispett u jien nirrispettaha lura. Nispera li nibqgħu ħbieb u nkabbru l-ħbiberija tagħna filwaqt li nkomplu nitgħallmu minn xulxin.

Nicole Schembri (Form 1.2)
----------

Il-persuna li għażilt jisimha Lilia. Hi għandha tmintax-il sena u toqgħod fil-blokka tal-appartament tiegħi. Lilia tinsab fl-ewwel sena tal-Università tistudja ż-żfin. Lilia hija twila u għandha figura perfetta għal żeffiena.

Lilia kienet għamlet żmien toqgħod l-Italja. Meta ġiet lura Malta, jien kelli biss sena u fil-ħin liberu tagħha kienet toqgħod tilgħab miegħi. Konna nqattgħu ħafna ħin flimkien nilagħbu bil-pupi jew ta' parsi qed nagħmlu xi kikkra te, naraw xi film tat-tfal. Ġieli kienet toqgħod taqrali xi storja wkoll. Meta kienet tiġi hi, il-ħin kien itir. 

Meta bdiet tikber u l-ħin liberu tagħha naqas u jien bdejt immur l-iskola, bdejna niltaqgħu inqas imma Lilia kienet tiġi fil-vaganzi biss. Peress li t-tnejn li aħna żeffiena, konna noqogħdu niżfnu u nipprattikaw iż-żfin flimkien. Naħseb ta' taħtna ma tantx kien jieħu gost bina imma kont inkun fis-seba' sema. Issa li t-tnejn għandna ħafna x'nagħmlu, ma bqajniex niltaqgħu, imma meta naraha fit-triq, dejjem nieqfu u ngħidu xi kelma. 

Jien nixtieq li nibqgħu ħbieb għal dejjem. Jien nixtieq ukoll li nsir ballerina tajba bħalha. Avolja diffiċli, peress li hi ballerina ddedikata. Nixtieq nirringrazzjaha ta' kemm qratli kotba għax bis-saħħa tagħha sirt inħobbhom. 

Sara Caruana (Form 1.3)

Tuesday, March 3, 2015

Riċensjoni ta' Ktieb

Il-ktieb li ser nikteb fuqu jismu "Id tad-Deheb." Dan il-ktieb kitbu Ivan De Battista. Il-ktieb għoġobni ħafna għax fih tagħlima fuq il-bullying. 

Dan il-ktieb jeħodna dritt fuq il-bankijiet tal-iskola. Ġrajja li tagħti ħarsa lejn l-emozzjonijiet li jħossu l-istudenti tal-lum bejniethom. Il-bullying huwa problema soċjali kbira li qed inġarrbu kuljum. Qed naraw b'għajnejna l-impatt tiegħu b'mod akut fl-imġiba ta' ċerti studenti lejn studenti oħra. Issa anke qed ngħixuhom permezz tal-internet ukoll. 

Justin u Cedric huma tnejn minn dawn l-istudenti illi jagħmlu l-bullying fuq ħaddieħor minħabba l-ħajja familjari u l-emozzjonijiet suwed tagħhom. Ġimgħa fost l-oħrajn dawn it-tnejn daħlilhom f'rashom li riedu jħarbtu wieħed mill-istudenti tal-klassi tagħhom - Luca. Luca kien ix-xempju tal-istudenti. It-telfa t'ommu f'età ta' seba' snin, ħalliet impatt fuqu u rendietu f'ġuvni sensittiv. L-iċken ħaġa li xtaq dakinhar kien li jaqbdu miegħu dawk it-tnejn!

Kif induna b'dak li kien ġralu Luca u sħabu, indunaw miegħu. Huma ingħaqdu u marru jfittxu lil Justin u Cedric għax kienu ħadulu l-basket. Meta l-istudenti baqgħu ma nstabux, il-ġenituri kif ukoll l-għalliem u s-surmast, tathom rasu b'din l-aħbar. 

Il-ktieb kompla u kollox mar għall-aħjar. Justin u Cedric kienu l-isptar u Luca rringrazzja 'l ommu. Dan il-ktieb kont nirrakkomandah lil dawk li għaddejjin mill-bullying. 

Emma Bondin (Form 2.1)
----------
Nhar is-Sibt li għadda, minħabba t-temp, bqajna ġewwa. Iddeċidejt li nintefa' fuq is-sufan u naqra ktieb. Bdejt naqra ktieb jismu "L-Istejjer ta' Kendor is-Saħħar." Dan ħallieni bla nifs u tassew għoġobni.

Dan il-ktieb huwa dwar saħħar twajjeb jismu Kendor. Kien żagħżugħ, sabiħ u dħuli. Għamel ħbieb ma' żewġ aħwa jisimhom Sylvan u Tracy. Sylvan huwa tifel fuq ruħu ħafna, imqareb, imma mhux l-ewwel darba li sab ruħu fil-għawġ. Għandu għaxar snin u nofs. Oħtu hija iżgħar minnu sena biss u allura sikwit ikollhom xi jgħidu. Tracey mhix imqarba daqs ħuha, imma lanqas ma tħalliha lixxa. Kendor kien jgħin lill-aħwa billi jagħtihom pariri bżonnjużi biex jinbidlu fi tfal aħjar. 

Dan il-ktieb huwa maqsum fi stejjer żgħar u kollha fihom tagħlima importanti għalina. Meta t-tfal ikunu ser jagħmlu xi ħaġa ħażina, Kendor dejjem jirnexxielu jwaqqafhom milli jagħmluha. It-tfal iħobbuh ħafna lil Kendor u anki hu jħobbhom. Il-ktieb fih ħafna tpinġijiet sbieħ bil-kulur ġo kull storja żgħira. It-tpinġijiet juru dak li jkun qed jiġri fl-istorja u huma mpenġijin minn Frank Schembri, pittur bravu ħafna. Il-ktieb laqatni mill-ewwel darba li rajt il-qoxra tiegħu. Kendor huwa ħabib speċjali għat-tfal. Darba minnhom, Sylvan ipprova jpejjep sigarett minn ta' missieru, imma Kendor qabdu u qallu biex ma jpejjipx. Darb'oħra, Tracey kellha vizzju ikrah u darba minnhom għamlet dan il-wiċċ u baqgħet hekk. Din kienet tagħlima biex tieqaf tagħmel hekk. 

Dan il-ktieb huwa miktub minn Carmel G. Cauchi, awtur u poeta fantastiku. Inħeġġeġ lil kulħadd biex jaqrah. 

Nicole Caruana (Form 2.2)
----------
Jiena llum ser inkellimkom fuq "Il-Pulena tad-Deheb" ta Trevor Żahra. Dan huwa ktieb mill-isbaħ u nista' ngħid li ma neħħejtux minn idejja għaliex dejjem kien hemm dak l-element ta' suspans! Dan il-ktieb huwa dwar it-tfittxija ta' pulena li kienet magħmula mid-deheb!

Il-karattru prinċipali u l-aktar interessanti huwa Lino. Lino huwa tifel ta' madwar għaxar snin. Huwa tifel kurjuż għaliex dejjem isaqsi! Nistgħu ngħidu li kien kuraġġuż għall-aħħar għaliex kien dejjem lest li jagħmel dak li hu meħtieġ. 

Hemm ukoll Ġorġ li jaħdem id f'id ma' Lino sabiex isolvu dan il-misteru ta' din il-pulena. Huwa kien tampar Lino u kien qatta' s-sajf man-nannu Indrin flimkien ma' Lino. Ġorġ ukoll joqgħod aktar attent minn Lino. Dejjem b'seba' għajnejn. 

Wara, kien hemm missier Lino li jismu Manwel. Dan kien hu li ddeċida li jmorru t-torri tan-nannu biex isiru jafu aktar dwar il-pulena, allura kien bniedem kurjuż ukoll.

Kien hemm ukoll in-nanna Indrin. Dan kien jgħix fit-torri, kellu qalbu tajba għax dejjem kien lest li jagħti. In-nannu kellu madwar tmenin sena iżda kien fuq tiegħu daqs farfett. 

Hemm ukoll karattru ħażin li jgħidulu żaru l-Għakkar. Dan lit-tfal qatt ma kien iħallihom jagħmlu xejn, dejjem kien jgħajjat magħhom fil-vojt. Iżda fl-aħħar tal-ktieb nindunaw li huwa persuna qalbu tajba u sinċier. Dan il-ktieb huwa ambjentat f'xifer il-Ħondoq. Il-post huwa dak li fih jinstab it-torri tan-nannu Indrin u li fih Lino u Ġorġ iqattgħu s-sajf fih. 

Lili l-aktar ħaġa li laqtitni kienet il-fatt li t-tfal kienu lesti li jagħmlu minn kollox sabiex isibu l-pulena tad-deheb, iżda mhux ser ngħidilkom jekk isibihiex jew le. Se nħallikom bil-kurżità sabiex taqrawh intom ukoll. Dan il-ktieb ġie stampat għall-ewwel darba fl-1971 u ġie ppubblikat minn 'Merlin Library.'

Anneka Pace (Form 2.3)

Thursday, February 26, 2015

Rakkont fit-tielet persuna

Lara u Sara, bniet tewmin ta' ħdax-il sena, qishom kelb u qattus, il-ħin kollu jiġġieldu. Kienu jitlewmu fuq kollox; dwar ta' min huma l-ġugarelli l-ġodda, dwar x'ħa jilbsu għal xi okkażjoni speċjali u l-aktar dwar l-ikel li għandha ssajjar ommhom. Fuq ħaġa waħda biss kienu jaqblu, l-imħabba li kellhom lejn il-ħemster. 

It-tnejn kienu jiftehmu kif għandhom jindukraw lill-ħemster iċ-ċkejken, lewn id-deheb li kellhom fil-gaġġa kbira fil-kċina. Imma xi kultant ix-xitan iħobb ideffer denbu. Hekk kif waslu mill-iskola, Sara bħas-soltu ppruvat titma 'l-ħemster, iżda dan ma deherx fil-gaġġa. Sara sejħet lil oħtha biex tistaqsi jekk kinitx messitu hi. 

F'radda ta' salib bdew iwaħħlu f'xulxin, jiġġieldu u jibku. Wara li kkalmaw xi ftit, Lara ndunat li kien hemm toqba fil-qiegħ tal-gaġġa. Bdew iqallbu l-kxaxen, il-bibien tal-armarju, il-bieba tal-kuker u tal-friġġ, qalb il-borom u l-kzazel, fost il-fliexken tal-luminata u tal-ilma minerali, iżda l-ħemster ma nstab imkien!

Sara waqfet taħseb ftit. Saqsiet lil oħtha jekk kienx baqa' xi ftit ġobon tal-ħakk li tant kien iħobb igerrem il-ħemster. Lara malajr indunat x'kellha f'moħħha oħtha. Fetħet beraħ il-bieba tal-gaġġa u poġġiet biċċa ġobon fiha. It-tewmin staħbew wara l-purtiera u ma damux jistennew. Il-ħemster ħareġ minn rokna li kien hemm fil-kċina u dritt daħal fil-gaġġa u beda jgerrem xi ħaġa. 

Fil-pront, Lara għalqet il-bieba u t-toqba tal-gaġġa. It-tewmin ma laħqux bdew jifirħu għax instema' l-bieb ta' barra jinfetaħ u ommhom dehret quddiem il-kċina. Ommhom saret ħamra nar u ma felħitx tlissen kelma. Xħin rat il-ħerba li kienu ħallew fil-kċina. 

Lara u Sara għamlu ġimgħa sħiħa mingħajr ġlied, għax kellhom inaddfu l-kċina u jaħslu l-platti kuljum wara l-iskola. Tiskanta xi kwiet kien hemm fid-dar. 

Myra Camilleri (Form 1.1) 
----------
Darba waħda kien hemm żewġ tfajliet żgħar; Mireille u Maria. Dawn kienu kuġini, iżda ftit kienu jqattgħu ħin flimkien. Darba waħda, in-nanna ddeċidiet li fil-vaganzi tal-Karival imorru ġurnata għandha. 

Meta waslu, in-nanna qaltilhom li ppreparat l-għaġina biex flimkien joqogħdu jsajru. Għoġbithom l-idea li joqogħdu jsajru flimkien għaliex il-ġenituri tagħhom ma kinux iħalluhom jaqilgħu l-ħmieġ. In-nanna ħalliethom kwieti u marret tonxor fuq il-bejt. Fejn kienu jafu li kienu ser jagħmlu ħafna praspar jinkitbu għand in-nanna? 

Marru jiġru ġol-kċina u sabu biċċa għaġina kbira u ftit ċikkulata. Mireille dewbet iċ-ċikkulata sakemm Maria fetħet l-għaġina. Fid-daqqa u l-ħin, Maria waqqgħet l-għaġina mal-art u meta ġabruha ndunaw li l-art kienet kollha titjir. Mireille ġabet biċċa tal-art u meta ħaslet, Maria żelqet u weġġgħet daharha. Miskina Maria, lanqas felħet tiċċaqlaq! Sa fl-aħħar irnexxielhom ilestu ftit pastini u tefgħuhom fil-forn. Xħin ġiet, in-nanna tgħidx kemm għajtet magħhom u għamlet ftit ingwent fuq dahar Maria. Ftit minuti wara, ftakru li kienu tefgħu l-pastini fil-forn! Xħin fetħu l-forn, iddiżappuntaw ruħhom għax il-pastini kienu nħarqu!

In-nanna ċemplet lil omm Maria biex joħduha għand it-tabib. Dan qalilha biex toqgħod jumejn fis-sodda. Minn dakinhar 'l hemm ma baqgħux isajru waħedhom. 

Mariah Sapiano (Form 1.2)
----------
Intagħżlu, intagħżlu biex jaħdmu ġo kċina! Dan wara li ħaddiema ta' restorant tkeċċew wara n-nuqqas ta' dixxiplina li wrew. 

Tonu u Pawlu, żewġ impjegati ġodda, sabu ruħhom ġo kċina mimlija mbarazz. Ommi ma, x'biża'! Kellhom jibdew mill-ġdid, jiżbarazzaw, inaddfu, jippustjaw u jorganizzaw. Dan kien ix-xogħol il-ġdid ta' Pawlu u Toni, iż-żewġ ħaddiema ġodda tal-kantina ta' Żeppi, magħruf ħafna għall-ikel bnin fiċ-ċentru taż-Żurrieq. 

Bdew billi żbarazzaw, ħaslu l-platti u tefgħuhom f'posthom. Ħaslu l-kċina, l-armarji u saħansitra l-art. Kienet biċċa xogħol diffiċli ħafna. Wara dan il-ħasil kollu, il-kċina ta' Żeppi kienet imqaxxra bi fwieħa li toqtlok. 

Insomma, kienet esperjenza ta' xogħol ġdid. Kienet kerha ħafna, iżda min qatt ħaseb li Pawlu u Toni kellhom iqattgħu ħajjithom jaħdmu hemm? 

Esperjenza kerha li għall-ewwel dehret impossibbli, iżda bil-paċenzja li ħadu fil-bidu tal-karriera, kienet il-frott tal-futur tagħhom. Għadda ħafna żmien u li kienet dehret esperjenza tal-waħx, kienet imsarrfa f'esperjenza ta' opportunità ta' xogħol. Qatt taqta' qalbek meta tiġi ħażina, xi darba tiġik tajba! Toni u Pawlu kienu saru l-aqwa koki fil-kantina ta' Żeppi. Bil-paċenzja tagħmel kollox u tirnexxi.

Ruth Attard (Form 1.3)

Wednesday, January 28, 2015

Ittra informali

35, "Il-Girna,"
Triq il-Kappar,
Ħ'Attard,
ATD 2283

Il-21 ta' Jannar, 2015


Għażiża Hanna, 


Kif int? Nispera li tinsab tajba. Jiena ninsab tajba iżda qed nibża' ftit għax l-eżamijiet se jibdew ġimagħtejn oħra u minħabba f'hekk irrid nistudja ħafna. 



Kif diġà taf, jien kelli għeluq snini l-ġimgħa l-oħra u issa għandi tnax-il sena. Meta kont wasalt mill-iskola, id-dar kienet dlam ċappa u meta ftaħt il-bieb biċ-, f'daqqa waħda rajt 'il-familja kollha quddiemi bid-dekorazzjonijiet fid-dar. Tgħidx kemm fraħt u din kienet l-akbar sorpriża tiegħi f'ħajti! Ftit wara, il-ġenituri tawni biljett tal-ajru għal Pariġi, fejn toqgħod inti. 


Jien għannaqt lill-ġenituri tiegħi u issa fis-sajf se niġu narawkom. Dan ir-rigal kien sorpriża oħra! Iġri jiġi s-sajf ħalli niltaqgħu!


Dejjem tiegħek,

Lara.

Lara Agius - Form 1.3

----------

8, Triq l-Iskola,
Ħaż-Żebbuġ,
ŻBĠ 3210

L-20 ta' Lulju, 2015

Għażiża Christianne,

Kemm għandi xi ngħidlek! Ilbieraħ naħseb li kienet l-isbaħ ġurnata ta' ħajti! Ma stajtx ma niktiblekx fuq dak kollu li ġara.

Ilbieraħ, bejn is-siegħa u s-sagħtejn ta' waranofsinhar, wasalt id-dar mil-lezzjoni tal-pjanu u sibt kaxxa daqxejn kbira tistennieni fuq il-mejda tal-kċina. Fuqha kien hemm miktub il-kliem 'Għal Thea'. Mimlija eċitament, ftaħt il-kaxxa u ġewwa kien hemm ġeru rieqed ġol-kaxxa b'ċoff aħmar imdawwar m'għonqu. 

Dak il-ħin kont ser intir bil-ferħ! Bdejt nipprova nsiblu isem u peress li l-ġeru kien abjad silġ, iddeċidejt li nsemmih Silġa. Bħalissa, waqt li qiegħda niktiblek, Silġa qiegħed jieħu nagħsa fuq is-sufan. Nispera li nerġa' nisma' mingħandek!

Dejjem tiegħek,
Thea. 

Thea Bugeja - Form 1.2
----------

9, Triq ix-Xemx, 
Ħal Muxi,
ĦMX 1234

Il-11 ta' Jannar, 2015

Għażiża Darelle, 

Kif inti? Jien kollox sew. Bħalissa għaddejja bir-reviżjoni għall-eżamijiet.

Għandi aħbar sabiħa għalik. Għal għeluq snin l-ġenituri tiegħi tawni ġeru tar-razza husky. Taf kemm dejjem xtaqt wieħed u tgħidx kemm fraħt meta rajtu. 

Il-kelba għandha xahar u semmejtha Tikka għax għandha ħafna tikek. Għandha għajnejha blu u hija sewda bl-abjad. Diġà qiegħda titgħallem xi affarijiet. Dejjem tkun qiegħda tistennieni ġejja lura mill-iskola u wara li niekol neħodha dawra żgħira. Ommi tlesti l-ikel għaliha.

Meta nerġgħu niltaqgħu tkun tista' toqgħod tilgħab magħha u mmorru passiġġata ma' Tikka flimkien. Sellili għall-familja tiegħek,

Dejjem tiegħek, 
Abby. 

Abby-Gayle Magrin - Form 1.1

Sunday, January 25, 2015

Wednesday, January 21, 2015

Ittra Formali


23, Triq il-Ħobż, 
Ħal Kirkop,
KKP 0731

L-14 ta' Jannar, 2015

Skola Sekondarja ta' Santa Dorotea, 
Triq l-Imdina, 
Ħaż-Żebbuġ

Għażiża Sor Maronna Farrugia, 

Nispera li tinsab tajba. Xtaqt niktiblek ittra biex nilqgħak fl-iskola tagħna. Ferħana ħafna li inti l-kap il-ġdida tal-iskola. Jiena ninsab ċerta li ser tmexxiha tajjeb!

Bla dubju ta' xejn naf li qed tidhra 'l-għalliema, il-klassijiet u anki forsi xi ftit, lill-istudenti wkoll. Nispera li dan ix-xogħol, ta' kap tal-iskola, huwa għal qalbek. Naħseb li tgħodd bħala esperjenza sabiħa ħafna, hux hekk?

Issa aħjar nieqaf hawn u nħallik tkompli b'xogħlok, jien għandi bżonn inkompli l-istudju wara kollox, għax l-eżamijiet kważi waslu! Nawguralek suċċess fil-ħidma tiegħek. 

Saħħiet, 
(Firma)
Kym Abela. 
----------

48, Triq Santa Katerina, 
Ħ'Attard,
ATD 2608

It-13 ta' Jannar, 2015

Skola Santa Dorotea,
Triq l-Imdina,
Ħaż-Żebbuġ,
ŻBĠ 1905

Għażiża Sor Maronna Farrugia,

F'isem l-istudenti tal-klassi Form 2.2, nixtieq nifraħlek u nawguralek għall-kariga ġdida bħala kap tal-iskola sekondarja ta' Santa Dorotea li inti ġejt fdata fiha. Nixtiequ nilqgħuk fostna u ngħinuk tambjenta ruħek fl-iskola tagħna. 

Jiena u sħabi konvinti li inti ser tkun kapaċi twettaq ix-xogħol tiegħek b'kapaċità u abbiltà professjonali. Aħna lesti li nagħtuk kull għajnuna meħtieġa sabiex tkun tista' tmexxi l-iskola fid-direzzjoni t-tajba. Aħna tassew nemmnu li inti ser tkun kapaċi toħloq atmosfera mill-isbaħ fl-iskola. 

Ser inwegħduk li ser nagħmlu minn kollox biex napprezzaw u nuru rispett lejn ix-xogħol tiegħek. Inżommuk dejjem fit-talb tagħna. 

Tislijiet, 
(Firma)
Rachel Zammit. 
----------

48, "The Atrium,"
Triq San Mikiel,
Iż-Żurrieq,
ŻRQ 2106

Il-25 ta' Jannar, 2015

Skola Santa Dorotea,
Triq L-Imdina, 
Ħaż-Żebbuġ,
ŻBĠ 1905

Għażiża Sor Maronna Farrugia,

Qed niktiblek din l-ittra biex nawguralek l-ikbar suċċess għal din il-kariga ġdida bħala kap tal-iskola sekondarja ta' Santa Dorotea.

Kif taf, tmexxi skola mhix ħaġa żgħira, hija biċċa xogħol iebsa u għaldaqstant naħseb li tinsab kburija li afdawlek din ir-responsabbiltà. Jien ninsab ċerta li suċċess se jkollok żgur. Qatt taqta' qalbek għax appoġġ ser issib ħafna, speċjalment mingħand l-għalliema u kif ukoll mingħandna l-istudenti. 

Qabel ma nagħlaq din l-ittra, nixtieq nissuġġerilek biex iżżomm lil Santa Pawla f'qalbek ħalli 'ttik is-saħħa u d-dehen li tmexxi din l-iskola. 

Tislijiet,
(Firma)
Anthea Camilleri. 


Thursday, January 8, 2015

Komponiment Deskrittiv

Bħalissa qiegħda f'esebizzjoni tar-ritratti tal-Għaqda tal-Fotografija, il-Belt. Ninsab hawn man-nannu għaliex daħħal xi ritratti għal din il-kompetizzjoni. Għadni kif għaddejt minn quddiem ritratt vera partikolari u għalkemm jidher biċ-ċar li meħud f'ambjent fittizju, fil-fehma tiegħi huwa r-ritratt rebbieħ.

F'dan ir-ritratt, bħala karattru ewlieni nsibu tifla ta' madwar għaxar snin. Din għandha xagħarha iswed tuta miġbur b'żewġ malji żgħar, u frenża qasira li tasal sa nofs moħħha. Wiċċha għandu dehra ta' tifla mqarqċa u għandha par wardiet ħomor peprin. Liebsa libsa ta' lewn vjola u minn taħt għandha flokk irrigat, abjad bl-iswed. Għandha kalzetti twal u ħoxnin ta' lewn iswed, u żarbun tad-ditta "Uggs" kulur vjola ċar, bil-fur abjad. 

Din it-tifla kienet qiegħda taqra ktieb, imma mid-dehra marret għajnha biha għaliex tinsab rieqda raqda fil-fond, fuq siġra partikolari. Fuq iz-zokk ta' din is-siġra, wieħed isib fjuri kkuluriti b'ħafna lwien differenti. Fost dawn l-ilwien kien hemm l-aħmar, iċ-ċelesti, l-iswed u l-aħdar. Dawn il-fjuri jidhru li huma mpinġijin fuq iz-zokk. Din is-siġra għandha weraq lewn roża jixgħel. Għandha wkoll l-ispag nieżel bil-qlub żgħar bi lwien differenti mwaħħlin magħhom. Id-dawra ta' dawn il-qlub hija ta' kulur blu skur. Din is-siġra tinsab fis-sħab fejn hemm ukoll spirali tondi ta' kulur roża. 

Jiena naħseb li din l-istampa hija ambjentata fid-dinja tal-ħolm, fejn kollox huwa perfett u trankwill. Nispera li ħadt gost taqra din id-deskrizzjoni ta' dan ir-ritratt li tant għoġobni. 

Cherise Cauchi (Form 2.1)
----------

Minn Ottubru li għadda, jiena bdejt immur il-librerija tal-iskola kull nhar ta' Ġimgħa fil-ħin tal-brejk. Dan għaliex bdejt ngħin lill-għalliema li tieħu ħsieb il-librerija. 

Darba minnhom waqt li kont qiegħda nirranġa l-kotba fuq l-ixkafef, waqa' ktieb mal-art u minnu ħarġet paġna li fuqha kellha stampa ta' tifla rieqda fuq zokk ta' siġra kbira li kienet taqbeż is-sħab. Mal-friegħi tas-siġra kien hemm imdendlin għadd kbir ta' qlub żgħar taċ-ċikkulata. Din l-istampa qatt ma kont rajtha sa dakinhar u għalhekk warrabt il-ktieb biex nisselfu u naqrah. Waħħalt il-paġna f'postha u dakinhar stess wara li lestejt ix-xogħol għad-dar tal-iskola, bdejt naqrah b'interess kbir. 

L-istorja kienet dwar tifla ta' sitt snin li jisimha Katrina li darba minnhom waqt li kienet qed taqra l-ktieb Jack and the Beanstalk, marret għandha biha u ħolmot li kienet hi li kienet titla' mas-siġra għolja sa fuq is-sħab, kif kien jagħmel Jack. Il-qlub taċ-ċikkulata li kien hemm mas-siġra ġabrithom biex tqassamhom lil sħabha tal-istitut lejlet il-Milied. Lit-tfal orfni qatt ma kienu jagħtuhom ħelu jew ċikkulatini u l-ħolma ta' Katrina kienet li xi darba hi jkollha biżżejjed flus biex tixtrilhom u tqassmilhom ħelu u ċikkulatini għall-Milied. 

Meta Katrina stenbħet mir-raqda, sabet li fuq il-gradenza fil-kamra tagħha kien hemm borża kbira li meta fetħitha sabet li kienet mimlija sa fuq bi qlub taċ-ċikkulata li jien kont rajt fl-istampa tal-ktieb li ssellift mill-iskola. Tgħid kienet il-qalb tajba ta' Katrina li kienet bidlet ix-xewqa tagħha f'realtà?

Michela B. Soler (Form 2.2)
----------

Lara kienet qed taqra ktieb tal-fantasija dwar tifla normali li kienet qed taqra ktieb u f'ħakka t'għajn spiċċat f'dinja oħra. Kienet ilha taqra, għajjiet u raqdet. 

Meta qamet mir-raqda sabet ruħha f'dinja oħra kompletament differenti. Kienet liebsa libsa roża u vjola tleqq. Kienet bilqiegħda fuq zokk mimli fjuri bojod u sofor ifuħu ħafna iktar mis-soltu. Miz-zkuk kien hemm il-qlub imdendlin kollha kuluri differenti; aħmar, blu, isfar, oranġjo - minn kollox! Is-siġra kienet qisha qed tistrieħ fuq dak il-ħelu li qisu tajjar, imma minflok f'forma ta' qawsalla u bil-kuluri kollha tal-qawsalla. 

Lara qamet minn fejn kienet bilqiegħda u bdiet tipprova tiskopri fejn kienet waslet għax l-aħħar li kienet taf kienet qiegħda fis-salott tan-nanna. Wara ftit iddur u tara x'hemm, ħarġet bil-konklużjoni li kienet qed toħlom ħolma li vera ħassitha reali. Sabet li l-qlub kienu ħelu b'togħmiet differenti! Ma kien hemm ħadd ieħor - kienet waħedha f'dinja għaliha, litteralment! Skopriet li kien hemm ħafna postijiet fejn tmur - allura qgħadet iddur ftit. 

Skopriet li kien hemm funtana taċ-ċikkulata u bdiet tiekol minn hemm. Iċ-ċikkulata kellha togħma tajba wisq! Kien hemm minn kull tip ta' ċikkulata, anki ċikkulata vjola kont issib. Il-funtana kienet enormi - kellha titla' fuq ħelwa ħadra u roża biex tilħaqha. 

Il-ħin beda għaddej u bejnha u bejn ruħha kienet qed tħossha għajjiena. Rat bieb kbir iktar mis-soltu u daħlet fih. Bdiet tisma' ħoss ta' mużika klassika ġej minn kullimkien. Sabet ruħha f'teatru u kien hemm ballerini libsin kostumi sbieħ ħafna. Kienet qed tarahom jiżfnu perfett.

F'daqqa waħda, Lara ħassha ħażin u waqgħet mal-art. Bdiet tara kollox idur u f'daqqa waħda sabet li kienet id-dar tagħha. X'kien ġara? Fejn kienet marret? Għadha ma tafx sal-lum! 

Alicia Schembri (Form 2.3)