Saturday, December 10, 2011

Awguri

Nixtieq nawgura l-Milied it-tajjeb lil kulħadd...


                                                          Ms Deandra

Tuesday, December 6, 2011

Poeżija: Mixja

Mort il-Mellieħa,
Bil-ferrovija,
Tlajt l-Imqabba,
U kien hemm festa tal-imħabba!


Mxejt sa Ħal Qormi,
U kkumpanjatni ommi,
Ġrejt sax-Xemxija, 
Meta x-xemx kienet qawwija!


Kemm ħadt gost, 
Għalhekk mort il-port,
Mort bit-taksi,
Mal-kelb tiegħi Backsey!


Mort il-Baħrija,
Għamlet ix-xita tal-ħamrija,
Tlaqt il-Ħamrun,
U kilt platt imqarrun!


Mort San Ġiljan, 
U kien hemm wirja tal-injam,
Tlaqt il-Fgura,
U tgħidx kemm domt inżurha!


Tkellimt man-nanna,
U ltqajt ma' naħla,
Iċċajtajt ma' ziti,
U ħaditli b'idi!


Imxejt fis-sħana, 
U sirt għarqana xraba,
Kien hemm ir-riħ tat-Tramuntana,
U qisha ġiet fuqi funtana. 


Mort lura d-dar,
B'qalb ferriħija,
U għalhekk,
Ktibt din il-poeżija. 


Deborah Minuti (Form 1.1)
---------------------------------------------------------------------------------------------
Lulju li għadda
jiena mort,
kif ser ngħidilkom 


Vapur qbadna
minn ġewwa l-port,
wara li wrejnihom
il-passaport.


Postijiet rajna
postijiet morna,
u tgħidx kemm stordejna
għax aqta' kemm dorna. 


Xemx filgħodu
xemx filgħaxija,
konna niġru
daqs żwiemel tat-tiġrija. 


Kristansund u Alesund
Bergen u Flam. 
Ġrejna minn post għall-ieħor
mingħajr ma rajna dlam. 


La tara trabb
la tara ħmieġ,
imxejt bil-kalzetti 
stajt mort tieġ.


Ġmiel naturali
sema kaħlani, 
tlajna muntanji
b'basket fuq dari.


Ħlomt u dħakt
mingħajt ma ddejjaqt,
il-ġita ta' ħajti
li dejjem xtaqt. 


Ommi u missieri
ħija u jien, 
nerġgħu nsiefru
darb'oħra flimkien!


Amy Vella (Form 1.2)
---------------------------------------------------------------------------------------------
Is-sajf li għadda, 
il-Ħadd filgħodu,
morna mixja x-Xgħajra,
kulħadd kien liebes komdu. 


Mort mal-familja, 
ġew in-nanniet,
il-kuġini, il-kelb
u anki z-zijiet. 


Tlaqna lejn il-baħar,
imxejna fuq il-blat. 
Tlajna u nżilna,
minn bosta triqat. 


Fil-pront rajna l-bandli.
Kien hemm ħafna tfal, 
jien, oħti u l-kuġini morna,
b'saqajna ftit tqal. 


Wara ftit ħin,
li qattajna nilagħbu, 
mxejna għall-fortizza 
fejn fl-antik iġġieldu mal-għadu. 




In-nannu beda jispjega, 
dwar l-istorja tal-post. 
Daħħalna fil-kmamar,
tgħidx kemm ħadna gost.


Wara striħajna ftit,
għax tgħidx kemm għajjejna. 
Ftaħna l-aptit,
kilna ħobż u biċċa ġbejna.


Kien sar il-ħin,
biex immorru lura.
Ftehmna li niġu fix-xitwa,
biex naraw aktar ħdura. 


Abby Bonello (Form 1.3)

Stampa.


     Tifla iltiema, l-uniċi ħbieb veri li kellha kienu l-kotba. Kienet miexja fi trejqa li tgħaddi għal ġol-wied tal-ħolm. Hemmhekk ħadd ma kien imur għax jgħidu li min jidħol hemm qatt ma kien jiġi lura. Ħafna nies kuraġġużi kienu marru jippruvaw isibu l-verità iżda ħadd minnhom ma mar lura d-dar. 
     Bil-ktieb f'idejha, it-tifla daħlet ġol-wied u bdiet timxi sakemm sabet passaġġ misterjuż. Baqgħat timxi sakemm fl-aħħar lemħet siġra, waħedha, imdawra bil-ħaxix ħażin u fjuri mejta. Fuqha kienu ġejjin raġġi tax-xemx li dawlu l-post kollu. 
     Intefgħet taħt is-siġra għad-dell tagħha u bdiet taqra l-ktieb. Wara xi ftit minuti, għalqet għajnejha u raqdet. F'radda ta' salib kullimkien inbidel. Il-ħaxix u l-fjuri mejtin tbiddlu ġo tapit aħdar tal-ħaxix, imnaqqax 'l hawn u 'l hinn bil-ħmura tal-pepprin. Ix-xemx kienet saħħnet sewwa u l-qtar tan-nida fuq il-ħaxix kienu jleqqu qishom frakk tal-fidda. 
     Bdiet tħossha fil-ġenna tal-art, ħassitha kuntenta. F'daqqa waħda minn fuq il-friegħi tas-siġra bdew niżlin ritratti tagħha ta' ħafna żmien ilu ta' meta hi kellha madwar ħames snin. Rat lil ommha u lil missierha li bħalissa kienu qegħdin igawdu l-ġenna mal-Mulej. Semgħet biki ta' tifla u għalhekk qamet u marret tara minn fejn kien ġej dan il-ħoss. Rat tifla mal-art, mitlufa u waħedha. 
     Fil-bogħod, hi u kif ukoll it-tifla, raw żewġ persuni resqin lejhom li dehru qishom ommha u missierha. Meta dawn resqu viċin, indunat li kienu huma u għalhekk telqet tiġri tgħannaqhom u bdiet tibki bil-ferħ. Fl-aħħar għexet il-ħolma li dejjem xtaqet, dik li tiltaqa' m'ommha u missierha. 
     Ommha qaltilha li dik it-tifla kienet oħtha u ma dawk il-kliem, it-tifla qamet mir-raqda. Sabet ritratt tal-familja kollha f'nofs il-ktieb u bejn il-paġni li kienet qed taqra. 

Miriana Attard (Form 2.1)
----------------------------------------------------------------------------------------------
     O kemm hi sabiħa l-immaġinazzjoni. Santwarju personali, tiegħek biss u ta' ħadd aktar. L-aktar magna impressjonanti fid-dinja hi l-immaġinazzjoni u nista' ngħid bla mistħija li mhux l-ewwel darba li ġriet bija...
     Mela darba kont ġejja lura mill-iskola bla flus, bla kotba u bl-uniformi mqatta'. Din ma kinitx l-ewwel darba li wasalt id-dar f'dan l-istat. Biex inkun onesta, din saret tiġri kważi kuljum. Kien hemm grupp ta' tfal kbar l-iskola tiegħi li wara li tispiċċa l-iskola kienu jduru miegħi, jisirquli l-flus u l-basket jixħtuhuli mal-art. Sa fejn naf jien, ma kienu jagħmluha għall-ebda raġuni partikolari. Meta kont niftaħ qalbi ma' xi għalliema dawn kienu jinjorawni għax jiena ma kontx xi tifla żgħira. 
     Allura, b'danakollu, sirt niftaħ qalbi biss ma' xi ħadd li żgur qatt ma jieqaf jisma' l-problemi tiegħi. Dan ix-xi ħadd huwa d-djarju. Dan id-djarju huwa ktejjeb tan-noti ppersonalizzat li kont qlajt għall-Milied. Il-ktejjeb kien maħdum biex meta jispiċċawlu l-karti, jkun jista' jerġa' jimtela' mill-ġdid. Dan l-oġġett sempliċi kien l-aktar ħaġa għal qalbi fid-dinja. 
      F'dan id-djarju tiegħi, kont nikteb dwar l-avventuri li kienu jseħħu ġewwa moħħi. F'dawn l-avventuri, jien kont nagħmel affarijiet li ma noħlomx li nagħmilhom fir-realtà. Kont inkanta u nirreċta, naqra u nitkellem quddiem ħafna nies, inbeżża' l-"bullies" u ħafna affarijiet oħra. Kont nagħmel dan kollu bil-biżgħa f'din id-dinja li kont ħloqt f'moħħi. Li kieku biss ħajti kienet veru hekk...
      Din l-istampa tfakkarni fid-dinja li ħloqt bil-mod il-mod f'moħħi, fl-immaġinazzjoni. Ikkulurita, sabiħa, u tiegħi biss. 

Mariah Farrugia (Form 2.2)
----------------------------------------------------------------------------------------------
     Għodwa waħda, Kristina kienet miexja fil-kampanja bix-xemx tiżreġ fuqha. Tant kien hemm sħana li Kristina marret tistrieħ ma' siġra. Fi ftit sekondi marret għajnha biha u raqdet. 
     Kristina bdiet toħlom. Ħolmot li rat tfajla ċkejkna miexja lejha. Kristina marret tkellem lil din it-tifla u wara xi mumenti ta' diskussjoni skopriet li jisimha Sinjorina Ċetta, imbagħad ħadu grazzja ma' xulxin u riedet turiha r-raħal tagħha. 
     Meta waslu fir-raħal, Kristina rat bejjiegħa jbiegħu l-frott u ħafna nies u annimali jiżfnu b'mużika ħelwa li kienet għaddejja. Kristina marret tiżfen magħhom u Ċetta ngħaqdet magħha wkoll. F'daqqa waħda Kristina waqfet tħares mistgħaġba lejn il-palazz tar-Re Oraldu. Dan kien fl-agħar tiegħu għax kien ħarab priġunier mill-ħabs u kien se jmur joqtol ħafna nies u għalhekk, ir-responsabiltà kienet waqgħet kollha f'idu. Kristina staqstietha jekk setgħux jidħlu ġewwa u Ċetta mill-ewwel aċċettat. 
     Meta daħlu, Ċetta qaltilha li kellha aċċess għal kullimkien għax kienet l-unika neputija tiegħu. Ċetta riedet turiha kamra li l-familja tar-re biss kienet taf biha, allura staħbew u meta sabu ċ-ċans daħlu ġewwa. Kristina baqgħet b'ħalqha miftuħ u skopriet l-għaliex il-familja tar-re biss kienet taf dwar din il-kamra. Ġewwa din il-kamra kien hemm statwi ta' nies tal-ġebel. Kien hemm nies ta' kull età; tfal, adulti u anki anzjani. Ċetta qalet li dawn xi darba kienu skjavi li m'obdewx lir-re, allura biddilhom fi statwi tal-ġebel. F'daqqa waħda semgħu ħoss stramb u l-istess priġunier li kienu qegħdin ifittxu ġie, qabad lil Ċetta u ħadha. Kristina ma kinitx taf x'se taqbad tagħmel bil-biżgħa li kellha, li qabdet tiġri daqskemm felħet, sakemm tfixklet f'sieqha u waqgħet. 
     Kristina b'qatgħa kbira qamet. Indunat li dak kollu li kien ġralha kienet biss ħolma u ma kien xejn minnu. 

Nicole Agius Markham (Form 2.3)

Thursday, November 24, 2011

Ix-xwejħa, ġara tagħna.

    Fost il-ġirien tat-triq tagħna l-aktar li nammira hi Ċetta, ix-xwejħa armla ta' Żeppi l-iskarpan. Dejjem magħluqa ġewwa, ħlief għal meta toħroġ tixtri l-affarijiet ta' kuljum. 
      Meta toħroġ, dejjem taraha bil-libsa tal-wegħda li ħmaret biż-żmien u bil-ġewlaq safrani li naħseb li wirtitu mingħand l-antenati tagħha. Kull meta tkellimha dejjem b'dik id-daħka fuq fommha u l-ħin kollu tiċċajtha. Niggustaha ħafna meta titkellem b'dak l-aċċent Mqabbi. Dejjem tqum għall-ewwel quddies tal-ġurnata. Din Ċetta għandha għajnejha żoroq, wiċċha safrani u magħdur bl-inkwiet li ġarbet b'żewġha li kien miet fil-gwerra. Wiċċha kollu mkemmex, jixhed l-età tagħha u għalkemm ma tgħidx kemm għandha żmien, naħseb li qorbot it-tmenin.
     Għandha dar antika b'ċeru fdalijiet tal-antik. Ġod-dar għandha ħafna affarijiet tal-fidda u tad-deheb. Id-dar iżżommha xummiema. Ħafna drabi tistedinna għall-Milied u ġieli nistednuha. Tħobb issajjar ħafna u l-ikel tagħha dejjem bnin. Kull meta mmur għandha dejjem tħaddanni magħha  għax tqisni bħala bintha u dejjem wara xi ikla tajba, ma tonqosx xi naqra imbuljuta u xi naqra kafè tajba, kif taf tagħmel hi. Għandha ġnien daqs dinja, fih kull tip ta' pjanti. Għandha wkoll ħafna annimali bħal qtates, klieb, għasafar u ħafna oħrajn. Hi tgħid li din il-familja tagħha. 
    Ċetta għandha binha msiefer u rari jiġi Malta biex iżurha. Iżda dejjem jibgħatilha kartolina b'xi flus u xi ritratti tat-tfal li għandhom xi madwar sebgħa, tmien snin. Ċetta dejjem xtaqet li tmur tara lit-tfal tat-tfal tagħha. Għalkemm m'għandhiex ħafna ħbieb, xorta ssellem lil kull min tara. 
     Ċetta għandha qalbha tad-deheb u dejjem lesta li tgħin lil ħaddieħor bil-mod li tista'. Kemm hi ħelwa Ċetta tagħna! 

Kimberly Spiteri (Form 2.1)
---------------------------------------------------------------------------------------------
     Eżatt faċċata tiegħi, toqgħod mara xwejħa mar-raġel tagħha. Dawn għandhom żewġt itfal kbar. Ix-xwejħa jisimha Ġola. Tħobb ħafna lit-tfal iż-żgħar. 
      Ġola hija qasira ħafna. Hi għandha xagħarha griż u għajnejha blu. Għandha karattru veru ħelu. Dejjem ikollha tbissima fuq wiċċha u taf iddaħħak lin-nies. Tgħidx kemm tħobb tirrakkonta xi stejjer ta' meta kienet għadha żgħira. Il-ħwejjeġ li tkun liebsa dejjem b'kuluri vivaċi. Ir-raġel tagħha wkoll. Bħal ma jgħidu, Alla jxebbaħ qabel ma jlaqqa'. Kull meta joħorġu mid-dar, dejjem ikunu puliti. 
      Ġola tħobb tħit. Għandha talent sabiħ għax hi tagħmel id-dvalji tal-bizzilla biċ-ċombini. Din is-sengħa jagħmluha fl-antik u ma tantx għadek issib minnhom illum il-ġurnata. Allura veru taffaxxinani. Hi tħobb tagħmel il-faċendi. Id-dar tagħha dejjem tkun pulita u kollox ikun f'postu. Għandha qalba tajba u kull meta tarani tistaqsini għandix bżonn xi ħaġa jew tagħtini xi ċikkulata. Tħobb toħroġ timxi għax għadha fuq ruħha. Meta ma jkollhiex x'tagħmel toħroġ barra u toqgħod bilqiegħda tistenna biex jgħaddi xi ħadd ħalli toqgħod tpaċpaċ miegħu. Mhux l-ewwel darba li taqbad tparla ma' xi ħadd li lanqas biss tafu jew tafha. 
      Tħobb ħafna lit-tfal għax tirrispettahom u anki lit-tfal tat-tfal, il-ħin kollu tbushom u tgħannaqhom magħha. Ġola tħobb tisma' r-radju kuljum u tgħid ir-rużarju miegħu. Ir-raġel tagħha jgħidu magħha. Ġola għandha karattru tal-ġenn u tingwalaha ma' kulħadd. Tħobb tgħin u tagħmel dak li tista' għal ħaddieħor. 
      Jien naħseb li kulħadd għandu jkun bħalha u vera nammiraha għal dak kollu li tagħmel. Ma nafx x'nagħmel mingħajrha! 


Marie Claire Scerri (Form 2.2)
---------------------------------------------------------------------------------------------
     Xwejħa grazzjuża li toqgħod ma' ġenbna u għandha sitta u sittin sena; jisimha Maria Dolores. 
      Maria-Dolores għandha xagħarha abjad qottna, qisu silġ li għadu kemm waqa' mit-twieqi tal-ġenna, u maqtugħ qasir. Għajnejha kbar, kannella skuri b'linja ċelesti u madwarhom, li dejjem jagħtu l-emozzjonijiet tagħha ta' dak il-ħin. Tkun qisek qed tidħol ġo fiha permezz t'għajnejha u tara x'inhi tħoss. Għandha xofftejha żgħar, roża skuri, lewn il-frawli u kull darba li tidħak tifforma toqba fuq ħaddejha. Imneħirha dritt u pulit u l-kulur ta' wiċċha lewn id-deheb għax ħaditha x-xemx. Il-ferq ta' xagħarha dejjem tippettnah fuq in-naħa tal-lemin, u tħobb tilbes mill-aqwa kull fejn tmur. Maria Dolores ikollha tbissima fuq wiċċha. Hi mhijiex irqiqa stikka u miskina xi ftit ta' snin ilu taha attakk tal-qalb u allura ma tistax iċċaqlaq idejha tax-xellug.
      Doris (għax hekk ngħajtulha aħna fil-qasir) għandha familja kbira u li tieħu ħsiebha. Għalkemm m'għandhiex tfal u toqgħod waħedha, ġieli t-tfal tat-tfal ta' ħutha jmorru jorqdu għandha u jqattgħu xi żewġt iljieli wara xulxin hemmhekk. Erba' darbiet f'ġimgħa, il-familjari tagħha jmorru jżuruha u ġieli jsajrulha xi dixx imqarrun jew xi borma brodu sħuna, jew anki ġieli xi kejk tal-lewż. Din ix-xwejħa dejjem kuntenta u ma tgergirx, u tagħmel minn kollox biex tferraħ lin-nies. Dejjem tieqaf issellmilna meta tarana, u tixtrilna xi biċċa ċikkulata. Doris dejjem tgħid li qalbha kbira biżżejjed għal kulħadd u tixtieq tgħin lil kull min hu fil-bżonn. 
     Għażilt li nitkellem fuq din ix-xwejħa partikolari għax ilsienha taz-zokkor. Hi vera ġeneruża u twajba u qisha anġlu miexja fuq l-art! 


Liesel Cuschieri (Form 2.3)

Wednesday, November 16, 2011

Avventura f'dinja oħra.

     Kevin u Maria kienu tewmin u kellhom tlettax-il sena. Ommhom kienet għalliema u missierhom avukat. 
     Darba waħda Kevin u Maria kienu qegħdin jilagħbu fuq il-kompjuter. Meta semgħu ħoss ġej mill-kantina, il-kurżità għelbithom u niżlu biex jaraw x'kien dak il-ħoss. Hekk kif fetħu l-bieb, ġiet tromba tal-arja li ġibdithom 'il ġewwa fid-dlam. Imwerwrin u sturduti sabu ruħhom fi pjazza mdawra b'nies libsin bħal mostri u sħaħar. 
     F'daqqa waħda dehret mara liebsa normali u staqsiethom minn fejn kienu ġew. It-tfal qalulha li kienu minn Malta u staqsewha fejn kienu jinstabu. Il-mara li kien jisimha Mardie u li kienet saħħara qaltilhom li kienu jinstabu f'Martaw. Mardie ħadet lit-tfal id-dar tagħha u spjegatilhom li hi fil-verità kienet zijithom u li ommhom kienet ukoll saħħara, imma għażlet li tmur tgħix fid-dinja tal-umani. Maria u Kevin baqgħu mistagħġba hekk kif skoprew li huma wkoll kienu sħaħar. 
     Iz-zija qaltilhom biex jgħinuha għax kien hemm min ried jeqred id-dinja ta' Martaw. It-tfal aċċettaw. Flimkein maz-zija marru jixtru l-ingredjenti li kellhom bżonn biex jagħmlu t-taħlita maġika. 
     Meta waslu d-dar ħawdu l-ingredjenti ġo borma fuq in-nar u z-zija bdiet tgħid xi kliem maġiku. Meta t-taħlita kesħet, iz-zija qabdet żewġ stikek tal-maġija u tathom lit-tfal. Tefgħat it-taħlita ġol-istikek. Kellhom kollox lest ħlief li jitgħallmu s-sentenza maġika qabel ma jattakka l-għadu. 
     F'daqqa waħda nstema' ħafna twerżiq u għajjat. Tgħid kien wasal l-għadu? It-tfal laħqu tgħallmu kliem maġiku? Irnexxilhom isalva lil Martew? U t-tfal marru lura d-dar tal-ġenituri tagħhom? 

Mattea Maresca (Form 1.1)
---------------------------------------------------------------------------------------------
     Darba minnhom sebaħ jum sabiħ bis-sema ikħal nir. Is-sħab kien qisu numru t'anġli jittajru u l-għasafar ipespsu melodiji sbieħ. Kien jum ta' sħana wkoll u għalhekk Jade u l-familja tagħha marru sal-Miżieb fejn kien hemm it-trankwilità. 
      Il-kuġini ta' Jade kienu kollha żgħar. Jade ma kellhiex aptit tilgħab noli jew dawra-durella għaliex kienet kbira għal dal-logħob. Minflok marret passiġġata. Rat siġra li kienet differenti mill-oħrajn għax kellha forma ta' wiċċ fuqha. Jade resqet lejha, ħadet nifs u nfetaħ il-bieb. Ovvjament Jade daħlet. Rat kullimkien silġ! Kien hemm ukoll xadini bl-ingravajjet u n-nuċċalijiet! Kien hemm bettiegħ mas-siġar, fniek u qtates jixxemxu!
        Min jaf xi bdiet taħseb Jade! F'daqqa waħda ġiet xadina tkellimha bil-lingwa Maltija u b'aċċent Franċiż. Bdiet tgħidilha li Jade qiegħda f'periklu u li trid titlaq minn hemm. Ix-xadina sparixxiet u Jade ma kinitx taf x'ser taqbad tagħmel. Jade qagħdet taħseb fuqha, imbagħad gie iljun b'kuruna fuq rasu u staqsieha x'qed tagħmel fid-dinja tiegħu. Jade spjegatlu kollox iżda l-iljun m'emminiex u ħadha l-ħabs. Il-ħabs kien normali, iżda minflok kollox kien griż u vjola!
       Kienet diġà niżlet ix-xemx u Jade bdiet tinkwieta. Ħarset lejn it-tieqa l-vjola taċ-ċella u rat kokka fuqha. Din il-kokka kellha miktub 'Għaref' fuq moħħha. Il-kokka tagħtha gallettina u qaltilha, "Kulha meta toħroġ. Biex toħroġ tini jdejk!" Jade qabżet u ħadet idha meta f'ħabta u sabta spiċċat barra mill-ħabs. Kielet il-gallettina, għalqet għajnejha, u bla ma taf kif spiċċat quddiem is-siġra fejn bdiet l-avventura. 
      Indunat li l-ħin ma ċċaqlaqx minn meta telqet. Ma qalet 'il ħadd b'din l-avventura. Kollox spiċċa b'wiċċ il-ġid u kompliet il-ħajja normali tagħha. 


Kyra Fenech (Form 1.2)
---------------------------------------------------------------------------------------------
     Lizzie, tifla ħelwa ta' ħdax-il sena, kienet tħobb wisq id-dina tal-fantasija. Kienet dejjem tintilef taqra dawn il-kotba tal-fantasija, tant li kienet qisha tinqata' ġo dinja għaliha. 
     Darba fost l-oħrajn, waqt li Lizzie kienet qiegħda taqra ktieb fuq is-sodda, f'tebqa t'għajn il-kamra mtliet b'dawl qawwi b'lewn ħadrani. Lizzie bdiet tibża' imma ma setatx tiċċaqlaq. F'ħakka t'għajn, Lizzie sabet ruħha ġo post li qatt qabel ma kienet rat bħalu. Quddiemha setgħat tara biss meded t'għelieqi, ġonna u annimali ta' kull sura u forma, imżewqin b'ħafna lwien. 
     Lizzie ħassitha tassew beżgħana u konfuża u kellha aptit tinfexx f'bikja, imma x-xenarju pittoresk li kellha quddiema ġabilha tbissima fuq wiċċha. Lizzie ddeċidiet li tibda timxi bil-mod għax il-kurżità bdiet tagħmel tagħha. Barra minn hekk, Lizzie kellha wkoll sens t'avventura u xtaqet tiskopri fejn kienet qiegħda. Hija u miexja, Lizzie bdiet tara wkoll ħafna annimali b'ħafna forom u kuluri strambi. 
     F'ħabta u sabta, ħareġ aljen żgħir minn ġo dar li kienet magħmula mill-kejkijiet. Lizzie ħadet qatgħa kbira, imma l-aljen beda jkellimha b'ħafna ħlewwa u ġentilezza. L-aljen beda jispjega lil Lizzie li hija kienet ġiet f'dinja tal-fantasija, dinja fejn kollox kien perfett u kulħadd kien jgħix f'armonija ma' xulxin. Lizzie ħassitha ħa ttir bil-ferħ għax dejjem kellha x-xewqa li taħrab mid-dinja reali. Sfortunatament, l-aljen li kien jismu Żigiżgiżu qal lil Lizzie li hi kellha terġa' tirritorna lura lejn id-dinja. Lizzie ma riditx titlaq għax kienet qed tieħu pjaċir. 
     Lizzie reġgħet sabet ruħha f'kamritha u bdiet taħseb fuq il-fatt li ma setatx tifhem dwar għaliex kienet ġrat din il-ġrajja. Hija kienet kuntenta ħafna li kienet għaddiet minn esperjenza bħal din. 


Megan Attard (Form 1.3)

Wednesday, November 9, 2011

Meta għamilt waħda tinkiteb!

     Mela darba waħda n-nannu u n-nanna ddeċidew li jmorru btala. Għalhekk qabbduni li nkun responsabbli li nieħu ħsieb l-annimali domestiċi li għandhom kif ukoll biex insaqqilhom il-pjanti.
     L-ewwel ġurnata li mort, tmajt lill-qattus sufi, lill-ħut tal-ilma ħelu li kien hemm ġol-vaska ġol-ġnien u lill-għasafar li kien hemm ġol-guva kbira. Saqqejt il-pjanti u kif ukoll naddaft wara l-qattus u l-guva tal-għasafar. Domt nagħmel l-istess ħaġa għal ħamest ijiem,. Kont nieħu gost nagħmlu minn qalbi dan ix-xogħol. Barra minn hekk, in-nannu kien wegħdni rigal mill-isbaħ.
     Fis-sitt ġurnata mort id-dar tan-nanniet bħas-soltu u bqajt dieħla fil-ġnien. Kien hemm skiet perfett u ħassejt xi ħaġa stramba u ndunajt li l-għasafar ma kinux qed jgħannu bħas-soltu. Ħarist lejn il-guva u msarni niżlu f'saqajja. Bqajt b'ħalqi miftuħ beraħ għax l-għasafar ma kinux hemm. Bdejt nogħrok għajnejja u ma ridtx nemmen u qabditni rogħda kbira. Tatni  rasi u bdejt insaqsi lili nnifsi, x'ser nagħmel?
     Probabbli kien tort tiegħi li l-guva m'għalaqthiex sew il-ġurnata ta' qabel. Kemm inkwetajt! Lanqas lill-ġenituri tiegħi m'għidt. Lanqas billejl ma stajt norqod. L-għasafar għan-nannu kienu jfissru ħajtu, kienu l-għaxqa tiegħu u kien iħobb jismagħhom jgħannu. Fil-fatt kien iqatta' ħafna ħin iħares lejn il-kuluri sbieħ tagħhom. Bdejt ngħid, tgħidli qalbi 'addio' r-rigal li wegħdni n-nannu. Ġurnata qabel ma ġew mill-btala n-nanniet, kelli ħsieb li mmur nixtri għaxar għasafar oħra u nitfagħhom ġol-guva u qisu qatt ma kien ġara xejn.
     Iżda bdejt naħseb bejni u bejn ruħi, l-għasafar mhux aħjar jittajru liberi milli jibqgħu magħluqin f'guva? Intom naħseb bħali taħsbuha, hux?


Rebecca Ellul (Form 2.1)
---------------------------------------------------------------------------------------------
     Kien is-Sibt filgħodu meta n-nanna kienet għadha kemm ħarġet mill-isptar. Kemm fraħna li ma kien ġara xejn!
      L-għada, ommi qaltli biex immur nieħu ħsieb lil nannti ma jmurx jagħtiha ħass ħażin! Jien m'għedtx le għax għand in-nanna dejjem ikun hemm xi ħadd li tieħu gost tilgħab miegħu bħall-qattusa, Fifi u l-kelba, Namra. Ommi tatni l-istruzzjonijiet imma bil-ġenn tlaqt niġri barra mill-bieb qisni iljunfant li kien bil-għatx! Fit-triq iltqajt ma' sħabi u stednuni mmur nilgħab magħhom il-bandli imma għidtilhom li kelli mmur s'għand in-nanna. Kif wasalt għand in-nanna, dħalt ġewwa u sibt lin-nanna ġejja tiġri fuqi qisha trid tatini xi aħbar imma riedet tgħannaqni!
     Jiena ħadt pjaċir li rajtha b'saħħitha u fuq tagħha u li l-ħruq ta' ġol-pulmun kien għaddielha! Namra u Fifi kienu qed jiġru wara xulxin bħas-soltu, eżempju: Fifi ħadet il-papoċċ ta' Namra, jew Fifi ħadet l-għadma ta' Namra... dejjem hekk għaddejjin. In-nanna talbitni nitwilha s-srievet u nerfagħhomlha. Ħadet pjaċir li kont qed nagħmel xi ħaġa ta' ġid mhux dejjem nintelaq quddiem it-televixin. Wara li kien lest kollox, in-nanna ntefgħet torqod għax kellha ngħas fuqha! Allavolja nsiet tieħu l-pilloli xorta kienet qed tonħor u tgħeżżeż snienha bħas-soltu. Jiena ftakart fl-istedina tal-bandli mingħand sħabi, ħarist lejn in-nanna u ddeċidejt li mmur sal-bandli. Jien ippjanajt li nerġa' mmur lura lejn id-dar tan-nanna ftit ħin qabel tqum. Dak il-ħin stess tlaqt nimxi mixja lejn il-bandli u bdejt nhewden li mhux se ninqabad, mhux se ninqabad... x'jista' jiġri? Tefa' ta' ġebla 'l bogħod minni rajt lit-tfal  'l sħabi u tgħidx kemm kienu qed jieħdu pjaċir! B'hekk qsamt it-triq bla ma ħarist u f'daqqa waħda nara trakk daqs dinja ġej għal fuqi u sibt ruħi mal-art. Wara ftit nisma' s-sirena tal-ambulanza ġejja u sibt ruħi ġo kamra żgħira. Kif ftaħt għajnejja sibt lin-nanna u ommi bilqiegħda b'wiċċ iffrustrat tat-tnejn li huma! In-nanna qaltli u spjegatli kif Namra u Fifi għamlu miżbla d-dar u li jien kelli nieħu ħsiebhom u mhux immur il-bandli.
     Ommi qaltli li ma kontx se nara televixin għal xahrejn! Dakinhar tgħallimt il-lezzjoni li qatt m'għandi nagħmel il-kontra ta' li jgħiduli! Allavolja ma kien ġrali xejn gravi kont naf li dakinhar kont għamilt waħda tinkiteb!

Sara Marston (Form 2.2)
---------------------------------------------------------------------------------------------
    Kienet ġurnata sajfija f'Awwissu ta' sentejn ilu. Jien kont bil-vaganzi tas-sajf. Kont qiegħda waħdi d-dar għax missieri kien diġà telaq għax-xogħol u ommi kienet marret iżżur lin-nanna għax kienet ma tiflaħx. 

     Qomt f'xit-tmienja u nżilt fil-kċina. Ħadt ftit ħalib u biċċtejn ħobż mixwi. Wara ftit tal-ħin il-qattus mar ħdejn il-bieb tal-bitħa u beda jingħi biex jurini li ried joħroġ. Ftaħtlu l-bieb u ħareġ jiġri , u tela' fuq siġra għolja li għandna f'nofs il-ġnien biex jipprova jaqbad l-għasafar. 

     Wara xi nofs siegħa nisma' lill-qattus jgħajjat u jingħi. Ħriġt niġri fil-ġnien u nara li l-qattus kienet weħlitlu siequ ma' zokk tas-siġra u spiċċa mdendel rasu 'l isfel. Bdejt nixxabbat maz-zokk biex nipprova nilħqu, iżda kien kollu għalxejn għax kien fl-għoli wisq. 

     Mort niġri fil-garaxx biex insib sellum. Jien u għaddejja mill-kuritur nolqot mejda u minn fuqha waqa' vażun li tant kien għal qalb ommi u dan spiċċa f'mitt biċċa. Bqajt ħierġa dritt fil-ġnien. Tlajt fuq is-sellum u bdejt nissara biex nipprova neħles lill-qattus. Fil-pront minn ġewwa nisma' lil ommi tgħajjat. Kienet ġiet lura u sabet il-vażun imkisser mal-art. Bil-qatgħa li ħadt iċċaqlaq is-sellum minn taħti u waqa'.

     Il-qattus niżel jiġri mas-siġra u jien spiċċajt imdendla maz-zokk. Biex infittex ninżel qabel ma tinduna ommi,  tlaqt idejja u bqajt nieżla għal isfel. Tgħidx kemm bdejt inwaħwaħ, għax waqajt fuq pjanta tal-kaktus li kellu missieri u spiċċajt b'idejja t-tnejn mimlijin xewk. 

     Din il-ġurnata qatt m'jien se ninsieha. Kont għamilt waħda tinkiteb u mhux biss imlejt idejja kollha xewk, iżda qlajtha mingħand ommi għax kissirt il-vażun u mingħand missieri għax kissirtlu l-pjanta tal-kaktus! 

Elise Brincat (Form 2.3)

Wednesday, October 12, 2011

Irrakkonta x'tagħmel kuljum u x'tagħmel fi tmiem il-ġimgħa. Għid ukoll dwar dak li jogħġbok u dwar dak li jdejqek fil-ħajja.

     Matul il-ġimgħa jiena kważi dejjem nagħmel l-istess ħaġa, immur l-iskola, id-dutrina u mmur il-lezzjonijiet tal-arti. Meta nsib il-ħin, inpenġi, naqra u nħit. Is-sebat ijiem tal-ġimgħa waqt l-eżamijiet narahom twal wisq imma matul il-ġranet ta' kuljum il-ħin jgħaddi qisu żiffa riħ. 

     Ħames darbiet fil-ġimgħa jkolli l-iskola. Wara ġurnata xogħol niġi d-dar għajjiena mejta. L-ewwel niekol xi ħaġa żgħira u wara nibda x-xogħol tal-iskola. Indum siegħa u nofs għaddejja bix-xogħol u wara nibda nistudja suġġett li jkun. Meta nlesti kollox nagħmel it-'time table'. Iktar tard nibda naqra xi ktieb, nilgħab jew inħit, skont il-burdata. 

     It-Tlieta u l-Ħamis, fil-ħamsa jkolli d-dutrina. Id-dutrina ddum tliet kwarti. Jekk ma nkunx lestejt ix-xogħol nagħmlu wara d-dutrina.

     It-tmiem tal-ġimgħa huwa l-isbaħ parti tal-ġimgħa għalija. Mhux kollox logħob u mistrieħ fi tmiem il-ġimgħa imma ħafna studju u xogħol ukoll. Is-Sibt nipprova nlesti x-xogħol tal-iskola u nibda nistudja ftit. Filgħaxija noħroġ niekol mal-familja. Il-Ħadd inqum kmieni għall-quddiesa tat-tmienja. Il-Ħadd jiena s-soltu nistudja dak kollu li nkun għamilt matul dik il-ġimgħa. Apparti minn hekk, immur u nara n-nanniet ukoll. Nieħu gost narahom wara ġimgħa sħiħa. 

     Minħabba x-xogħol tal-iskola, ma tantx noħroġ nilgħab u niltaqa' ma' sħabi imma niltaqa' magħhom l-iskola. Din is-sena rrid naqdef iktar fl-istudju. Fl-aħħar mill-aħħar il-ġimgħa tipika tiegħi tinvolvi f'ħafna xogħol u studju. 

Corinne Gatt (Form 1.1)
---------------------------------------------------------------------------------------------
     
     Jien jisimni Kayce, noqgħod is-Swatar u għandi ħdax-il sena. Ta' kuljum jien inqum fis-sitta u għaxra sabiex nipprepara għall-iskola. Ma tantx ikolli ħin x'nitlef b'hekk nibda billi naħsel wiċċi, nilbes, nieħu l-kolazzjon, nagħmel xagħri u naħsel snieni. X'ħin inlesti noħroġ barra nistenna l-vann. 

     Waqt il-ħin tal-iskola, aħna nitgħallmu, nilagħbu u niltaqgħu ma' sħabna. Meta nasal id-dar nibda x-xogħol tal-iskola, imbagħad niekol xi ħaġa tajba li tkun ippreparatli ommi. Xi drabi wara li niekol immur nistudja, iżda kull nhar t'Erbgħa u nhar ta' Ġimgħa jkolli l-katekiżmu u l-Ħamis immur id-drama. Fost il-ġimgħa nidħol norqod għall-ħabta tad-disgħa. Il-passatempi tiegħi huma ż-żfin, naqra, nara t-televixin, inpinġi u nirreċta, iżda l-aktar li nħobb nagħmel huwa r-reċtar għax nitgħallem inkun aktar kunfidenti. L-affarijiet li ma tantx inħobb nagħmel fil-ħajja huma li nilgħab fuq il-kompjuter għax naħseb li jaqtak mis-soċjeta' għalkemm xi drabi huma bżonnjużi. 

     Is-Sibt ikolli ftit ħin għall-mistrieħ wara ġimgħa skola. Jien u ommi nħobbu mmorru nduru l-ħwienet. Filgħaxija mmorru għand in-nanna u hemm niltaqgħu mal-familja kollha. Filgħaxija mmorru għand in-nanna u hemm niltaqgħu mal-familja kollha. In-nanna ta' kull nhar ta' Sibt issajjar xi ħaġa tajba għall-familja. Il-Ħadd ukoll nerġa' niltaqa' mal-familja tiegħi. Meta ma tkunx xita mmorru Ta' Qali u tgħidx kemm nieħdu pjaċir. Iżda jekk tkun ix-xita nistiednu n-nanniet id-dar tagħna u jiġu ħalli naraw xi film sabiħ u wara nieħdu ftit te' flimkien. 

     Il-ħajja hija sabiħa ħafna. Għandna napprezzawha anki meta nkunu f'sitwazzjoni diffiċli. Nafu li minnha se nitgħallmu xi ħaġa tajba u kif jgħid il-qawl Malti: 'Kull deni ħudu b'ġid'.

Kayce Camilleri (Form 1.2)
---------------------------------------------------------------------------------------------


     Matul il-ġimgħa jien immur l-iskola u nattendi affarijiet oħrajn. It-Tnejn, L-Erbgħa u l-Ħadd immur nipprattika l-isport favorit tiegħi, l-atletika. It-Tlieta u l-Ħamis nattendi d-dutrina. 


     Kuljum qabel l-iskola nqum fis-sitta u nofs, nilbes l-uniformi tal-iskola, niekol il-kolazzjoni u naħsel snieni, imbagħad nistenna l-vann. Meta nasal mill-iskola nneħħi l-uniformi u nilbes xi ħaġa komda. Wara, niekol l-ikel li ommi tkun ippreparatli u li dan jinżilli għasel.


     Wara l-ikel, nagħmel ix-xogħol tal-iskola u nistudja ftit. Jekk ikolli ċans nilgħab ftit . Wara, nipprepara għall-attivita' ta' dakinhar. Jiena nħobbha l-iskola imma nippreferi tmiem il-ġimgħa għax ma jkollix għalfejn inqum kmieni għall-iskola, xi pjaċir!


     Is-Sibt, wara li nqum nispiċċa x-xogħol tal-iskola, jekk ikun fadalli, imbagħad nistudja u nilgħab ukoll. Kultant meta jkollna l-ħin, is-Sibt wara nofsinhar immorru għal passiġġata fil-kampanja u filgħaxija nisimgħu l-quddiesa tas-sitta. 


     Il-Ħadd filgħodu mmur nipprattika l-atletika. Wara nofsinhar immorru nżuru lin-nanniet. Oħti u jiena nieħdu gost nilagħbu fil-ġnien tagħhom jekk ikun temp sabiħ. Aħna nirkbu r-roti tagħna madwar il-ġnien u nilagħbu ħafna logħob ieħor. 


     L-aktar ħaġa li togħġobni fil-ħajja hija l-atletika, kemm meta nipprattikaha jiena kif ukoll meta nara 'il ħaddieħor. Hemm ħaġa waħda biss li ddejjaqni lili. Din hija li kull filgħodu jkolli nqum daqshekk kmieni biex immur l-iskola. 


Rachel Attard Chase (Form 1.3)

Tuesday, October 4, 2011

Kien jum ta' sħana u ħedla!

Il-ħmistax t'Awwissu kien jum ta' sħana u ħedla. Kienet l-iktar ġurnata sħuna tas-sajf. It-temperatura kienet telgħet ħamsa u erbgħin grad. 
     
Tistgħu timmaġinaw xi sħana għamlet! Ma kelli aptit nagħmel xejn. Għamilt ġurnata l-baħar imma anki hemm kien hemm ix-xemx taħraq. Kienu diġà s-sagħtejn u nofs ta' wara nofsinhar u x-xemx kienet qed taqli iżjed minn qabel, għalhekk iddeċidejt li mmur lura d-dar. X'ħin wasalt mort nixgħel l-'air condition'. Intfajt fuq is-sodda u qgħadt nara film. F'daqqa waħda, kienu diġà saru t-tlieta u kwart. Qabadni ħafna ġuħ u mort nagħmel insalata għax kelli aptit xi ħaġa friska biex intaffi ftit mis-sħana li kelli fuqi. 

Kilt il-platt kollu u wara mort ninħasel għax kelli ħafna tidlik. Wara erġajt qbadt il-karozza biex immur sal-baħar u noqgħod hemm sa filgħaxija u niekol xi ħaġa hemm. Ma tantx kien hemm nies fuq il-bajja. 

Il-baħar kien ċar daqs il-kristall u mill-ewwel inżilt ngħum. Wara xi nofs siegħa rajt tifla ta' xi għaxar snin timxi fuq il-bajja. Jien ma tajtx kas u bqajt ngħum taħt is-sema kaħli, l-għasafar ikantaw qishom riedu jibdew igorru bis-sħana huma wkoll, taħt ix-xemx taħraq. Kont ħierġa 'l barra ġol-baħar imma f'daqqa waħda smajt ħoss kbir u dort biex nara jekk il-basket kienx għadu hemm. Il-basket kien hemm imma bqajt inħares biex nara x'ġara. Bdejt dieħla 'l ġewwa u rajt xi ħaġa mimduda mal-art u ndunajt li kienet dik it-tifla u ħassha ħass ħażin. Tlajt niġri u ħadtha l-isptar. Wara ftit ġiet f'tagħha u jien tlaqt għax qalet lit-tabiba biex iċemplu d-dar. 

X'ħin wasalt id-dar mort norqod għax kelli ngħas kbir. Illum kienet l-agħar ġurnata tas-sajf! 
     
                                                                      Martina Abdilla (Form 2.1)
---------------------------------------------------------------------------------------------


Ma nafx jekk ġilix esperjenzajtu palata ta' sħana f'jum wieħed. Ħa ngħidilkom, mhix xi ħaġa t'għaxqa kbira. Ejja ngħidu li mhix xi ħaġa ta' hena li kull min ikun ħdejk ikun qed jinten bl-għaraq. Jien għaddejt minnha! 


Qomt mal-għajta tas-serduq li kien hemm fl-għalqa ta' maġenbna. X'ħin qomt, nara li l-fann kien mitfi. Jien skantajt għax naħseb li ħadd ma jħalli l-fann mitfi f'nofs Lulju. Erġajt ppruvajt nixgħelu imma kollu kien ta' xejn għax mitfi kien u mitfi baqa'. Jien tlaqt niġri b'saqajja ma' dahri nfittex lil ommi biex nara x'kien ġara. Lil ommi sibtha fit-terrazzin qalb il-pjanti ta' kull kulur u f'nofshom kien hemm pjanta sabiħa tal-frawl li kienet ilha tinbed madwar sentejn. Kienet qiegħda ssaqqi. Saqsejtha għaliex il-fann kien mitfi u fi ftit kliem kienet qaltli li kien mar id-dawl. Dakinhar kienet għaddejja mewġa tas-sħana. Tistgħu taħsbu xi sħana kienet. F'ħakka t'għajn iddeċidejna li mmorru ngħumu sal-Għadira. 


L-Għadira kienet invażata bin-nies. Kulħadd jonfoħ, irewwaħ u jċafċaf. Sibna post għad-dell avolja kien hemm kważi kull m'hemm xemx. Krejna umbrella u kollha nżajna l-ħwejjeġ. Intfajna fil-baħar. Wara xi siegħa fl-ilma sabiħ u nadif tazza, tlajna biex nittrejqu daqxejn. Kellna ikel li ġeneralment tieħu miegħek ħdejn il-baħar. Kellna d-dulliegħ, bettiegħ u ħobż biż-żejt li fejn il-baħar jinżillek għasel. Wara li mlejna l-ħawsla erġajna morna ngħumu. Lagħbna naqra bil-ballun u rrelassajna daqxejn fuq il-'lilos'. Imma kull bidu għandu t-tmiem u erġajna tlaqna ura lejn id-dar. Tgħid hemm dawl?


Fl-aħħar wasalna lura u d-dawl kien hemm. Żbarazzajna, kilna ikla bnina, inħsilna u tlaqna lejn is-sodda. Xgħelna l-fann u rringrazzjajna 'l Alla li kellna d-dawl. 


                                                                     Analise Magri (Form 2.2)
---------------------------------------------------------------------------------------------


"Sħana, riħ isfel u gdim tan-nemus!" Fil-karozza ta' missieri li hija ta' lewn aħmar, hekk bdejna nkantaw flimkien. Din hija diska twila u pjuttost antika. Inkantawha biss meta tkun is-sħana li bil-kemm tissaportiha. 


F'dak il-jum, ix-xemx kienet qawwija ġmielha. Bdejt nistħajjilha ballun tan-nar li kull sekonda bdiet tersaq lejja. Kif jgħid il-qawl Malti: kienet ix-xemx taqli l-ankri. 


Flimkien mal-ġenituri tiegħi u ħija ż-żgħir konna sejrin sal-wied li kien tefgħa ta' ġebla 'l bogħod mid-dar tagħna. Minħabba l-fatt li kienet is-sħana, missieri kien issuġġerixxa li xorta mmorru bil-karozza. Aħna lkoll qbilna għax ma tantx kellna aptit nimxu. 


F'ħakka tgħajn wasalna l-wied. Kien hemm ftit nies mhux ħażin u kulħadd beda jqattar bl-għaraq. In-nies kollha kienu b'maktur f'idhom, jimsħu moħħhom u wiċċhom kollu. 


Kif bdejna neżlin mill-passaġġ dejjaq indunajna kif il-ħaxix kien kollu niexef u mejjet bil-għatx. Il-fjuri, fejn f'Mejju kienu miftuħin u b'kuluri vivaċi, issa donnhom spiċċaw bla kulur, magħluqin u bla ħajja. 


Aħna u neżlin rajna l-għelieqi li l-biċċa l-kbira tagħhom kienu nexfin qoxqox. Rajna wkoll bidwi f'għalqa minnhom, li kellu siequ waħda fil-ħofra. Kien liebes qalziet li bla dubju kien imxammar sa rkopptejh. Il-qalziet kien ta' lewn blu u kien kollu mqatta'. Kien ukoll liebes qmis kannella ċara li kienet qisha ilha mixtrija minn żmien żemżem. F'saqajh ma kien liebes xejn iżda fuq rasu kellu kappell tat-tibna kbir, qisu dixx tal-landa. Ix-xwejjaħ kien aħmar nar u kien fih ħasra jaħdem f'dik ix-xemx, iżda l-għejxien tiegħu u tal-familja kien jiddependi fuqu. 


Waqafna ftit naraw x'kien qed jagħmel iżda s-sħana u x-xemx tiżreġ ma flaħnihiex. Ġegħlna lil missieri jdawwar denbu lura lejn id-dar. 


"Nixtri 'air condition' kieku kellu l-flus!" kompla l-kanzunetta missieri, li b'paċenzja kbira saq lejn id-dar. Qatt ma ħassejt daqshekk għejja f'ħajti. Dak kien vera jum ta' sħana u ħedla. 


                                                                   Diane Cutajar (Form 2.3)

Saturday, October 1, 2011

Il-50 anniversarju mill-mewt tal-poeta nazzjonali, Dun Karm Psaila

Dun Karm Psaila twieled fit-18 t'Ottubru,1871 u miet fit-13 t'Ottubru, 1961. Huwa magħruf sempliċiment bħala l-Poeta Nazzjonali ta' Malta. Ix-xahar ta' Ottubru, din is-sena jaħbat il-50 anniversarju mill-mewt tal-Poeta Nazzjonali. Fost ħafna kitbiet eċċellenti, Dun Karm kiteb ukoll l-Innu Malti, fl-1945.



Dawn huma xi xogħlijiet li saru mill-istudenti tal-ewwel u t-tieni sena fl-iskola St. Dorothy's, dwar il-Poeta Nazzjonali, Dun Karm Psaila. Prosit lil dawk kollha li pparteċipaw f'din l-attività.






Monday, September 26, 2011

Sena Ġdida!

Għeżiez studenti,

Nixtieq nilqa' lil kull waħda minnkom mill-ġdid fil-blogg Karta u Pinna. Erġajna sibna ruħna f'sena skolastika ġdida, sena mimlija tagħlim u sena mimlija esperjenzi ġodda. Nilqa' lill-istudenti tal-ewwel sena li għalihom il-blogg tal-Malti żgur huwa xi ħaġa ġdida! Nixtieq ninfurmakom li sħabkom tat-tieni sena diġà għamlu użu minn dan il-blogg u għoġobhom jaqsmu l-kitbiet tagħhom mal-oħrajn. Nispera li intom tagħmlu l-istess :)) ! Filfatt biex inħajjarkom ftit, nixtieqkom taqraw xi wħud mill-kitbiet li kitbu l-istudenti li s-sena l-oħra kienu fl-ewwel sena, bħalkom, biex b'hekk tieħdu idea tal-kitbiet li tistgħu toħolqu intom. Il-kitbiet m'hemmx għalfejn ikunu komponimenti li nagħtikom bħala xogħol għad-dar, iżda kull min irid jista' jibgħatli l-kitba kreattiva tiegħu fuq l-indirizz elettroniku: karta.u.pinna@gmail.com ! 

Lill-istudenti tat-tieni sena nixtieqilhom ukoll sena mill-isbaħ u nħeġġiġhom biex juru interess bħal ma wrew is-sena ta' qabel u sabiex ikomplu jaqsmu ma' ħaddieħor il-kitbiet tagħhom! 

Ms Deandra 

Friday, June 3, 2011

Kraxx


Malli l-Miss tfaċċat fil-klassi,
Qalet, “Ajma ħej, xi ġrali!
Tlift ix-xogħol ta’ sena sħiħa...
Il-kompjuter ikkraxxjali!"



“Kelli n-noti ta’ kull lezzjoni,
Kelli l-howmwerks ippjanati,
Kelli l-marki tagħkom kollha,
U anki x'copies għandi nagħti!"



“F’tebqa t’għajn sparixxa kollox,
Dehret stampa sewda biss,
Ġie t-technician, xengel rasu,
Qalli, ‘Ħeqq... m’hemmx x’tagħmel, Miss!’”



Martin Vella għolla sebgħu,
Qalilha, “Miss, din naf kif ġrat;
Żgur dabbart daqsxejn ta’ virus,
Kif kien 
ġralu s-Sur Muscat!”

“Skużi Miss, imma dan tort tiegħek,”
Qabżet tgħid Charmaine Mugliette,
“Int suppost li malli tlesti,
Tagħmel back up fuq diskett!”

“Il-papà dejjem jgħidlina,”
Qabel magħha John Brincat,
“Min qatt ma jissejvja xogħlu
Ikun veru traskurat!”

“Issa isktu,” l-Miss qaltilna,
Isa... oħorġu ktieb... bil-kwiet;
Irrid nara ’l kulħadd jaqra;
Għandi bżonn nofs ta’ nhar skiet!”

U jien fraħt, għax din il-biċċa
Qatt kont għadni ma rajt bħalha!
Kemm inħobbha lill-Miss tagħna!
Il-kompjuter ikkraxxjalha!

Monday, May 30, 2011

Ħ’Attard

F’Malta nsibu ħafna postijiet sbieħ, storiċi u anke rurali. Insibu wkoll ġonna u widien filwaqt li nsibu wkoll postijiet li jipprovdu divertiment. Jiena jogħġbuni l-irħula kwieti imma fl-istess ħin fejn il-poplu tar-raħal jkollu fejn jiltaqa’ u jissoċjalizza. Wieħed minn dawn l-irħula huwa Ħ’Attard fejn għandi l-pjaċir ngħid li noqgħod jiena mal-familja tiegħi.

Ħ’Attard jinsab fiċ-ċentru ta’ Malta. Hawnhekk insibu diversi ġonna żgħar u mxerdin imma imbagħad insibu wieħed kbir u magħruf  ħafna li huwa San Anton.  Ħ’Attard huwa magħruf ukoll għas-siġar taċ-ċitru. Għalhekk il-motto ta’ Ħ’Attard huwa “Iffjurit bil-ward imfewwaħ”. Il-palazz ta’ San Anton kien mibni mill-Granmastru Antoine De Paule fi żmien il-kavallieri. Huwa ġnien mimli fjuri kkuluriti u siġar kbar. Filfatt ħafna turisti jżuru dan il-ġnien. Fi żmien il-kavallieri l-Granmastru kien joqgħod fih imma issa l-President ta’ Malta intitolat li joqgħod hemm.

F’Ħ’Attard jinsabu erba’ widien li jagħtu għall-irħula tal-madwar; ‘Wied San Martin’, ‘Wied Inċita’, ‘Wied Irmiedi’, u ‘Wied is-Sewda’. Ħ’Attard huwa raħal antik ħafna u jmur lura għal żmien il-preistorja. Dan nafuh minn xi fdalijiet li nstabu ġewwa Ħ’Attard. Dan ir-raħal sar paroċċa fl-1575 u kellu l-ewwel kappillan fl-1579. F’dak iż-żmien Ħ’Attard kellu popolazzjoni ta’ ‘l fuq minn sitt mitt persuna. Ħ’Attard tant kiber li llum għandu popolazzjoni ta’ iktar minn għaxart elef. Għalkemm fil-qalba tar-raħal hemm ħafna djar żgħar insibu diversi vilel u djar kbar mal-madwar.

Il-paroċċa ta’ Ħ’Attard li hi ddedikata lil Marija Assunta toffri għaqdiet tat-tfal, preadoloxxenti u żgħażagħ. Hemm ukoll żewġ korijiet tal-paroċċa, wieħed tat-tfal u l-ieħor tal-adulti. Diversi residenti jiffurmaw parti minn dawn l-għaqdiet u jsibuh ta’ mezz fejn filwaqt li jagħtu servizz jiġu ffurmati spiritwalment u jissoċjalizzaw mal-oħrajn. Ħ’Attard dejjem kien, għadu u jibqa’ r-raħal favorit tiegħi.

                                                                               Ilona Vella (Form 2.3)