Ittra informali lill-ħabiba dwar sorpriża li kelli.

                                                                                                 7, "Blossom",

                                                                                                 Triq Fredrick Borg, 

                                                                                                 Iklin, IKL 1443

                                                                                                 Il-15 ta' Frar, 2013

Għażiża Martina,

Mhux ħa taqta' x'sorpriża kelli t-Tnejn filgħodu! Ħsibti qed nimmaġina. 

Mela, kont qed noħlom dwar meta dħalt ġo dar li titkexkex meta tħares lejha. Meta dħalt fiha rajt mostri ta' kull tip u ħafna affarijiet tal-biża'. Bdejt nara pitturi ta' nies antiki u meta bdejt nimxi, għajnejhom kienu qishom qed jimxu miegħi. Bdejt nimxi u nimxi u kull pass li ħadt beda jkun aktar ħafif. F'daqqa waħda rajt kamra u fiha kien hemm spirtu mimli demm ġej għalija! 

Jien werżaqt kemm flaħt... meta f'daqqa waħda ħassejt nifs tqil. Qomt ħesrem u quddiemi rajt kelb żgħir u tgħidx kemm kien ħelu! 

Ommi u missieri poġġewh hemm għal għeluq snini. Kemm fraħt! Int kellek sorpriża sabiħa wkoll? Jekk iva, iktibli lura. 

Dejjem tiegħek,

Katrina. 

Kartina Felica (Form 1.1) 

-----------------------

                                                                                                 125, "Salome",

                                                                                                 Triq G.M Callus, 

                                                                                                 Żurrieq, Żurrieq 1443

                                                                                                 L-20 ta' Frar, 2013

Għażiża Erika,

Kemm ili ma narak! Kieku taf x'sorpriża kelli meta ġejt mill-iskola lbieraħ! Jiena u ħija dħalna ġewwa d-dar u rajna l-isbaħ għasfur fid-dinja!

L-għasfur kien ta' kulur aħdar bi ftit roża fuq wiċċu. Denbu kien aħmar nar u ikħal u kellu munqar isfar. Xi darba għandek tiġi għandi ħalli tarah! Ħija semmieh 'Pepi'. Jiena u ħija minn dejjem xtaqna li jkollna annimal domestiku, allura tista' timmaġina kemm fraħna. 

Meta rajt l-għasfur, l-ewwel ħaġa li għamilt staqsejt lil ommi x'ħajjarha li ġġibilna annimal domestiku. Wara s-snin kollha teqred li l-annimali domestiċi iġibu l-ħmieġ, u dak il-qrid kollu li jeqirdu l-ommijiet. Ommi qaltli li ħajritha l-ħabiba li tiġi tgħinha tnaddaf. 

Insomma, aħna lkoll ferħanin li għandna lil Pepi. Għalissa l-għasfur hu kemxejn kwiet u jibża' minnha, imma dalwaqt ikantalna xi diska! 

Dejjem tiegħek,

Joelle. 

Joelle Farrugia (Form 1.2)

-----------------------

                                                                                          16, Triq N. Copernicus,

                                                                                          Kortin, Mellieħa, MLĦ 2631

                                                                                           

                                                                                          Id-19 ta' Frar, 2013

Għażiża Krista,

Kemm ilna ma niktbu lil xulxin. Smajt li ġibt kelb id-dar. X'semmejtu? Kemm ilu għandek? Ta' liema razza hu? Tgħidx kem għandi x'ngħidlek! In-nanna tiegħi ġabet qattus żgħir u semmietu Jamie. 

Mela taf xi ġrali bħall-bieraħ ġimgħa? Kien għeluq snini u jien ma ridt xejn kbir biex niċċelebrah imma ommi riedet iddeffes sorpriża fl-organizazzjoni tal-ġurnata ta' għeluq snini.

Jien għidtilha dak li xtaqt imma xejn ma ġara minn dak li ridt. Waslet il-ġurnata u jien kien mingħalija li ser niltaqa' ma' xi ħbieb minn tiegħi. Inti tafhom u dawn huma Martina, Jessica u Emma. 

Imma minflok, ommi fettlilha tistieden il-klassi sħiħa! Veru ħadt pjaċir! Kemm xtaqt li kont hemm magħna! Kulħadd sella għalik! Nispera li ma ndumx ma narak.

Dejjem tiegħek,

Kristina.

Kristina Pace (Form 1.3)

                                                                                              

Ittra formali lill-kap tal-iskola

                                                                                                 89, "Getsemani",
                                                                                                 Triq Santa Marija, 
                                                                                                 Ħal Qormi, QRM 2666

                                                                                                 It-12 ta' Frar, 2013

Kunvent ta' Santa Dorotea,
Triq l-Imdina, 
Ħaż-Żebbuġ, ŻBĠ 3146

Għażiża Sor Doreen Cuschieri,

Jiena studenta tat-tieni sena fis-sekondarja fl-iskola tiegħek. Ilni nattendi din l-iskola minn meta kelli erba' snin. Kieku ma ġejtx hawnhekk ma kontx nagħmel ħbieb għeżież bħal m'għandi issa. Kuljum nieħdu gost nitgħallmu affarijiet ġodda u ngawdu l-kumpanija ta' xulxin f'din l-iskola kbira, arjuża u spazjuża li għandna. 

Jekk tippermettili nagħmel xi żewġ suġġerimenti sabiex intejbu xi affarijiet. Pereżempju jien niddejjaq ħafna illi l-brejk tagħna huwa qasir u bilkemm ikolli ċans nitkellem ma' sħabi. Hemm bżonn li l-uniformi tas-sajf tkun magħmula minn drapp iktar ħafif għax inħossu ħafna sħana. Nixtieq li nużaw il-pixxina aktar ta' spiss għax bilkemm ikollna ċans nużawha meta tibda s-sħana. 

L-affarijiet tajbin ta' din is-sena skolastika kienu li qsamtna fi gruppi żgħar għal ċerti suġġetti. Din kienet t'għajnuna kbira għalija, speċjalment fil-Matematika. Nieħu gost jekk tħallini fl-istess klassi ma' sħabi għax niġi l-iskola iżjed għal qalbi. Nirringrazzjak ta' kollox. 

Tiegħek, 
(firma) 
Clara Warr. 

(Form 2.3)

-------------------------

                                                                                                 32, "AndyAnn",

                                                                                                 Triq iz-Zakak, 

                                                                                                 Il-Mosta, MST 4422

                                                                                                 It-22 ta' Jannar, 2013

Sor D. Cuschieri,

Skola ta' Santa Dorotea,

Triq l-Imdina, 

Ħaż-Żebbuġ, ŻBĠ 1437.

Għażiża kap tal-iskola,

Nittama li tinsab tajba. Inti dejjem għent biex l-iskola tagħna tkun u tibqa' l-aħjar skola li hawn f'Malta. Nixtieq nirringrazzjak, f'ismi u f'isem sħabi, tax-xogħol iebes li tagħmel ta' kuljum għalina u għall-iskola tagħna. Nirringrazzjawk ukoll talli torganizzalna avvenimenti importanti li aħna qatt m'aħna ser ninsew. 

Nirringrazzjawk ukoll talli torganizzalna attivitajiet sportivi, kif ukoll attivitajiet fejn l-istudenti tal-iskola jieħdu gost u jiddevertu ma' sħabhom. Aħna nifhmu li x-xogħol li tagħmel inti għalina mhux faċli, għalhekk aħna rriduk tkun taf li x-xogħol li tagħmel huwa apprezzat ħafna minna l-istudenti. Grazzi ta' kollox! 

Tiegħek, 

(firma) 

Shania Zammit. 

(Form 2.1)

------------------------

                                                                                                 "Il-Familja Mqaddsa",

                                                                                                  Triq l-Ifran, 

                                                                                                  Ħal Qormi, QRM 2480

                                                                                                  Il-11 ta' Frar, 2013

Sor Doreen Cuschieri,

"Il-Kunvent tas-Sorijiet tad-Dorotej,"

Triq l-Imdina, 

Ħaż-Żebbuġ, ŻBĠ 0106.

Għażiża Sor Doreen Cuschieri, 

Nispera li kollox sew. Qed niktiblek din l-ittra biex nirringrazzjak ta' dak kollu li tagħmel għal din l-iskola tant sabiħa, tal-pixxina kbira, taċ-ċentru sportiv u tal-opportunitajiet kollha li ttina. Nixtieq nirringrazzjak għall-għalliema brillanti li bgħattilna li tant iħobbuna u jieħdu ħsiebna. Jiena qiegħda fit-tieni sena tas-sekondarja u ma jiddispjaċini xejn li qiegħda f'din l-iskola. 

Grazzi wkoll tat-'tuck shop' u tal-ikel u x-xorb li tipprovdu. Il-ħarġiet ma jonqsux; il-postijiet kollha li żorna, il-Belt Valletta, l-Imdina u ħafna oħrajn. Nirringrazzjak minn qalbi tal-laboratorji sbieħ u moderni li għandna. L-esperjenzi li jkolli ġol-iskola qed jidhru li ma jieqfu qatt!

Tiegħek,

(firma) 

Claire DeBattista. 

(Form 2.2)

Rakkont fit-tielet persuna

Lejla waħda, il-Ġimgħa li għaddiet, il-familja Borg kienet miġbura d-dar. Għall-ħabta tat-tmienja, wara li kiel kulħadd, inqala' argument bejn it-tfal. Xi storbju! 

Il-mama' kienet taħdem il-ġurnata kollha, waqt li l-papa' kien jasal tard mix-xogħol u Lara u Luke ma ridux jaħslu l-platti jew jiżbarazzaw, l-argument saħan sewwa u kompla fi ġlieda bl-idejn sakemm qam jiġri l-papa' minn fuq is-sufan u fajjar daqqtejn lil Luke. It-tifel waqa' mal-art u ħabat rasu ma' siġġu. Il-mama' bdiet tgħajjat mal-papa' filwaqt li ġabret lit-tifel mill-art, Lara telqet tiġri f'kamritha. 

Ir-raġel u l-mara ma waqfux jillitikaw u Luke infexx jibki. Fir-rabja tal-mument is-Sur Borg kisser żewġ platti u martu tfixklet u waqgħet fil-ħġieġ. Luke mar jiġri fuq ommu, u missieri baqa' jsabbat. Kien fadal turtiera pizza li waqgħet mal-art u nqelbu xi fliexken ukoll. Il-kuker kien għadu mixgħul u bdiet taqbad il-biċċa tal-platti! Omm Luka kienet pronta u tfietha u ħarġet tiġri minn hemm ġew. 

X'diżastru ħallew warajhom! L-argument ma kellux jikber daqshekk fuq il-ħasil tal-platti. Fi kwarta kienu jlestu kollox! Lara ħarġet minn kamritha u bdiet tnaddaf hi. Għarfet l-iżball! 

Aimee Bartoli (Form 1.2)

----------------------------

Nathan kien qiegħed jara t-televixin meta t-telefown daqq. Fil-pront, Nathan qam iwieġbu. Kienet nanntu Luċija. Luċija kellha bżonnu biex joħdilha ħsieb id-dar sakemm hi tmur għall-vista l-isptar. Huwa qalilha "iva" għax ma kellux pjanijiet oħra għal dakinhar. 

L-għada meta kien qiegħed jipprepara biex imur għand in-nanna rċieva messaġġ mingħand sħabu li kien jgħid, "Nathan, għandek x'tagħmel illum? Trid immorru sal-Belt naraw film mal-klikka?" Hu weġibhom li se jkun għand in-nanna u li ma jistax imur. 

Waqt li Nathan kien qiegħed għand nanntu, ħabbat il-bieb. Xħin fetaħ il-bieb ra ċorma nies. Kienu sħabu li ġew iżommulu kumpanija u donnhom ma ġewx idhom f'idhom, anzi kienu mgħobbijin sa ruħ ommhom! Min kellu l-pakkett tal-krisps, min bil-pizza, min bil-fliexken tal-luminata u ħasbu għall-mużika wkoll. Lanqas laħaq fetaħ il-bieb li ma daħlux kollha ġewwa u rħewlha lejn il-kċina. 

Nathan beda jara platti ħerġin mill-armarju, krisps fuq it-tapit, turtieri biex isaħħnu l-pizza, tazzi maħmuġin, titjir ma' kullimkien u biex tgħaxxaq kollox, bdew jissuttaw l-ikel lil xulxin. Kien hemm rebus sħiħ. Il-kċina ta' nanntu kienet qisha l-Belt fl-Assedju l-Kbir! 

Nathan stħajjilha vulkan lil nanntu xħin sabuha fil-bieb tal-kċina. Lanqas biss semgħuha dieħla bl-istorbju li kien hemm.

Nathan sar abjad karti xħin sab lil nanntu ma' wiċċu! Mar jimla' l-bramel għax kien jaf li mhux ħa joħroġ qabel ma jnaddaf il-ħmieġ li qalgħu!

Maria Spiteri (Form 1.3)

----------------------------

Nina kienet tifla ta' erbatax-il sena li ma kellhiex ħutha, imma kellha qattusa jisimha Ginger. Ginger kienet qattusa kwieta u obbidjenti. Kienet tmur wara l-bieb tistenna lil Nina tiġi mill-iskola u xħin tasal kienet tmur titfissed magħha. Hekk kif Nina kienet tlesti mill-istudju, hi kienet tmur tilgħab ma' Ginger.

Kienet il-ġurnata meta Nina għalqet żmienha, meta ommha ddeċidiet li tagħmlilha festin żgħir fid-dar tagħhom u tistieden xi ftit kuġini. Għal xi l-erbgħa ta' wara nofsinhar bdew ġejjin xi nies, fosthom Ronnie u Rita, il-kuġini favoriti tagħha. Ma naqasx li Ginger ikun hemm ukoll. Ronnie kien iħobbhom l-annimali u beda jmelles lil Ginger u jtih xi ftit ħobż biż-żejt u ż-żebbuġ. Ma kienx jaf li Ginger kienet allerġika għaż-żebbuġ. 

Nina marret tpoġġi ftit ħdejn Ronnie, fejn qagħdu jitkellmu ftit, b'Ginger rieqed fuq ħoġortu. Il-festin spiċċa u kulħadd mar id-dar imma Ginger kienet tidher ma tiflaħx sew. Nina poġġietha fil-qoffina tagħha biex tistrieħ u filgħodu tqum aħjar. Filgħodu marret l-iskola u ħalliet lil Ginger rieqda. Xħin irritornat, Nina ħadet l-akbar qatgħa ta' ħajjitha. Sabet lil Ginger mejta... qalbha ma kinitx qed tħabbat... kienet kiesħa silġ! Hi ċemplet lit-tabiba u din ħaditha fil-klinika tagħha. Wara li eżaminata skopriet li kienet mietet b'kawża tal-ħobż li kien tagħha Ronnie fil-festin.

L-għada filgħodu Ronnie ġie b'kaxxa taż-żraben f'idu. Nina fetħet il-kaxxa u sabet ferħ ta' qattusa. Ronnie qalilha li t-tabiba kienet sabet dan il-ferħ ġo żaqq Ginger. Hi ddeċidiet li żżommu l-ferħ u semmietu Fluffy. Kull meta kienet tħares lejn Fluffy kienet tiftakar fix-xorti ħażina li missitha Ginger, dakinhar ġol-kċina. 

Kelsey Abela (Form 1.1)

Komponiment deskrittiv

Il-Ħolma

F'din l-istampa hawn tifla ċkejkna b'wardtejn ħomor peprin. Din qed tistrieħ fuq zokk oħxon u twil mimli natura. Din it-tfajla qed tistrieħ fuq dan iz-zokk fis-sema. 

Meta wieħed iħares lejn din l-istampa sempliċi tista' tħoss il-paċi u s-serenità li qiegħda fiha t-tifla. Hija liebsa ħwejjeġ komdi qishom piġama. Għandha xagħarha qasir u iswed tuta. Qiegħed miġbur f'żewġ toppi żgħar u ħelwin u għandha frenza qasira ma' moħħha. 

Fuq wara hemm id-dalma tal-lejl u s-sħab abjad tajjari, jimxi 'l hemm u 'l hawn. Fin-nofs hemm iz-zokk oħxon li jibqa' tiela' sal-għola sħab. Dan iz-zokk huwa mdawwar bi fjuri kbar. Għandu bosta friegħi nnukklati ħerġin minn kull naħa. Hemm ħafna weraq li kibru kullimkien u minn ftit friegħi hemm xi qlub imdendlin għal fuq moħħ iċ-ċkejkna. 

Mit-tbissima ħelwa fuq fomm it-tifla wieħed jista' jimmaġina li qed toħlom ħolm sabiħ. Minn din l-istampa nistgħu lkoll noħorġu tagħlima żgħira, xi kultant kollox ikun isbaħ meta jkollna l-paċi u l-kwiet.

Amy Agius (Form 2.2)

----------------------------

Il-Ħolma Meraviljuża ta' Marija

Marija kienet tifla ferrieħa u fuq tagħha. Kellha tnax-il sena. Xagħarha kien qasir u iswed tuta u għajnejha żoroq lewn is-sema. 

L-iskola ma tantx kienet tħobbha iżda fejn jidħlu l-kotba tal-avventura kienet tiekolhom. Darba waħda ħarġet fil-bitħa tan-nanna tagħha. Kellha ġnien kbir ħafna, kien mimli siġar taċ-ċitru u fjuri ta' kull lewn. Kienet ġurnata sajfija meta Marija ddeċidiet li tintefa' fuq zokk ta' siġra u bdiet taqra ktieb li ġabet mil-librerija tal-iskola. Kienet għaddejja daqxejn ta' żiffa ħelwa. Ix-xemx bdiet tiżreġ ġmielha u Marija kellha par wardiet ħomor nar. Hija kienet għajjiena u għajnejha marret biha. Sabet ruħha f'ħolma tal-ġenn. 

Ħolmot li kienet fuq xatt il-baħar. Ma kien hemm ħadd ħliefha. Il-baħar kien ċar daqs il-kristall u x-xemx bdiet tirrifletti fuq il-baħar. Fis-sema kien hemm ħafna għasafar itiru. Iddeċidiet li tinża s-sandli u timxi tul ix-xtajta biex ixxarrab ftit saqajha. Ftit 'il bogħod minnha semgħet vuċi ta' xi ħadd jgħajtilha. Ħarset lura u ma setgħetx temmen lil għajnejha! Rat sirena l-ġmiel tagħha. Kellha xagħarha lewn id-deheb u kien twil sa saqajha. Denbha kien mimli kuluri vibranti: aħmar, vjola u oranġjo. Ħaditha taħt il-baħar u qagħdet turiha d-dinja misterjuża tagħhom. 

F'daqqa waħda Marija semgħet lin-nanna tagħha tgħajtilha u qamet maħsuda. Ħarġet mill-ħolma tagħha u daħlet ġewwa biex tiekol xi ħaġa. 

Amy Caruana (Form 2.3)

----------------------------

Wendy

Kont qiegħda bilqiegħda fuq ir-ramel naqra rivista waqt li nara lil oħti ċċafċaf fl-ilma u tieħu pjaċir fil-baħar. Meta dawwart il-paġna rajt reklam tal-kotba li kellu stampa ta' tifla ħelwa u żgħira rieqda fuq siġra maġika. Din l-istampa mill-ewwel fakkritni f'ħabiba antika tiegħi li kien jisimha Wendy.

Is-siġra kienet kull kulur, mimlija fjuri u forom differenti. Madanakollu t-tifla fl-istampa kienet bla kulur, b'hekk fakkritni f'Wendy, għax Wendy kienet tħobb tilbes l-iswed u l-abjad. Wendy kienet tifla brava ħafna li kienet tiġi miegħi l-iskola primarja. Din kienet tiġi l-ewwel f'kollox fil-klassi! Tant kienet brava li kienet taf daqs l-għalliema! Dejjem kont taraha bi ktieb f'idejha. Kultant kont taraha taqra fuq ix-Xjenza, il-Malti, il-Matematika u anki fuq xi lingwi li qatt ma smajt bihom qabel. 

Xi ħaġa oħra li fakkritni f'Wendy kienu s-sħab ta' madwar is-siġra maġika. Wendy kienet dejjem qisha fis-sħab, ġo dinja għaliha, maqtugħa minn kulħadd. Hi ftit kellha ħbieb. Wieħed minnhom kien il-qattus tagħha li kien jismu Dawra. Huwa kien imur magħha kullimkien. 

Wendy kellha xagħarha iswed tuta li kien lixx u qasir. Għajnejha koħol nir li kont tintilef ġo fihom. Kellha wiċċha abjad karti. Wendy kienet qasira għall-età tagħha. Kienet timxi b'rasha fil-ktieb iżda dejem kellha tbissima fuq wiċċha. It-tfal l-oħra tal-klassi kienu jgħiru għaliha għax kienet tmur aħjar minnhom fl-eżamijiet u fix-xogħol għad-dar, u jiena fil-bidu kont naħsibha bħalhom. Iżda wara ftit kellimtha u staqsejtha tistax tgħallimni dawk l-affarijiet li taf hi. Waqt li kont immur nistudja magħha sirna ħbieb.

Din l-istampa għoġbitni ħafna, tant għoġbitni li bgħattha lil Wendy b'ittre u spjegajtilha għalxiex fakkritni fiha!

Abby Bonello (Form 2.1)

Reklami

Ittra elettronika

-------------------------

-------------------------

Xogħol li sar mill-istudenti tal-ewwel u t-tieni sena, matul il-ġimgħa ddedikata għall-'Anti-Bullying'