Rapport

Kamra tan-Nar li Tisplodi 

Ilbieraħ, fl-għaxra u nofs, splodiet kamra tan-nar waqt il-festa ta' San Ġużepp f'Ħal Għaxaq. Ġol-kamra kien hemm sitt irġiel, tnejn minnhom mietu u l-erbgħa l-oħra jinsabu fl-isptar 'Mater Dei', taħt osservazzjoni. 

L-inċidenti sar billi wieħed mill-irġiel ħalla sigarett imqabbad ħdejn it-tankijiet mimlijin porvli. Ħames minuti ara tfaċċa t-trakk tat-tifi tan-nar fejn laħqet inġemgħet folla kbira ta' nies. Wara ftit, waslu l-karozzi u l-muturi tal-pulizija li eżatt kif niżlu minn fuqhom, bdew jinvestigaw u jistaqsu xi mistoqsijiet fuq dak li kien ġara, biex jiġbru l-evidenza. 

Il-pulizija skopriet li s-sigarett ma waddbux wieħed li jaħdem fil-kamra tan-nar iżda kien waddbu xi ħaddieħor li kien miexi f'dawn l-inħawi. 

Valentina Borg (1.2) 

---------------------

Xarba Ġdida Bla Kaloriji

F'dawn l-aħħar xahrejn, 'O'WAT', kumpanija tal-ilma bdiet tipprova toħloq xarba bla kaloriji. Dan għamluh għax wara riċerka li għamlu xi xjentisti Maltin, sabu li ħafna ċittadini Maltin kienu qegħdin iżidu l-piż.

Din ix-xarba għandha wkoll bott speċjali. Speċjali l-għaliex jekk tordnah minn qabel, il-kumpanija tagħmillek ismek fuq il-bott. Hija msemmija għall-kumpanija u din ix-xarba la għandha kaloriji, la xaħam u lanqas zokkor, imma xorta waħda tagħtik l-enerġija. 

'O'WAT' issib tixtriha minn kull ħanut tal-merċa jew anki ħanut tal-ħelu. Din ix-xarba tinsab biss f'Malta u f'Għawdex. Issib tixtriha b'togħma tal-frawli, taċ-ċikkulata jew tal-vanilla.  

Kersty-Jo Zammit (Form 1.3)

---------------------

Ġurnata Ta' Suċċess 

Ġurnata ta' suċċess ġewwa l-iskola ta' St. Dorothy's, f'Ħaż-Żebbuġ. Din il-ġurnata ta' suċċess saret nhar it-Tlieta, l-14 ta' Mejju. It-tema kienet fuq il-bżonn tal-ilma fil-ġisem tagħna. 

L-istudenti għamlu spettaklu mimli żfin, kant u briju. L-istudenti ħadu gost juru t-talenti tagħhom fuq il-palk. Is-sala kienet mimlija daqs bajda bil-ġenituri tal-istudenti u l-għalliema kollha. Fl-aħħar tal-ispettaklu kienu ppremjati dawk l-istudenti li ġew l-ewwel, it-tieni u t-tielet f'xi suġġett u ġew mogħtija ċertifikat mill-kap tal-iskola. Ħadu wkoll ċertifikat dawk l-istudenti li matul is-sena ħadu sehem f'xi attivita' tal-iskola. Mid-daħka fuq fommhom stajt tara s-sodisfazzjon li kellhom wara ħafna qtigħ ta' qalb. 

Prosit kbira tmur lill-għalliema kollha li b'paċenzja kbira għinu ħafna lil dawn l-istudenti biex din il-ġurnata setgħet tkun ta' suċċess kbir. 

Jessica Caruana (Form 1.1) 

Komponiment Argumentattiv 2

L-iskola, bl-uniformi jew mingħajr uniformi? 

Illum il-ġurnata, ħafna tfal igergru għax għandhom bżonn jilbsu l-uniformi għall-iskola. Hawn min jiddejjaq għax ma togħġbux, min għax jiddejjaq li jkun bħall-oħrajn u hemm iktar raġunijiet għal dan. 

Fl-opinjoni tiegħi, l-uniformi hija komda ħafna għax m'għandekx bżonn toqgħod taħseb x'ħa tilbes kuljum! Jekk ma togħġobniex l-uniformi, ma jimpurtax għax kulħadd ikun liebes l-istess! Madanakollu, biex ngħid il-verita', togħġobni l-uniformi tiegħi għax komda u prattika. 

Jiena qatt ma gergirt, imma kieku kellna skola bla uniformi kienet tkun itqal għall-għalliema biex jitfgħallmu l-ismijiet u t-tfal faċilment ikunu jistgħu jaħarbu mill-iskola. Meta jmorru xi ħarġa, l-għalliema faċilment tista' tieħu xi tifla oħra bi żball. 

Bħal m'hemm il-ħażin, hemm it-tajjeb ta' skola bla uniformi. It-tfal jistgħ jesprimu ruħhom mill-ħwejjeġ li jilbsu, jistgħu wkoll jiġu bil-ħwejjeġ komdi skont x'attivita' jkollhom. Ħafna drabi ssib xi tfal li jilbsux addattat għall-iskola u dan għandu joħloq problema fid-dixxiplina tal-iskola. 

Billi t-tfal jistgħu jagħżlu x'jilbsu, waqt il-lezzjonijiet, il-persuna tista' aktar tibqa' ffukata fuq xiex inhi liebsa milli fuq il-lezzjoni. It-tfal jistgħu wkoll jaqbdu ma' xi tfal oħra minħabba l-ilbies tagħhom u dik tiġi forma ta' 'bullying'. 

Jiena, ma naqbilx li l-iskola tkun bla uniformi għax l-uniformi għalija hija importanti u tissimbolizza l-iskola li nkun qed nattendi. Iva, hemm bżonn ta' uniformi ġo skola, għalkemm ħafna nies ma jaqblux! 

Filippa Magro (Form 2.3)

----------------------

Illum ħa nkellimkom dwar jekk l-iskola tagħmilx sens li tkun bl-uniformi jew mingħajr uniformi. Dwar dan l-argument hemm ħafna opinjonijiet differenti, hemm min jaqbel u hemm min ma jaqbilx. 

Jiena, li kieku kelli nagħżel, naħseb li iktar immur man-naħa li l-iskola għandha tkun bl-uniformi. Hemm ħafna li ma jaqblux miegħi, imma naħseb hawn ħafna aktar raġunijiet għal dan l-argument. L-ewwel nies, tafu kemm hawn 'bullying' fl-iskejjel u naħsebli iktar ħa jiżdied għax kulħadd ħa jibda jgħid fuq waħda u oħra għax m'għandhomx flokk tad-ditta jew inkella għax l-istil tal-flokk jew qalziet huwa ikrah. 

Raġuni oħra hija li kull filgħodu trid toqgħod tara x'ser tilbes. Naħseb jiena ġieli smajtu lil xi għalliema tgerger għax kull filgħodu trid tara x'ser tilbes u li huwa addattat. Apparti minn hekk, aħna ż-żgħażagħ ma nkunux irridu nidhru dejjem bl-istess ħwejjeġ, inġiegħlu lil ommijietna jixtrulna kull darba tibdila ġdida. 

Naħseb li l-iktar raġuni valida hija li l-istudenti jridu jkunu jidhru libsin modesti u mhux jiġu b'xi xorts qasir wisq! Apparti minn hekk, l-għalliema qegħdin jittrenjawna għal meta ħa nikbru u nibdew naħdmu u jkollna l-uniformi. Apparti minn hekk, jekk ma jkollokx xi uniformi, ħa jkollok xi regolamenti li trid timxi magħhom żgur. 

Jiena ngħid li l-iskola għandha tkun bl-uniformi u li min ma jaqbilx miegħi nispera li kkonvinċejtkom li l-opinjoni tiegħi tagħmel aktar sens. 

Elenoir Castagna Micallef (Form 2.2) 

----------------------

L-opinjoni tiegħi hija li m'għandux ikun hemm skola waħda mad-dinja kollha bl-uniformi. Jiena naqbel li nilbsu dak li rridu għall-iskola, pero' jrid ikun ilbies diċenti. L-uniformi fl-opinjoni tiegħi, għandha tintuża biss għax-xogħol. 

L-ewwel nett, l-uniformi hija għolja fil-prezz u b'dak l-ammont ta' flus tista' tixtri żewġ pari 'jeans' u ħames flokkijiet. L-uniformi hekk jew b'hekk mhix komda u allura m'għandniex x'nambuha. Kieku nista', nilbes li rrid għall-iskola u hekk kulħadd ikun jista' jilbes l-istil ta' ħwejjeġ li jogħġbu u fuq kollox, li jixraqlu. Ejja ngħidu li qed tilbes l-uniformi u tqattagħlek id-dublett u ma jkollokx ieħor, x'tagħmel? Jekk ikollok l-uniformi trid tilbes it-tracksuit tal-iskola u tieħu nota, jekk ma jkollokx uniformi, tista' sempliċiment tilbes xi ħaġa oħra. 

Kieku ma kellix uniformi, kont inħossni aktar komda għax nilbes il-ħwejjeġ fuq xulxin kemm irrid. Ara, l-uniformi ma tista' tilbes xejn minn taħtha għax dak li tilbes jidher u ma ninsewx li ħafna uniformijiet għandhom drapp irqiq. Kieku l-uniformi ma teżiżtix, kieku l-iskola tkun kollha kkulurita bil-ħwejjeġ tal-istudenti u mhux kollha safra u blu bħall-uniformi tiegħi. L-iskola kulħadd ikun bl-istess ħwejjeġ mentri jekk il-kap tal-iskola jibdel ir-regolamenti jkun hemm kuluri differenti ġol-iskola ta' kuljum!

Jiena tajt l-opinjoni tiegħi, nispera li fhimtu l-punt tiegħi, li l-iskola għandha tkun bla uniformi. Nispera wkoll li biddiltilkom fehmitkom!

Annika Micallef (Form 2.1)

Komponiment argumentattiv

L-iskola, filgħodu jew filgħaxija?

Jiena nemmen li l-iskola għandha tibqa' ssir filgħodu għaliex filgħodu t-tfal ikollhom iktar ħeġġa u enerġija u ma naħsibx li wara ġurnata mimlija attivitajiet u impenji, l-istudenti ser ikollhom aptit iqattgħu sitt sigħat ta' skola. 

Issa l-istudenti draw b'din is-sistema għax filgħaxija nħalluh għad-divertiment, l-istudju u għall-attivitajiet l-oħra. Dan l-aħħar, waqt xi taħditiet fuq ir-rajdu smajt li qed jikkunsidraw li jtawlu l-ħinijiet tal-iskola. Dan naqbel miegħu għaliex naħseb li mhux qed ikun hemm biżżejjed ċans biex inlaħħqu mas-sillabu kollu u forsi b'hekk inkunu aktar komdi li nagħmlu x-xogħol aktar bil-kalma, u b'hekk xorta waħda, il-ħin ta' filgħaxija nħalluh għall-impenji tagħna. 

Ma nistax nimmaġina li filgħaxija nkunu għadna sejrin l-iskola għax żgur li nofs l-istudenti jispiċċaw ma jafux x'inhu jiġri waqt il-lezzjonijiet. Għalkemm jiena naħsibha b'dan il-mod ma jfissirx li kulħadd jaħsibha bħali. Jiena tkellimt ma' ħafna nies u qaluli li ma jaqblux miegħi għaliex jafu kemm hi diffiċli għall-istudenti li jqumu kuljum kmieni għall-iskola. Qaluli wkoll li jekk l-iskola tibda filgħaxija, l-istudenti jkollhom aktar ċans biex jistudjaw. Dan kollu huwa tajjeb imma jiena nibqa' naħseb li l-iskola għandha tkun filgħodu għaliex din is-sistema ilha hekk għal ħafna snin, imma sewwa jgħidu li l-baqra tinbiegħ kollha. 

Nispera li kont ċara fuq dan is-suġġett u li n-nies li qed jaqraw l-opinjoni tiegħi bdew jaħsbuha different jew għallinqas bdew iħarsu lejn din l-idea minn angolu differenti.

Kayce Camilleri (Form 2.1)

----------------------------

L-internet ħela ta' ħin?

L-internet jista' jkun ħela ta' ħin u kif ukoll jista' jkun bżonnjuż fil-ħajja li qed ngħixu fiha llum. Lanqas nimmaġina l-ħajja tiegħi mingħajr internet. 

Jiena nemmen li jekk l-internet jintuża għall-iskopijiet tajbin, jista' jkun użat bħala għodda utli. Aħna l-istudenti nużawh ħafna l-internet għar-riċerki tal-proġetti tal-iskola. Għalhekk, niffrankaw ħafna ħinni milli noqogħdu nqallbu fil-kotba u niffrankaw il-ħin milli nżuru xi librerija. Jiena ma naħsibx li l-internet jista' jkun ħela ta' ħin għax ħafna nies jiffrankaw il-ħin billi jħallsu l-kontijiet tad-dawl u tal-ilma, jixtru x-xirja ta' kuljum, jixtru l-ħwejjeġ, żraben u ħafna bżonnijiet oħra. Familji li għandhom qrabathom jgħixu 'l bogħod minnhom jistgħu jagħmlu kuntatt magħhom permezz tal-internet. 

Min-naħa l-oħra nemmen li l-internet jista' jkun ħela ta' ħin jekk tużah bla kontroll. Ħafna ħin fuq l-internet jista' jwassal għal nuqqas ta' eżerċizzju fiżiku li jwassal għal tfal bl-obeżita'. Ħafna tfal qegħdin iqattgħu ħafna ħin prezzjuż jilagħbu u jiċċettjaw fuq l-internet minflok ma jaqraw u jistudjaw. Sfortunatament, fil-ħajja tal-lum mhux it-tfal biss jaħlu l-ħin fuq l-internet, iżda anki l-ġenituri. B'riżultat li l-familja mhux qed ikollha ħin ta' kwalita' flimkien li jiltaqgħu fuq il-mejda tal-ikel u jitkellmu bejniethom. Kif jgħidu, l-eżempju jkaxkar, għalhekk għandhom ikunu l-ġenituri li jagħtu l-eżempju lil uliedhom. Ngħid għalija jiena nipprova nsib ħin għal kollox u hekk għandu jkun. 

Jiena nemmen li fil-ħajja kollox għandu jsir b'bilanċ. Jekk l-internet jintuża kif suppost, m'għandux ikun ħela ta' ħin. 

Kathryn Ellul (Form 2.2)

---------    ----------    ---------

Għalija l-internet mhuwiex ħela ta' ħin. L-internet illum ħa minflok il-kotba u huwa iktar faċli biex tfittex l-informazzjoni fuqu milli mill-kotba. L-internet illum sar parti mill-ħajja, fl-uffiċini jkollhom l-internet, fl-iskejjel u anki d-dar. Forsi għal ċertu nies anzjani huwa meqjus bħala ħela ta' ħin għax ma jafux jużawh u ma jkollhomx bżonnu, iżda għalina l-internet huwa ħajjitna!

Meta jkollok l-internet id-dar, tkun tista' tagħmel minn kollox. Tista' ssib l-informazzjoni għall-iskola jew forsi tipprintja xi ritratti. Mingħajr internet ma tista' tagħmel xejn ħlief tfittx minn fuq il-kotba. Meta tfittex fuq l-internet tieħu inqas xogħol u ħin. Daż-żmien, it-tfal tal-lum b'affarijiet elettroniċi biss iħobbu jilagħbu, rari ssib tfal li jħobbu jaqraw xi ktieb! Jekk ikollok l-internet tkun tista' tilgħab xi logħob fuq il-kompjuter. 

Tista' tuża l-'Facebook', 'Skype' jew xi tip ieħor biex tkun tista' tiċċettja u fl-istess ħin tkun qed tieħu brejk mix-xogħol li tkun qed tagħmel. Veru li llum hawn ħafna nies li qed jivvizzjaw ruħhom bl-internet u l-'Facebook' Jista' wkoll juġgħak dahrek jew xi parti oħra ta' ġismek peress li ddum ħafna bilqiegħda, imma f'dak il-każ trid tibbilanċja l-affarijiet inti stess. Trid toħroġ fl-arja ta' barra wkoll u mhux toqgħod id-dar imwaħħal mal-kompjuter! Billi nużaw il-kompjuter, ma jfissirx li qed naħlu l-ħin. Kulħadd għandu l-opinjoni tiegħu, pero' jekk l-anzjani u dawk li ma jafux juzaw l-internet jarawh li huwa ħela ta' ħin, għandhom jippruvw jużawh u forsi jieħdu pjaċir. Meta jkollox vizzju, jistgħu jiġru xi inċidenti, eżempju m'ilux, tifla erqet ġo banju għax ommha kienet fuq il-'Facebook'. Ma naħsibx li għandna nkunu daqshekk iffissati fuq l-internet, għax mhux sew. 

Kulħadd għandu l-opinjoni tiegħu, min jgħid li l-internet huwa ħela ta' ħin u min jgħid li mhuwiex. Hemm ħafna min jaqbel u hemm ħafna li ma jaqblux. Kulħadd ikollu xi passtemp f'ħajtu!

Yana Vella (Form 2.3)

Djalogu bejn żewġ persuni

"Illum immur indoqq taħt it-tieqa ta' Lucy," qal bejnu u bejn ruħu Xandru. 

"Bonġu Luc," qal Xandru bid-daħka. 

"Nispera li mhux ġej xi skoss storbu dalgħodu!" qalet bin-nervi Lucy. 

"Le, sabiħa tiegħi, jien mużika allegra nħobb indoqq!" wieġeb Xandru.

"Mela mhux storbjuża wkoll!" gergret Lucy waqt li għalqet it-tieqa. 

"Kemm hi antipatka din Lucy," qal Xandru waqt li rħielha jdoqq u jċapċap. 

Minn wara t-tieqa nstema' t-twerżiq ta' tarbija żgħira u Xandru xejn ma ħa pjaċir. 

"Marelli, diġa' qamet Nina, kollu tort ta' dak il-broxk!" gergret Lucy. "Nirranġak jien! Ara x'għamiltli kemm int kattiv! Qajjimtli lil Nina!" tenniet Lucy kollha nervi. 

"Mela t-triq tiegħek?" wieġeb Xandru.

"Ħa nurik ta' min hi t-triq jien," qalet bis-suppervja Lucy waqt li tefgħet barmil ilma fuq ras Xandru. 

"Ara x'għamilt Lucy! Xarrabt lili u lill-vjolin!" qal Xandru. 

"Aħjar għalik u għall-vjolin tiegħek. Darb'oħra terġax tersaq 'l hawn!" gergret Lucy hi u tagħlaq it-tieqa u t-tifla kompliet twerżaq fuqha. 

Demi Magrin (Form 1.2)

------------------------

Waqt li kien hemm ix-xemx tixwi quddiem il-gallarija, Marija f'dak il-ħin tant sabiħ kienet qed tħit xi ħaġa żgħira għat-tarbija tagħha. 

"X'gost hawn hawnhekk fil-paċi," qalet Marija waqt li ħarset 'il barra mill-gallarija. 

F'dak il-waqt, is-sieħeb ta' qabel ta' Marija kien qed jipprepara biex imur għand Marija għax wara li kien telaqha li kien għadu jħobbha. 

Marija kienet kienet id-dar tikkontempla waħedha filwaqt li sajret xi ħaġa għaliha u għal bintha, qalet bejnha u bejn ruħha. "Mulej kif ġibtni hekk? Dejjem id-dar waħdi mat-tifla filwaqt li r-raġel dejjem ix-xogħol." Meta kienet kważi ħa tibki, b'leħen miksur qalet, "Din it-tifla lanqas kważi taf min hu missierha." Marija qalbet l-ikel, kielu u wara li żbarazzat, imliet barmil bl-ilma biex taħsel l-art imma fil-pront it-tifla tagħha ħassitha ma tiflaħx.

F'dak il-waqt wasal David, is-sieħeb ta' Marija. Qagħad taħt it-tieqa ta' Marija, ħareġ il-vjolin u beda jdoqq u jkanta, "O Marija tant sabiħa, jiddispjaċini, nitolbok ħudni lura." David baqa' jdoqq u jirrepeti l-istess ħaġa. 

Minn ġewwa Marija bdiet tisma' kollox u ma ħadet xejn gost għax għalkemm kienet ħabbitu, issa hi kienet iżżewġet lil Robert. Ħarġet fit-tieqa u qaltli, "Mur, itlaq, m'għandekx x'tambini!" David ma waqaftx u t-tarbija bdiet tibki u togħxa. Għalhekk Marija tant iddejqet li qabdet il-barmil bl-ilma u tefgħatulu. 

David bir-rabja staqsieha, "Għalfejn għamiltli hekk, Marija?"

Marija qaltli, "Għax dejjaqtni, itlaq 'l hemm, ħallini, jien m'għadnix inħobbok!"

Nicole Schembri (Form 1.3) 

------------------------

Ta' kull nhar ta' Sibt filgħaxija, Rita, xebba ta' tletin sena, kienet tħobb tmur tiekol ġewwa restorant f'Tas-Sliema. 

"Il-lejla t-tajba sinjura, fiex nista' naqdik?" staqsa l-wejter bi tbissima. 

Rita weġbitu, "Nixtieq nordna platt bebbux bl-arjoli." 

"Trid tixrob xi ħaġa?" reġa' staqsa l-wejter.

"Iva, tazza luminata," kompliet Rita.

Sakemm il-wejter ġab l-ikel, Rita qagħdet tisma' l-mużika. 

"Hawn hu l-bebbux," qal il-wejter. 

"Grazzi xi jfuħ," kompliet Rita. 

"L-ikla t-tajba," qal il-wejter lil Rita. 

"Grazzi ħafna!" kompliet Rita. 

"Wejter, wejter," gergret Rita bir-rabja waqt li kienet qed tiekol. 

"X'ġara sinjura?" stagħġeb il-wejter maħsud hekk kif ra l-bebbuxu jimxi fuq il-mejda. 

"Dan x'ikel hu!" esklamat Ritra bir-rabja li kellha fuqha. 

"Skużani ħafna, mhux it-tort tiegħi," qal il-wejter iddispjaċut. "Agħti ċans ħalli mmur nordnalek platt bebbux ieħor," kompla l-wejter. 

"Tordnali xejn, grazzi xorta waħda, issa m'għandix aptit niekol," kompliet Ritra hekk kif ħarġet mir-restorant u marret id-dar imdejqa. 

Naomi Zammit (Form 1.1)

Rapport f'gazzetta

It-Tnejn, l-1 t'April, 2013

Qatla l-Mosta
Raġel instab mejjet ġo dar abbandunata.

Corinne Gatt

Raġel bl-isem ta' Oliver Borg ta' tlieta u għoxrin sena, ġie rrapportat nieqes fl-għoxrin ta' Marzu u nstab mejjet ġo dar abbandunata ġewwa l-villaġġ tal-Mosta.

Skont sorsi, il-familja rrapportati nieqes għand il-pulizija u minn hemm bdew it-tfittxijiet għal Oliver. Il-familja ta' Oliver qalet lis-sorsi tagħna li hu dak il-lejl telaq minn dar għax kellu xi festin tal-ħabib tiegħu li jgħix il-Mosta. 

In-nies tal-post irrapportaw li semgħu sparar u raw lil persuna b'maskla sewda tiġri wara raġel. Dan ir-raġel kien Oliver u biex jipprova jaħrab daħal ġo dar abbandunata. Hu ma ndunax li dan ir-raġel kellu arma tan-nar u sparalu. Il-pulizija għadhom qed jinvestigaw dan il-ħoss stramb li ħadd ma jaf għaliex ġara, ħlief il-qattiel u l-vittma. 

__________________________________

Is-Sibt, it-13 t'April, 2013

Serqa

Serqa ħdejn ħanut tal-merċa. 

Michela Agius

Raġel ta' sittin sena - Victor Grech, mar jixtri mingħand ħanut tal-merċa 'G & G' fir-raħal ta' Ħ'Attard fi Triq Victor Vassallo. Sakemm mar jixtri, n-neputija - Sarah Azzopardi, baqgħet ġol-karozza tistennieh. Hekk kif Grech kien ħiereġ mill-ħanut, raġel qabeż fuqu u telaq jiġri bil-basket tal-ikel li kien għadu kif xtara. Sarah li kienet rat x'ġara, daqqet il-ħorn tal-karozza u bdiet twerżaq kemm tiflaħ. Il-bejjiegħ tal-ħanut ħareġ barra biex jara x'inqala u telaq jiġri wara l-ħalliel u qabdu. Mara li rat kollox x'kien ġara ċemplet l-ambulanza u l-pulizija. Grech ittieħed l-isptar 'Mater Dei'. Għalkemm ma kellux ġriehi gravi, ħaduh l-isptar xorta waħda għall-osservazzjoni. Il-ħalliel - Nathan Galea, ta' tnejn u għoxrin sena, ġie arrestat. L-ispettur Joe Bonnici u s-Surġent Marjo Michallef mill-għassa tar-raħal ta' Ħ'Attard qegħdin jinvestigaw l-inċident.

__________________________________

Il-Ħamis, il-21 ta' Marzu, 2013

L-Isplużjoni fil-Kamra tan-Nar fil-Mosta

It-traġedja li ħalliet tnejn mejta. 

Britney Bondin

Ilbieraħ, l-għoxrin ta' Marzu, splużjoni f'kamra tan-nar seħħet fil-Mosta. Din it-traġeda seħħet fit-tlieta ta' wara nofsinhar. F'din l-isplużjoni nstabu żewġ persuni mejta. 

Fit-tlieta ta' wara nofsinhar, wieħed mill-ħaddiema kien qed jipprepara xi affarijiet għall-festa ta' Santa Marija. F'daqqa waħda l-kamra splodiet. It-theżżiża nħasset mill-inħawi tal-Mosta u postijiet oħrajn. Nies ta' dawn l-inħawi ċemplu lill-pulizija u l-paramediċi biex jiġu. Meta ġew il-paramediċi ħadu lill-midruba l-isptar għall-kura. 

In-nies li mietu kienu, Ġanni Sammut ta' għoxrin sena u Pawlu Sultana ta' wieħed u tletin sena. Pawlu ħalla warajh lil martu Lina u bintu Marija. Il-familja ta' Ġanni kienet ilha taħdem fil-kamra tan-nar għal iktar minn għoxrin sena. 

Il-Pjazza tar-Raħal

Il-pjazza tar-raħal fejn noqgħod hija pjazza li ftit issib bħalha. Hija pjazza miftuħa għall-arja u qalb l-għelieqi kollha ssib ħafna ħdura u fjuri sbieħ. 

Ġol-pjazza ssib diversi ħwienet, insibu erba' minnhom li huma restoranti. Xħin tasal il-pjazza xxomm riħa tfuħ ta' fniek moqlija. Insibu wkoll ħanut tal-laħam, tal-merċa u bażar. Fil-ġenb tal-pjazza nsibu xelter ta' tal-linja fejn il-karozza tal-linja tieqaf. Ma' ġenbu hemm ukoll telefown pubbliku. Nhar ta' Ħadd, speċjalment meta n-nies joħorġu dawra, jaslu wasla sal-bandli li hemm fil-ġenb tal-pjazza. Dawn jinġabru ħafna tfal fihom u huma bandli ġodda, nodfa u sbieħ ħafna. 

Ftit 'l isfel minnhom issib il-ġnien li jismu 'Barnuża Ħamra'. Dan il-ġnien fih is-siġar, il-fjuri u ħafna affarijiet oħra. Jismu 'Barnuża Ħamra' għaliex fin-nofs għandu kamra tal-injam ħamra fejn jistgħu jilagħbu t-tfal iż-żgħar. Wara nofsinhar, fil-ġranet speċjalment tas-sajf, tara xi anzjani bilqiegħda għall-frisk taħt is-siġar. Nhar ta' Ħadd filgħodu tisma' l-bejjiegħ tal-pastizzi jgħajjat u jkun hemm riħa tfuħ. Ma tantx tisma' storbju fil-pjazza ħlief għal xi ħorn tal-vann tal-ħobż u t-tpespis tal-għasafar. Meta jkun ir-riħ tista' tara s-siġar jiċċaqalqu jew xi kelb jew qattus jaqsam fil-pjazza. Kultant tara n-nies sejrin jixtru. Meta tkun fil-pjazza tħossok li qiegħda f'xi ġnien għax tħoss l-arja pura u friska tal-kampanja. Meta nkun fil-pjazza nħossni ferħana u kuntenta li ngħix ġo dan ir-raħal. 

Dan ir-raħal huwa l-Baħrija u żgur li meta tasal ġo din il-pjazza ma tiddejjaqx. Din il-pjazza jisimha 'Pjazza Patri Martin Caruana'. 

Kimberly Bugeja (Form 1.1)

----------------------

Il-pjazza tar-raħal tiegħi li tinsab f'Ħad-Dingli hija wiesgħa u miftuħa. Il-pjazza jisimha Misraħ Franċ Abela. Imsemmija għal Franċ Abela għax dan kien l-ewwel Dingli li daħħal l-Imtieħen tar-raba' f'Ħad-Dingli. F'din il-pjazza hemm monument iddedikat għalih. 

Din il-pjazza tinsab fiċ-ċentru tar-raħal. Madwarha hemm diversi ħwienet, hemm il-każin, spiżjerija, tal-pastizzi, tal-ħwejjeġ u kafetterija. F'nofs il-pjazza hemm ukoll ġnien żgħir u bankijiet. F'kull staġun din il-pjazza jkollha l-fjuri mill-isbaħ. Ix-xjuħ tar-raħal jiltaqgħu wara nofsinhar fil-pjazza jitkellmu jew jieħdu xi tazza te. 

F'din il-pjazza jsiru diversi attivitajiet matul is-sena kollha. Fis-sajf ikollna l-lejla Maltija organizzat mill-każini tal-kunsill li jorganizzaw attivitajiet ukoll f'din il-pjazza, bħal kompetizzjonijiet tal-isbaħ kostum fil-karnival. Wirjiet tal-presepji u l-Via Sagra fir-Randan tibda minn din il-pjazza. F'Awwissu meta niċċelebraw il-festa ta' Santa Marija, din il-pjazza tkun mimlija daqs bajd bin-nies u bil-gabbani tal-ikel u tal-ġugarelli li ma jonqsux. Ġieli jiġu xi nies jiffilmjaw għal xi programm fuq it-televixin. Ommi qaltli li meta kienet żgħira ġew jidhru fuq programm speċjali u għamlu programm kollu fuq Ħad-Dingli u fil-pjazza tagħna. 

Il-Kunsill Lokali qed jipprova jagħlaq din il-pjazza mill-karozzi biex ikunu jistgħu jużawha iktar in-nies tal-lokal. Nispera li dan il-pjan jirnexxi ħalli aħna ż-żgħażagħ ikollna iktar fejn niltaqgħu mingħajr periklu. Jiena nħobb noqgħod nara l-kambjamenti sbieħ li tgħaddi minnhom il-pjazza Misraħ Franċ Abela. 

Justine Pace Gasan (Form 1.2)

----------------------

Il-pjazza tar-raħal tiegħi għandha forma ovali. Hemm ukoll arja safja. 

Ġo nofs il-pjazza nsibu l-knisja parrokkjali li hija mibnija f'forma ta' bajda. Wieħed jista' jsib ukoll żewġ ristoranti li huma magħrufa għal xi ikla tajba mal-ħbieb waqt li tiekol fenkata, ħanut tal-pastizzi, ħanut tax-xagħar u tal-laħam. Taħt wieħed mir-ristoranti, hemm xelter li ħafna nies kienu għadhom jieħdu gost imorru jżuruh. Is-sena li għaddiet fetaħ ħanut tal-inbid. Meta nkun miexja biex nixtri xi affarijiet mingħand l-istationery nara xi anzjani bilqiegħda quddiem wieħed mir-ristoranti. Hemm il-Kunsill Lokali fejn wieħed jista' jmur u jsaqsi xi ħaġa lil tal-kunsill. Hemm ukoll il-pompa tal-petrol li bħalissa qed tinbena f'post differenti. Tista' wkoll taqbad tal-linja minn hemm. Wieħed jista' wkoll isib ċentru ta' matul il-ġurnata għall-anzjani li jinsab fuq il-kunsill. 

Ħdejn il-knisja hemm il-bandli fejn ħafna tfal imorru jilagħbu. Ftit 'l isfel mill-bandli hemm l-għassa tal-pulizija. It-triq hija wiesgħa u l-karozzi m'għandhomx problemi biex jgħaddu u min irid jaqsam, hemm iż-zebra crossing. Fir-rebbiegħa nagħmlu festa li nsejħulha 'Festa Frawli' fejn jiġu ħafna nies biex jixtru l-frott u l-frawli bnin. Kull nhar ta' Ħadd wara l-quddiesa tara lit-tfal jiġru u jilagħbu fuq iz-zuntier. 

Tafu għal-liema pjazza qiegħda nirreferi? Mela jekk le, jiena qed ngħidilkom dwar il-pjazza tal-Imġarr. 

Laura Bonnici (Form 1.3) 

Deskrizzjoni ta' studenta li qiegħda fil-klassi tiegħi

Krysta Falzon

Illum nixtieq ngħidlek dwar il-ħabiba favorita tiegħi. Din il-ħabiba jisimha Krysta Falzon. Krysta għandha għajnejha kannella bħall-kulur ta' xagħarha li huwa twil. Hi mhijiex waħda mit-twal nett, iżda żgur li mhix qasira. Madanakollu, lili xorta tgħaddini! 

Krysta hija tila verament organizzta u tieħu l-istudji tagħha bis-serjetà. Hi tagħmel ix-xogħol tal-iskola kollu bil-qalb, iżda ma tantx jogħġobha s-suġġett tax-Xjenza. Krysta hija tifla b'karattru li nixtieq li kulħadd għandu bħalu. Hi tifla onestà u ambizzjuża. Krysta intelliġenti wkoll u tagħti ħafna pariri. 

Lil Krysta din is-sena ltqajt magħha. Hi vera ferħana li ġara hekk. Niftakar li l-ewwel darba li ltqajt magħha kont qed nilgħab logħba mal-ħbieb u kienet qed tilgħab magħna. Minn dak iż-żmien 'l hawn, bqajna ħbieb sal-lum. 

Jiena naf li jekk xi darba niġġieldu ħa nerġgħu nsiru ħbieb. Nittama li nibqgħu ħbieb tal-aħħar! 

Nicole Ellul (Form 1.2)

---------------------

Katya Saliba

Hemm tilla fil-klassi tiegħi illi hija l-ikbar ħabiba li għandi. Ilna ħbieb mill-primarja. 

Hija bjonda u għajnejha kannella. Tħobb taqra u ddoqq il-pjanu. Hija qasira u rqiqa. Minn dejjem kienet tajba fl-isport u fl-iskola. Għandha żewġ aħwa tewmin li huma iżgħar minnha. Għandha qattusa jisimha Mitten. Fejn tkun tista', dejjem tgħin u dejjem issibha hemm meta jkollok bżonnha. Għandha karattru ferrieħi, għax dejjem taralha tbissima fuq wiċċha. Tħobb tiekol ħafna l-għaġin il-forn u dejjem tieklu bil-qalb. Kull meta jkollok bżonn parir għandha dejjem tista' tmur għax tieħu pjaċir bil-fatt li tista' tgħin lil min hu fil-bżonn. Fil-kampanja tieħu pjaċir tmur għax dejjem tara affarijiet interessanti u ġodda. 

Tħobbu ħafna l-baħar, għandha dgħajsa u fis-sajf dejjem tmur fuqha mal-familja tagħha biex joqogħdu jgħumu fil-baħar ċar. Is-suġġett favorit tagħha fl-iskola huwa l-Franċiż, minn dejjem kienet tajba fih u dejjem kienet tħobbu. Jiena dejjem kont viċin tagħha u kull meta jkollha xi problema jew diffikulta' f'xi ħaġa dejjem ġiet għandi għal parir. Jiena dejjem għidtilha biex tiġi għandi jekk ikollha bżonn xi ħaġa. 

Din it-tifla hija l-isbaħ ħabiba li qatt seta' jkolli, għax waħda bħalha żgur imkien m'jien se nsib. Din it-tifla hija Katya. 

Hannah Zoe Davies (Form 1.3)

---------------------

Jessica Caruana

Jien u l-ħabiba tal-qalb tiegħi, mhux minn dejjem konna l-ikbar ħbieb. Anzi, fil-bidu bilkemm konna ngħidu kelma lil xulxin. Imma llum il-ġurnata tista' tgħid li aħna inseparabbli. 

Meta jiena nħares lejha, nara tfajla b'qalb tad-deheb. Kull darba li jkolli xi problema mal-ewwel tiġi tgħini bla tgergir ta' xejn. Tant kemm għandha qalbha tajba li anki 'l-annimali tħobb tgħin meta tista'. Fil-fatt għandha kelb ħelu li jismu Enki, u tgħidx kemm tieħu ħsiebu.  Anzi, xi kultant taraha ħdejja biex tgħini mingħajr ma nkun għidtilha xejn. It-tbissima tagħha tferrħek mal-ewwel, anki jekk tkun imdejqa ħafna. Jien naħseb li la tikber għad issir xi attriċi jew żeffiena għax hija ilha tiżfen minn mindu kienet żgħira. U malli tara xi kamera, mal-ewwel tmur tippoża quddiem xi waħda. Iżda fl-istess ħin, ma tħallix dawn l-attivitajiet itellfuha fl-istudju tal-iskola, għaliex hija tifla responsabbli ħafna, u moħħha jilħqilha. 

Minbarra l-kwalitajiet sbieħ minn ġewwa, hija wkoll tifla sabiħa minn barra. Ħaddejha dejjem ħomor peprin u dejjem bi tbissima sabiħa. Xagħarha twil u kannella qisu tal-ħarir. Għajnejha huma kannella u jleqqu ħafna. Hija tkun perfetta għal mudella għaliex hija rqiqa u kif ukoll twila. 

Meta xi darba tiġu fil-klassi tagħna, m'għandix dubju li bl-għajnuna ta' din id-deskrizzjoni jirnexxilkom tagħrfu 'l-akbar ħabiba tiegħi, li hija Jessica Caruana. 

Mariah Renaud (Form 1.1)