Ikla kkulurita - Festa ta' ikel Malti kkulurit għalik!

Nhar il-Ħamis, fis-17 ta' Mejju, fl-iskola Santa Dorotea, f'Ħaż-Żebbuġ

Id-djar f'Malta

Razzett Malti

     F'Malta hawn bosta djar differenti, fost l-oħrajn hawn l-irziezet. Ir-razzett kien jinbena f'nofs ir-raba' li kien jaħdem il-bidwi. Billi l-bdiewa kienu beżgħana mill-ħbit tal-furbani, kienu jibnu l-irziezet tagħhom b'ġebel oħxon u qfil tajjeb. Il-bieb kbir u b'saħħtu kien l-uniku fetħa tad-dar u t-twieqi kienu żgħar u fil-għoli. Ir-razzett Malti għandu oriġini Għarbija għaliex għandu saqaf ċatt u l-ismijiet tal-kmamar tiegħu huma Semitiċi, bħal ngħidu aħna, 'L-Għorfa'. Il-bidwi kien jara li r-razzett kien ikollu dawn il-karatteristiċi. 

   Ir-razzett kien imsaqqaf, il-ħnejja kienu jkunu aktar wesgħin. Il-ħnejja kienu jkunu aktar qrib ta' xulxin. Fl-għorfa tas-sular ta' fuq, minflok ħnejja, kien ikun hemm l-injam. Il-mansab u d-dura kienu postijiet fejn il-kaċċatur kien jarma biex jaqbad l-għasafar. Fl-imgħoddi l-kaċċaturi kienu jikru biċċiet tal-art biex jużawha bħala mansab. Il-barumbara nsibuha mal-ħitan tal-irziezet qodma. Tikkonsisti f'żewġ fillieri toqob magħmulin apposta biex ibejjed fihom il-ħamiem. Fl-imgħoddi kienu jkunu miftuħin għax il-ħamiem f'dari kien jintelaq barra jiekol u jira' ġol-għelieqi u ħadd ma jmissu. Il-borġ kien ikun mibni b'xi ħames jew sitt ġebliet maqlugħin minn xi ħajt tas-sejjieħ. Il-bidwi jagħmel borġ fl-għalqa tiegħu meta xi ħadd jisraqlu l-ħaxix mill-għalqa. 

     Il-ħerża hija ġebla li tkun fuq il-bokka tal-bir. Il-ħereż mhux ġebel komuni, dawn inħadmu fl-imgħoddi min-nies tas-sengħa. L-għejjun kien l-ilma permezz ta' viti pubbliċi jew għejjun fit-toroq. Meta daħlu l-għejjun il-poplu ma baqax jixrob ilma minn għejjun naturali. Il-ħitan tas-sejjieħ kien bini karatteristiku fil-kampanja Maltija. Il-ħitan tas-sejjieħ jifirdu għalqa minn oħra u l-għelieqi mit-toroq. Kull belt kellha xi mitħna tar-riħ, kien jaħdmu bir-riħ anki f'jum bħall-Ħadd u l-festi. L-imtieħen kienu jitħnu l-qamħ għall-użu tal-familji tal-inħawi. 

     Sfortunatament minn dan il-bini ftit għad fadal u jekk ma noqogħdux attenti għad jispiċċa għal kollox. Ħafna minnu qed jiġi abbandunat u bini ieħor qed ikun il-vittma ta' vandaliżmu. Bini ieħor qed jaqa' biex jagħmel il-wisgħa għal bini aktar modern. Din hija ħasra kbira għaliex qed nitiflu parti importanti mill-istorja ta' pajjiżna u dak li jagħmilna Maltin. Hemm bżonn ta' kuxjenza u ħidma aktar biex dan il-wirt tad-djar u bini f'Malta ma jintilifx. 

Selene Bonnici (Form 2.1)
------------------------------------------------------------------------------------------

Dar antika

     F'Malta għandna ħafna tipi ta' djar differenti, pereżempju vilel, appartamenti u 'terraced houses'. Huma magħmula l-parti l-kbira mill-ġebel u konkos u allura huma sodi ħafna b'paragun ma' dawk ta' barra.
     Hawn Malta għandna vizzju li niżbgħu d-djar tagħna b'ħafna kuluri differenti bħall-abjad, kannella, roża u saħansitra ssib ukoll djar blu, ħodor, sofor u ħomor. Karatteristika tradizzjonali fi djar antiki huma l-gallariji. Dawn ikunu magħmulin mill-injam iżda ssib ukoll tal-ġebel u tal-aluminju. Ġeneralment dawn ikunu miżbugħin ħodor jew bojod. 
     Id-djar tagħna jkollhom bejt ċatt għax hawn Malta qatt ma jagħmel silġ. Dan vantaġġ għalina għax nistgħu nonxru l-ħwejjeġ fuq il-bejt u ma naħlux dawl biex innixxfuhom. Nistgħu nużaw il-bejt ukoll biex ingawdu t-temp sabiħ billi nagħmlu xi festin jew BBQ fil-miftuħ. Ħafna djar ikollhom bir imħaffer taħt il-pedamenti. Dan jimtela' fix-xitwa mix-xita li taqa' fuq il-bejt u jservi matul is-sajf biex issaqqi jew biex taħsel bih. 
     Id-djar l-antiki għandhom soqfa għoljin minħabba s-sħana, allura huma aktar effiċjenti mill-moderni li jużaw l-'air conditioning' biex iżommu friski fis-sajf. Dan importanti ħafna f'dawn iż-żminijiet għax il-prezz tad-dawl dejjem jogħla. Il-prezzijiet tad-djar f'Malta huma għoljin ħafna b'paragun ma' dawk ta' barra kif ukoll b'paragun mal-pagi tagħna. Dan ifisser li jkun diffiċli aktar għaż-żgħażagħ biex jixtru propjetajiet u ħafna drabi jispiċċaw jirku minflok.


Amber Schembri (Form 2.2)
------------------------------------------------------------------------------------------
     Hawn Malta fl-irħula ssib ħafna djar antiki, iżda ssib djar moderni wkoll. 

     Id-djar antiki hawn Malta ssib minnhom li huma kbar u oħrajn żgħar. Id-djar l-antiki fl-irħula li jkunu kbar ikollhom ħafna kmamar kbar. Dawn id-djar ikollhom xi ġnien ukoll, iżda fil-Belt Valletta m'għandhomx ġonna għax fl-antik kienet kontra l-liġi minħabba n-nuqqas ta' ilma. Ħafna drabi dawn id-djar kien ikollhom xi gallarija. Id-djar iż-żgħar ma kellhomx ħafna kmamar u l-kmamar li kellhom kienu żgħar. Il-biċċa l-kbira tad-djar iż-żgħar li għandhom żewġ sulari, it-taraġ ikun ġol-bitħa stess. Fl-antik il-bibien ta' barra kienu jkunu ta' kuluri differenti, dan għaliex ma kinux jafu jiktbu l-indirizz u għalhekk kienu jirreferu għad-dar tagħhom bħala 'tal-bieb l-aħmar' jew 'tal-bieb isfar'. 
  
     Fl-antik kienu jużaw ħafna  ħamrija biex jinbnew id-djar. Fl-antik ma kinux jużaw konkos għas-soqfa iżda kienu jużaw ix-xorok. Biex ipoġġu x-xorok kienu jagħmlu ħnejjiet jew inkella travi ħalli x-xorok jserrħu fuqhom. Id-djar fl-antik il-biċċa l-kbira kellhom kantina wkoll. Illum ħafna nies li għandhom djar antiki jagħmlulhom pixxina u jikruhom lin-nies biex imorru btala ġo fihom u huma jmorru jgħixu x'imkien ieħor. 


     Illum b'differenza kull fejn tħares, tara bini għoli għax qed jinbnew ħafna appartamenti. Dawn ħafna drabi jinbnew minflok xi dar antika, din iwaqqgħuha u jibnu l-appartamenti minflok. Id-djar moderni aktar imdawlin minn djar antiki. Il-kmamar huma mqassmin f'modi differenti mill-antik. Fid-djar moderni ssib aktar kumdità. 


     Hawn Malta sirt issib minn kull tip ta' djar antiki, moderni, kbar u żgħar. Djar bħal ta' Malta ma ssib imkien. 


Amy Azzopardi (Form 2.3)

Djalogu bejn żewġ persuni.

Għodwa waħda Maria daħlet fil-ħanut 'Pollaco'. X'ħin daħlet fil-bieb idderiġietha mara għall-mejda tagħha. 

Hemmhekk ġie l-wejter u staqsieha, "Kif nista' ngħinek sinjura?"

Hi staqsietu, "X'hemm illum fuq il-menu jekk jogħġbok?"

"Illum għandna bebbux frisk bħala l-ewwel platt, fen..." beda jgħidilha l-wejter imma f'ħabta u sabta Maria waqfitu u qaltlu...

"Jien nixtieq nordna l-bebbux frisk jekk jogħġbok. Ismagħni sew, ara ma jasalx ħaj għax ikollna l-problemi e!"

"Użgur li le," qalilha ż-żgħażugħ.

Wara ftit ħin il-bebbux wasal u Maria qabdet it-'toothpick', imma meta kienet ser taqbad tiekol, "AAAA! Qed jiċċaqlaq il-bebbux!"

Il-wejter ġie jiġri u malli wasal, Maria qabdet tgerger miegħu, "Skużani sinjura imma kien hemm żball, jekk jogħġbok tista' tistenna ftit ħalli..." 

"Hux nistenna nistenna. Aremm, sejra 'l barra minn dak il-bieb u m'jien dieħla qatt aktar! Ċaw!"

... U f'ħakka t'għajn Marija kienet fi triqtha lejn darha. 

Noray Galea (Form 1.3)
-------------------------------------------------------------------------------------------
Martha u r-raġel tagħha marru jiċċelebraw l-għoxrin anniversarju taż-żwieġ tagħhom fir-restorant l-iktar popolari f'Malta. Martha ordnat bebbux iżda meta sar il-ħin biex tiekolhom, rat wieħed minnhom jimxi minn fuq il-platt.


"Wejter, wejter!" għajtet għajta kbira Martha. 


"Iva Sinjura, għandek xi problema?" staqsa l-wejter. 


"Mela mhux qed tara?" kompliet Martha, "Dak il-bebbux ħaj u qed jimxi fuq il-mejda!"


"D... dak... bebbuxu ħaj!" qal mistgħaġeb il-wejter.


"E, issa qed tara l-problema tiegħi!" qalet irrabjata. 


Il-wejter baqa' mistgħaġeb għal dak li kien ra fuq il-platt.


"Mela?" staqsiet Martha. 


"Xiex?" staqsa l-wejter.


"X'se tagħmillu dan il-bebbux...? Se tħallieh hemm, jimxi fuq il-mejda?" qalet Martha, li kienet imdejqa. 


"Le, le, skużi... skużani!" qal iddispjaċut il-wejter. 


"Nista' nkellem lill-maniġer?" kompliet Martha.


"Iva, iva," qal il-wejter, "maniġer, maniġer!"


"Hawn xi problema?" qal il-maniġer. 


"Iva, jiena u r-raġel tiegħi ġejna hawn biex niċċelebraw l-anniversarju tagħna u minflok tawni bebbux mejjet, tawni bebbux ħaj!" stagħġbet Martha. 


"Vera! Skużani dwar dan! Din qatt ma ġratilna!" kompla l-maniġer, "U għalhekk kollox ser ikun b'xejn għalikom għall-anniversarju, ser intikom kejk b'xejn ukoll!"


"Grazzi, iżda tista' ġġibli bebbux mejjet u mhux ħaj jekk jogħġbok?" qalet Martha.


"Iva, iva, bil-qalb kollha!" qal il-maniġer, "Jiddispjaċina għal dak li ġara, qatt mhu ser jiġri darb'oħra." 


Melissa Mawdsley (Form 1.1)
-------------------------------------------------------------------------------------------
"Lesta biex tordna, sinjura?" qal il-wejter.


Il-mara li kien jisimha Amber qaltlu, "Iva, jien nixtieq nordna platt bebbux, iżda jekk iddumu ma ġġibuh, naqbad u nitlaq mingħajr ma nħallas! U jien sinjorina u mhux sinjura!" qaltlu l-mara.


"Iva sinjorina, nipprova nġibulek malajr kemm jista' jkun," irrispondieha l-wejter, "Hawn qiegħed. Fil-ħin ġibtulek?"


Amber qaltlu, "Iva, tajjeb, issa itlaq minn quddiemi!"


Il-wejter malajr telaq. Meta Amber ippruvat l-ewwel wieħed, ħasset li ma kienx bit-togħma tas-soltu. Imbagħad ħassitu jiċċaqlaq f'ħalqha u malajr waddbitu 'l barra minn ħalqha u fuq il-mejda. Il-bebbuxu beda miexi fuq il-mejda u Amber għajtet, "Jaqq! Wejter ejja hawn issa!"


Il-wejter malajr ġie u qalilha, "X'ġara sinjorina? X'qatgħa tajtni!"


"Dak li ġara. Hemm fuq il-mejda, il-bebbuxu qed jimxi."


Il-wejter imwerwer qal, "Sku.. sku... skużani sinjura."


"SINJORINA!" għajtet fil-pront Amber. "Issa tini l-flus tiegħi lura u int m'intiex ser terġa' tarani hawn ġew darb'oħra." u malajr telqet 'il barra mir-restorant.


Michela Azzopardi (Form 1.2)

Rebbieħa

Nixtieq inħabbar żewġ rebbieħa tal-kompetizzjoni Għaqda Poeti Maltin. 

Martina Grech (Form 1.1)

Kyra Fenech (Form 1.2)

Prosit! 

Kompetizzjoni EkoSkola

Jum fost l-oħrajn, ma' tlugħ ix-xemx, Ċetta u Ġanna kienu għand tal-ħaxix jixtru l-ħaxix frisk li kellhom bżonn. Waqt li kienu qegħdin jistennew fil-kju flimkien, kellhom diskussjoni ferm interessanti. 

"Reġa' ġieni l-kont tad-dawl u l-ilma," gergret Ċetta, "U donnu kull darba jiżdied."

Tiegħi ġie ukoll, imma din id-darba naqas ftit għax bdejt noqgħod iktar attenta li ma naħlix iż-żejjed dawl u ilma," qalet Ġanna. 

"X'qiegħda tagħmel Ġann mela biex ma taħlix?" staqsiet Ċetta mimlija kurżità.

"L-ewwel ma bdejt nagħmel huwa li wara li jinħasel kulħadd, nitfi l-giżer u mbagħad nerġa' nixegħlu daqs nofs siegħa jew tliet kwarti qabel ma jerġa' jinħasel xi ħadd minna. Hekk ma tħallihx jixgħel għalxejn," spjegat Ġanna. 

B'attenzjoni kbira, Ċetta qalet, "Iva! Idea tajba ħafna u verament sempliċi."

"Tista' wkoll tixtri forn tal-gass minflok tal-elettriku biex ma tużax ħafna enerġija. Meta tuża xi plakka kun ċerta li titfi s-swiċċ u wara li taħsel idejk, għalaq il-vit sewwa biex ma jqattarx l-ilma," kompliet tispjega Ġanna. 

"Qatt ma bsart li dawn l-affarijiet żgħar jistgħu jgħinuni niffranka d-dawl u l-ilma!" stagħġbet Ċetta. 

"Jekk trid li verament tiffranka, nissuġġerilek li tixtri l-pannelli solari. Dawn rajthom jgħinu ħafna. Dawn jgħinuk biex minflok il-magni tħaddimhom bl-elettriku, tħaddimhom bix-xemx," ikkummentat Ġanna. 

"Illum imnalla kellimtek Ġann!" Issa nisma' minnek u nagħmel kif għidtli forsi niffranka xi ftit tal-flus," qalet Ċetta. 

"Meta trid u meta jogħġbok," wieġbet Ġanna, "Fuq kollox m'aħniex ġirien għalxejn!"

"Grazzi ħafna. Urejtni kemm hu faċli tiffranka d-dawl u l-ilma mingħajr ħafna spejjeż u fuq kollox ma nagħmlux ħsara lill-ambjent!" tenniet Ċetta. 

Diane Cutajar (Form 2.3)

--------------------------------------------------------------------------------------

Gerita u Ċensina kienu fi triqthom lejn il-Belt. Huma bdew jitkellmu fuq kemm kienu ilhom ma jiltaqgħu.

Gerita qalet lil Ċensina, “Fejn hi rasek?”

“Veru kemm ilna ma naraw lil xulxin,” weġbitha Ċensina, “Kif aħna?”

Gerita weġbitha, “Jien mhux ħażin. Int kif int? U kif inhi ż-żgħira tiegħek?”

“Jiena tajba u anki Marija tinsab tajba. Sejra tajjeb ħafna fl-iskola u qed nitgħallem jien magħha,” qalet Ċensina.

Gerita qalet, “Tassew? X’qegħdin titgallmu mela? Interessanti din!”

“Bħalissa qed nitgħallmu dwar l-enerġija u kemm hi prezzjuża. Imnalla li qed jippreparawhom minn issa. Taf kemm għolew il-kontijiet tad-dawl u l-ilma?” gergret Ċensina.

“Naf, naf,” qablet magħha Gerita, “iżda għidli x’suġġerimenti tagħthom l-għalliema sabiex ma jaħlux wisq dawl u ilma. Naħseb li niġi bżonnhom.”

Ċensina wieġbet, “Milli qaltli Marija, fil-vaganzi tal-Għid li għaddew, ġew in-nies apposta sabiex ibiddlu l-bozoz kollha tal-iskola għal bozoz ġodda li għidulhom ‘energy saving’. Din il-bozza taħli inqas enerġija mill-bozoz li aħna mdorrijin bihom u sservi aktar,” stqarret Ċensina.

“Iva, smajt bihom dawn il-bozoz. Mistgħaġbin x’differenza jagħmlu!” stqarret Gerita. “Inti smajt bis-‘solar water heaters’ li vvintaw issa? Dawn jużaw ir-raġġi tax-xemx biex isaħħnu l-ilma.”

Ċensina qaltilha, “Dażgur li smajt bihom! Marija qaltli li ser jitgħallmu dwarhom illum stess. Kos! Marija kważi spiċċat mill-iskola! Ħa jkolli mmur niġborha mill-iskola. Narak Gerita! Ħadt gost li ltqajt miegħek. Il-ġurnata t-tajba!”

“Lilek ukoll, Ċens! Narak!” wieġbet Gerita.

Mariah Farrugia (Form 2.2)

--------------------------------------------------------------------------------------

Ġuża ltaqgħet mal-ġara tagħha Marija li kienet ġejja mix-xirja ta’ kuljum. Ġuża kienet ilha ma taraha u għalhekk għajtitilha.

“Bonġu Marija. Kif int?” qaltilha Ġuża.

“Tajba grazzi,” irrispondietha Marija.

Sadanittant wasal il-pustier u newlilhom il-posta.

“Dan hu l-kont tad-dawl u l-ilma,” kemmxet xofftejha Marija, “X’waħda din, dan kif ġie daqshekk għoli?”  stagħġbet Marija.

“Jien m’għadux jiġini għoli,” qabżet pronta pronta Ġuża. “Minn mindu segwejt il-miżuri li kienu ħabbru, il-kont m’għadux jiġi għoli u ħadna r-ruħ.”

Marija staqsiet, “X’inhuma dawn il-miżuri?”

“Hemm ħafna x’wieħed jista’ jagħmel,” weġbitha Ġuża. “L-ewwel ħaġa li għamilt fid-dar tiegħi kienet li biddilt il-bozoz kollha u għamilthom minn dawk li jgħidulhom ‘energy savers’. Investejt f’pannelli tax-xemx biex permezz tax-xemx insaħħan l-ilma minflok ma nuża l-giżer.”

“Ġewk xejn għoljin dawn il-pannelli?” staqsiet Marija.

“U le, Mari, kien hemm l-iskema tal-Gvern li ssusidja parti mill-ispiża,” weġbitha Ġuża. “Hemm affarijiet oħra x’tista’ tagħmel, pereżempju tevita li tixgħel id-dawl matul il-ġurnata u titfi kompletament l-apparat elettroniku kollu u mhux tħallih ‘stand by’. Biex tiffranka l-ilma ħeġġeġ lill-familja tiegħek jieħdu doċċa u mhux jimlew il-banju,” temmet tgħid Ġuża.

“Dawn ideat tassew utli u bi ħsiebni nużahom kemm jista’ jkun,” qalet Marija. “Saħħa Ġuż,” u dlonk telqet u marret lura f’darha.

Davinia Agius (Form 2.1)

Deskrizzjoni ta' post

     Minn dejjem xtaqt immur fejn joqgħod in-nannu tiegħi, ġol-gżira misterjuża! Nagħmel sigħat twal infittex fuq il-kotba, u darba minnhom irnexxieli nsibha. Jien u missieri qbadna vapur u tlaqna lejn din il-gżira. 

     Wasalna hemmhekk u bqajna skantati bis-sbuħija li kien hemm. Kollox ikkulurit, temp sabiħ immens. Il-ħut jiġri jaqdef kullimkien, ċinji jixorbu l-ilma tax-xmara. Hemmhekk bilkemm tara lil xi bniedem, ma tismax għajjat tan-nies, ħlief l-ilma nieżel mix-xmara. Jiena dak il-ħin bqajt iċċassata u ma ċċaqlaqtx. Kull ma bdejt nagħmel kien li nitpaxxa. Ħsejjes bojod ma tantx tisma', imma tisma' żgur xi għasfur ipespes u l-atmosfera relassanti aktar tibda żżid. Nista' nara wkoll xi weraq aħmar u l-qawsalla wkoll. Hemm xi fjuri tal-ilma u xi ġebel. Ix-xmara wisq sabiħa u dik il-qawsalla tista' tintelaq fuqha. Hemm riħa ta' baħar u fjuri. Meta nkun f'dan il-post, tgħidx kemm nibda naħseb fuq kemm hu intelliġenti Alla li ħalaq dan il-post tant meraviljuż. Iġiegħlni nħoss il-paċi fid-dinja daqs kemm hemm sbuħija u kwiet. Dan kollu jfakkarni f'meta kont żgħira, konna mmorru Ta' Qali nilagħbu bil-ballun fuq il-ħaxix, sabiħ u nadif. Dan il-post nassoċjah ħafna ma' 'Chadwick Lakes'. 

     Jiena xtaqt li nibqa' hemmhekk għal dejjem imma missieri ma jħallinix nibqa' hemm. Post tal-ġenn u meraviljuż. Nibqa' niftakar f'dak il-jum għal dejjem. 

Yana Vella (Form 1.1)

---------------------------------------------------------------------------------------------

     F'din l-istampa qegħdin naraw għadira sabiħa kollha lwien. Mill-blat forma ta' taraġ, nieżla nixxiegħa tal-ilma. Madwarha l-blat mimli ħaxix aħdar u siġar. 

     Il-blat innifsu miksi b'likeni. Id-dawl tax-xemx qiegħed jirrifletti kuluri tal-qawsalla fuq l-ilma nieżel igelgel mal-blat. L-ilma kalm fl-għadira miksi b'ġilhi minn kull lewn, roża, sofor, oranġjo u bil-weraq tond u kbir tagħhom. Fl-ilma jidher il-ħut tal-ilma ħelu jdur. Anke dawn għandhom kuluri sbieħ, rashom oranġjo u l-kumplament fl-isfar. Fit-tarf qrib in-nixxiegħa hemm żewġ ċinji bojod, il-ġmiel tagħhom ikompli jsebbaħ l-istampa. 

     L-art madwar l-għadira mdawra ħaxix u b'weraq ħodor u hemm minnhom li jagħtu fl-aħmar. Din l-istampa tagħtini sens ta' kalma, ta' paċi, ta' ġmiel imsaħħar. Hija dehra li nimmaġina f'xi ħrafa ta' fatati żgħar. Kważi kważi nimmaġinahom itiru minn fuq werqa għall-oħra. 

     Post li jfakkarni f'din l-istampa huwa ċ-'Chadwick Lakes', li jinsab qrib ir-raħal fejn noqgħod jien - ir-Rabat. Fir-rebbiegħa u x-xitwa, dan il-post jimtela' bix-xita mill-għelieqi jħaddru ta' madwaru u l-ilma bil-weraq u ġieli anke jikbru ġilji tal-ilma ħelu. Ċinji qatt ma rajt iżda naraw ħafna żrinġijiet jaqbżu u jistaħbew fil-ħaxix. Kemm ġranet sbieħ qattajna hawnhekk nimxu u aħna nilagħbu ma' xulxin. Ommi u missieri 'l quddiem, b'xi ġewlaq mimli ikel u b'basket b'kutra, sakemm insibu xi għalqa mimlija ħaxix u hemm nagħmlu ikla u nqattgħu nofs ta' nhar nitbasktu bix-xemx, nitgħażżnu u ngawdu l-ġmiel tan-natura. 

Alessia Tonna (Form 1.2)

---------------------------------------------------------------------------------------------
     Dan il-ġnien mimli kuluri, bħall-aħdar, aħmar, vjola, u l-blu. Fl-istampa nista' nara ħut, fjuri u xi tipi oħra t'annimali.
     F'din l-istampa nista' nara qawsalla li għandha ħafna kuluri sbieħ. Nista' nara kaskata li minnha qed jinżel ħafna ilma. L-aktar kulur li tista' tara f'din l-istampa huwa l-kulur aħdar. L-ilma kollu aħdar, sal-ħuta li hemm taħt l-ilma. Nista' nara pjanti bħal dawk li jsejħulhom 'water lilies' li fuqhom joqogħdu ż-żrinġijiet. Il-kuluri huma mħaltin ma' xulxin, pereżempju l-ilma mhux kollu aħdar iżda għandu ftit isfar imħallat miegħu. Nista' nara wkoll żewġ ċinji bojod fil-wiċċ tal-ilma. 
     Dan il-ġnien ifakkarni f'xi ħaġa partikolari. Ifakkarni fil-mużika. Il-mużika tista' tesprimi ruħha b'dan il-mod, fil-kwiet. Jekk xi darba jkolli mmur f'post hekk, inħossni kwieta u paċifika. Inħossni libera li ħadd ma jista' jgħidli x'għandi nagħmel, qisu l-post fejn wiehed jista' joqgħod bilqiegħda u jaħseb fil-kwiet mingħajr storbju. Naħseb li anki l-annimali jkunu qegħdin fil-kwiet hemmhekk!
     Meta nkun qiegħda ndoqq il-pjanu nipprova nsib post fejn nieħu gost indoqq l-aktar. Minn dejjem kien jiġini f'moħħi ġnien mimli kuluri. Meta darba kont qiegħda naħseb, għidt "Iva, dan il-ġnien insemmih 'Il-Ġnien tal-Kuluri!'"


Mariam Grima (Form 1.3)

Deskrizzjoni ta' persuna fil-klassi tiegħi.

     Xi tmien snin ilu ltqajt ma' persuna li jisimha Laura Abela. Sirt nafha fl-ewwel ġurnata li mort l-iskola. Laura toqgħod Birkirkara u hija tifla waħedha. 

    Hija persuna li tiġbdek ħafna bil-manjieri u s-simpatija tagħha. Hija u titkellem tħobb iċċaqlaq idejha. Għandha ħdax-il sena u hija persuna twila ħafna għall-età tagħha u rqiqa. Għandha xagħarha iswed tuta u nnukklat. Hija tilbes nuċċali tal-vista. Laura għandha par għajnejn kannella. Normalment xagħarha jkun miġbur f'malju. Hija dejjem tilbes pulit u tħobb timxi mal-moda. Tħobb ħafna l-isport, fosthom il-futbol u l-'basketball'. Fost il-passatempi tagħha, hija tħobb taqra, tpinġi u tilgħab bil-kompjuter. 

     Laura għandha qalbha tad-deheb u lest li tgħin lil kulħadd. Hija persuna li lesta li tisma' l-problemi ta' ħaddieħor. L-iktar ħaġa li ddejjaqha hi meta persuna ma tgħidx il-verità u tbati bil-burdati. Laura hija tifla kwieta u dejjem bid-daħka fuq wiċċha. Hija persuna li tħobb tferraħ lil kulħadd u maħbuba minn sħabha. Tħobb l-ugwaljanza u temmen li kulħadd għandu jkun trattat l-istess, tkun ta' liema karnaġġjon tkun. 

     Laura hija persuna li ma nbiddilha ma' xejn u ma tantx issib bħalha. Nixtieq li din ir-relazzjoni bejnietna tibqa' għal dejjem għaliex hija persuna tal-ġenn. 

Amy Caruana (Form 1.1)
---------------------------------------------------------------------------------------------
     Fil-klassi qegħdin tmienja u għoxrin tifla. Ftit minnhom ilhom ħbieb tiegħi minn meta bdejt immur l-iskola fl-ewwel sena tal-primarja. 
    Fost l-akbar ħbieb li għandi fil-klassi, hemm Filippa Magro. L-ewwel darba li rajt lil Filippa mal-ewwel ħadt grazzja magħha għax vera gustuża u edukata. Filippa hija minn Ħaż-Żabbar. 
      Għandha xagħarha kannella fl-isfar u twil sa nofs dahrha, għajnejha blu u fuq ħaddejha għandha ftit nemex. Tilbes nuċċali iswed u aħmar u narah li jixirqilha mhux ħażin. Hi rqiqa u mhux twila ħafna. Filippa tagħlaq żmienha fit-tnejn u għoxrin t'April. Filippa hija tifla intelliġenti, daħkana u obbidjenti. 
    Il-passatempi favoriti tagħha huma l-għawm, tistudja u ddoqq il-pjanu. Meta tikber tixtieq issir għalliema tal-pjanu. 
       L-ikel favorit ta' Filippa huwa l-ikel Ċiniż, l-għaġin u l-pizza. Tħobb tiekol ħafna frott u tixrob ħafna ilma. Waqt li ommha tkun qed issajjar, dejjem tgħinha speċjalment meta tkun qed issajjar kejk. Fejn jidħol il-ħelu żaqqieqa mhux ħażin. 
      Il-familja tagħha tikkonsisti minn erbgħa min-nies. Missierha, ommha, oħtha u hi. Oħtha Petra għandha erbatax-il sena u tiġi l-istess skola tagħna. Dawn vera jħobbu lil xulxin għax waqt ir-rikreazzjoni dejjem ikellmu lil xulxin u jaraw għandhomx bżonn xi ħaġa. 
      Jien, għalija Filippa hija tifla paċenzjuża, ħanina u ġenwina għax tħobb tferraħ lit-tfal tal-iskola meta jkollhom xi problema jew ikunu f'xi burdata ħażina. J'Alla nibqgħu ħbieb ta' veru u li ma tibdilx il-karattru ħelu tagħha. 


Maria Spiteri (Form 1.2)
---------------------------------------------------------------------------------------------
     Ħabiba li ilni nafha minn mindu kont żgħira hija Kim. Kim hija waħda mill-ħbieb tiegħi li naf li nista' nafdaha u niftaħ qalbi magħha. 
    Kim toqgħod Ħ'Attard, għandha żewġt aħwa - Nathan u Liam. Hija tifla twila u rqiqa; bħali. Għandha xagħarha lewn il-qastan u għajnejha ħodor fil-blu. Wiċċha huwa magħmul żgħir bi ftit nemex u l-ġilda ta' wiċċha ma tantx hi skura. 
    Hi għandha karattru tal-ġenn. Vera tifla simpatika, ċajtieta, ferriħija, titkellem ma' kulħadd u hija tip ta' tifla li rari taraha bin-nervi. Il-mużika favorita tagħha hija l-mużika 'hiphop u r-'rock' u d-diska favorita tagħha hija 'Titanium' ta' David Guetta. Il-platti favoriti tagħha huma l-pizza, l-għaġin u tħobb ħafna kull tip ta' frott. 
     L-attivitajiet li tħobb tagħmel huma li tattendi għal-laqgħat tal-'iscouts', titgħallem il-pjanu, tgħum u ma' sħabha tal-'iscouts' tħobb tagħmel kampeġġ ġewwa Għajn Tuffieħa. Kim tħobb ħafna l-isport ukoll, tħobb ħafna l-futbol, il-baskitbol, in-netbol, il-'waterpolo' u l-għawm. 
     Fil-ħin liberu li jkollha, tara naqra televixin. Tara programmi dwar l-ikel, 'Goodluck Charlie' fuq l-istazzjoni Amerikan u 'Tom and Jerry' ma jonqosx!
      Kim hija l-akbar ħabiba li qatt kelli. Dejjem tkun hemm għalija u tgħinni f'kull ħaġa li jkolli bżonn. It-tbissima fuq wiċċha ma tonqosx u anke ddaħħakni xi tnejn. Kim inti perfetta kif int. Tinbidel għal ħadd!


Claire DeBattista (Form 1.3)