Komponiment deskrittiv dwar persuna.

Illum jiena ser nikteb dwar xi ħadd fil-klassi tiegħi. Din il-persuna partikolari hija tassew interessanti!

Din it-tifla hija daqsxejn twila. Xagħarha kważi iswed u għajnejha kannella u ħodor. Tħobb tagħmel xagħarha toppu. Din kienet tgħix l-Ingilterra u għandha ġilda ċara. Għandha ħdax-il sena, bħali, u ħa tagħlaq tnax-il sena f'April. Xi kultant, tħobb iċċaqlaq idejha filwaqt li tkun qed titkellem u verament tħobb tiċċaqlaq fil-lezzjonijiet tal-P.E. Hija tassew irqiqa!

Din hija tifla li hija kapaċi ddawwal il-ġurnata tiegħek! Hija ġentili ħelwa, qalbha tajba u taf kif għandha ddaħħak lil kulħadd. Tant hija ferriħija dit-tifla li kważi qatt ma taraha mdejqa. Din tifla intelliġenti ħafna, u bħali temmen li anki jekk tkun ġibt marka ħażina f'xi ħaġa, jekk ippruvajt, daqslikieku mort tajjeb ħafna. Hija tassew tixbaħni għax aħna nħobbu u nemmnu fl-istess affarijiet. Hija l-akbar ħabiba tiegħi. Tħobb l-annimali, it-tpinġija, il-kant u kif ukoll il-mużika. Għandha ħafna annimali d-dar, minnhom nista' nsemmi Jayjay l-amorin, Poppu u Johnny l-hamsters u Lily l-fekruna tal-ilma. Għandha oħtha u ħuha. Oħtha jisimha Angela u ħuha jismu Max. 

Naħseb li għandek biżżejjed informazzjoni biex ikollok idea għal min qed nirreferi. Taf min hi din? Din hija Nicola Warr!

Maya Mallia (Form 1.2)

----------

Ċensa, mara ta' tnejn u tmenin sena li toqgħod ħdejja. Tgħix flimkien mar-raġel tagħha, tgħix ġo dar antika. Għandhom tifel u mhux miżżewweġ. 

Wiċċha qisu rħama għax ma tarahiex tidħaq, minn banda oħra wiċċha mimli bil-ponot, b'farrett fuq xofftejha. Xagħarha bajdani fil-griż u magħqud. Għajnejha suwed u jleqqu, qishom stilel f'sema sewda. Hija qasira u niexfa għuda. Rari toħroġ, iżda meta toħroġ issaqqi l-pjanti, darba f'ġimgħa, in-nies tar-raħal jibbumbardjawha bil-mistoqsijiet.

Jaħsbu li hi misterjuża u veru! Ma tgħidlekx bonġu jew ċaw! Fl-opinjoni tiegħi naħseb li tħossha waħedha, avolja għandha raġel tagħha. Tħossha mitluqa għax it-tifel tagħha, ilu ma jżurha xi sena. Inħoss li għandha bżonn titħallat iktar fis-soċjetà.

Ma tantx nista' niddeskrivi l-karattru tagħha, għax ma titkellimx man-nies, iżda xi drabi tismagħha titkellem waħedha. Tkun trid tgħin lin-nies iżda qisu xi ħaġa tkun qed iżommha lura. 

Wiċċha qisu qed jgħid xi esperjenzi li għaddiet minnhom hi. Tħobb ħafna l-ornitoloġija. Għandha passatemp stramb, iġġemma' l-kaxxi kbar, żgħar, insomma, ta' kull tip. Ħadd ma jaf x'fihom dawn il-kaxxi, min jgħid li fihom xi ritratti, min ħwejjeġ u min jgħid li f'dawn il-kaxxi hemm affarijiet li kienet tgħożż meta kienet żgħira. 

Il-familja tagħha mhi xejn bħalha, il-familja tagħha hija leali, ir-raġel tagħha affermattiv u pożittiv ħafna. Ma tistax tgħidlu le għax jgħidlek iva! Qisu babbu, il-ħin kollu jdaħħak. It-tifel meta kien adoloxxenti, kien jgħid li jrid isir qassis u hekk ġara. In-nies jgħajtulu 'Jobni'. Mentri Ċensa, hija oġġettiva, tara kollox iswed, iżda huwa importanti li nitrattaw lil kulħadd b'mod ugwali!

Janice Baldacchino (Form 1.3)

----------

Bertu huwa raġel anzjan li għandu madwar sebgħin sena u jgħix fit-triq tagħna. Huwa twil u rqiq qisu s-seba' snin tal-għaks. Għalkemm imdaħħal fiż-żmien, għandu xagħru ffullat, jitfgħu laġemba u l-kulur tiegħu huwa griż b'ħafna abjad. Ta' min jgħid li Bertu, għalkemm huwa raġel anzjan, huwa attiv ħafna u ma jaqta' qalbu qatt.

Xi ftit xhur ilu, Bertu kellu jaqla' snienu kollha u tgħidx kemm ħadha bi kbira. Infatti, għamel xi ftit ġranet ma jidhirx barra għax beda jistħi. Ma damx biex għamel dawk foloz. Nista' ngħidilkom li fit-triq kulħadd kien jaf bihom għax tgħidx kemm kien ferħan li kellu lura s-snien li tilef. Kull darba li jara lil xi ħadd jirrakkontalu xi ġralu, kemm ġewh flus u kemm dam biex dehra jiekol bihom. 

Bertu mwieled Għawdex u għalkemm issa ilu s-snin joqgħod Malta, xorta xi kultant jitfa xi kelma bid-djalett Għawdxi u jkun pront jgħidha sw kif nifhmuha aħna. 

Bertu jirrakkonta spiss fuq ix-xogħol li kien jagħmel. Bertu jgħid li għamel għomru u żmienu jbiegħ il-ħaxix. Ħanut ma kellux, għalhekk kien juża l-vann tiegħu u jdur xi tliet irħula jbiegħ il-ħaxix u l-frott li kien ikollu, frisk u bnin. Ma kienx xogħol faċli, speċjalemtn l-eqqel tax-xitwa jew l-eqqel tas-sajf. Dan kollu jidher fuq wiċċ Bertu għax wiċċu ismar u mkemmex mhux ftit. Żgur li qatt ma dellek xi tip ta' krema kontra x-xemx...

Illum il-ġurnata, Bertu jqatta' l-ġurnata tiegħu billi jqum kmieni ħafna biex jieħu l-kelb tiegħu dawra fil-ġnien kbir li jinsab qrib id-dar fejn joqgħod. Bertu jħobb jirkeb ir-rota wkoll u mhux l-ewwel darba li tarah tiela' t-telgħa għarqan xraba wara xi dawra twila għax Bertu huwa bniedem kuraġġuż u xejn ma jaqtagħlu qalbu. Bertu huwa organizzat għax il-garaxx tiegħu dejjem pulit u kollox f'postu. Huwa jħobb l-indafa, tant li l-karozza tiegħu dejjem nadifa xummiema. Bertu huwa ġentili u qalbu tajba għax dejjem ifittex li jgħin lil ħaddieħor, saħansitra 'l-annimali tat-triq. Dejjem jitma' l-qtates tat-triq u l-għasafar tal-bejt. Huwa edukat u dejjem lest biex jagħti pariri tajbin lil min jitolbu xi parir. 

Bertu għandu karattru sabiħ ħafna. Ma jdejjaq lil ħadd u dejjem ferħan!

Martina DeMarco (Form 1.1)

Trevor Zahra u "Ħolm tal-Milied?"

Il-Milied hu festa tal-imħabba, festa tal-familja miġbura. Biswit il-presepju u s-siġra mimlija lwien bi dwal iteptpu, il-festa tal-Milied tfisser għaqda, paċi u solidarjetà.

Iżda l-festa tal-Milied għandha wkoll wiċċ ieħor, għaliex kapaċi tnissel 
is-solitudni u d-diqa fost uħud li għal diversi raġunijiet ma jistgħux igawdu din il-festa bl-istess mod bħall-bqija.

Is-sigriet biex minkejja kollox wieħed jibqa’ jgħożż is-sbuħija tal-Milied hu li wieħed jaċċetta r-realtà tal-ħajja u jkollu l-kuraġġ li jinbidel maċ-ċirkostanza.

Fi kliem l-awtur popolari Trevor Zahra, li dwar il-Milied sawwar diversi xogħlijiet, fosthom ‘Ħolm tal-Milied’ li għadu jintuża fl-iskejjel sekondarji, 
“il-Milied hi l-festa tal-imħabba, il-ġabra u l-għożża lejn dak kollu li għandek madwarek.”

Missier ta’ żewġ adulti u llum nannu ta’ tlieta li għalaq 59 sena, fis-16 ta’ Diċembru li għadda, Trevor Zahra ma jinħebiex mir-realtà li l-Milied għalih inbidel sbatax-il sena ilu meta martu kienet għaddiet għal ħajja oħra fl-isfond ta’ swali ta’ sptarijiet imżejna għall-festi.

“Marti mietet sagħtejn biss wara li għalaqt snini. U minn dakinhar ’il quddiem il-Milied tilef ħafna mill-importanza li kont nagħtih sakemm għaraft li l-ħajja teħtieġ tkompli u ntbaħt li fil-ħajja wieħed irid jaċċetta r-realtà li tinbidel.”

Il-parir ta’ Trevor lil kull min b’xi mod jista’ jħossu waħdu fil-Milied hu dak li min ikun jeħtieġ irawwem fiduċja fih innifsu u jaċċetta li hemm proċess ta’ fejqan għal kulħadd.

“Jien għaddejt mid-diqa, ħassejt it-telqa lejn dak li stajt nagħmel u ħassejt l-għira lejn min kien ferħan u miġbur fil-Milied. Minkejja kollox, aċċettajt il-bidliet li seħħew f’ħajti u mxejt ’il quddiem.”
Trevor jispjega li l-Milied hu mnaqqax fi tfulitu fejn jiftakar fil-ferħ tiegħu madwar missieru jarma l-presepju u t-tiżjin.

Fir-rumanz tiegħu ‘Ħolm tal-Milied’ Trevor jagħfas fuq it-tradizzjonijiet li jsawru l-festa tal-Milied u fl-intervista tiegħu magħna jistqarr kif il-parti l-kbira tax-xogħlijiet tiegħu jirreflettu dak li hu stess għadda minnu.
F’għajnejh nista’ nara n-nostalġija tal-imgħoddi. Madankollu Trevor jispjega kif wara snin ta’ diqa waqt il-Milied, illum jagħraf li l-Milied xorta għandu s-saħħa li jgħaqqad lill-familja tiegħu, anki bil-parteċipazzjoni tas-sieħba tiegħu.

Trevor hu marbut ma’ dak li hu tradizzjonali. Jitkellem ħafna fuq dak li l-Milied hu tradizzjonalment għall-Maltin u l-Għawdxin. Madankollu, mingħajr ma jkun daqstant kritiku tar-realtà li l-Milied sar pjuttost kummerċjali u tilef ħafna mill-ispirtu oriġinali tiegħu jistqarr li hu fatt li wieħed ma jistax jaħrab minnu.

“Ħamsin sena ilu meta kont għadni tfajjel niftakar lil min diġà kien jgħid li l-Milied qed jitlef mill-ispirtu tiegħu,” jirrakkonta Trevor u jżid kif ma jistax ikun li lkoll nemmnu li bħala poplu nibqgħu naħsbu li ma nimxux maż-żminijiet u bħall-bqija tas-soċjetà ninħatfu mir-realtajiet ġodda taż-żminijiet tal-lum.”

Trevor jara li t-tradizzjonijiet Maltin ta’ żmien il-Milied huma aktar ħajjin f’min għandu 50 sena u fuqhom. Iżda fl-istess ħin ma jikkundannax lil min hu iżgħar, għaliex il-verità hi li b’differenza ma’ popli oħrajn, il-poplu Malti għadu jgħozz il-festa tal-Milied u għadu jħares ċerti tradizzjonijiet b’għożża.

Iżda lil hinn mill-Milied ma’ Trevor nitkellem fuq għadd ta’ oqsma oħrajn, fosthom dwar ħidmietu bħala awtur u għalliem.

Imfaħħar ħafna mill-kritiċi għax-xogħlijiet ‘Lubien’ u ‘Provenz’, Trevor hu awtur ta’ madwar 120 kitba bejn pubblikazzjonijiet għat-tfal u kitbiet għall-adulti.

Kotba Maltin

Għadhom kif daqqu l-ħdax u nofs ta' filgħaxija u għadni kif spiċċajt naqra "Martina@chat.com" ta' Charles Casha. Ma tantx domt naqra u ppruvajt norqod biex inkompli naqrah l-għada imma l-kurżità ma ħallitnix norqod u spiċċajt qrajtu kollu f'nifs wieħed. Il-ġimgħa li għaddiet, Charles Casha ġie l-iskola u hu qalilna li dan il-ktieb ħa gost jiktbu u barra minn hekk, ried iwassal tagħlima li l-prevenzjoni aħjar mill-kura.

Ovvjament, il-karattru prinċipali hija Martina. Din għandha sittax-il sena u qiegħda fl-aħħar sena tal-iskola sekondarja. Din tgħidx kemm għandha ħbieb u l-grupp ta' ħbieb li għandha jħobbu jsejħu ruħhom, "Il-klikka tagħna." Dawn, kollha kemm huma ma jimpurtahomx mill-iskola u dawn dejjem kienu jqumu , imorru l-iskola ta' bilfors, imorru lura d-dar u minflok joqogħdu jistudjaw jew jagħmlu xi xogħol tal-iskola, joqogħdu jiċċettjaw fuq il-kompjuter! Il-ħbieb ta' Martina jkollhom il-ġenituri d-dar  u għalhekk dawn tgħidx kemm jgħidulhom biex jistudjaw imma mhux bħal dawk ta' Martina għax il-ġenituri kważi qatt ma kienu jkunu d-dar u ma jkunux jafu xi tkun qed tagħmel.

Ħuha, Robert, huwa kompletament differenti minn oħu. Dan il-ħin kollu jmur tajjeb fl-iskola imma povru tifel ma tantx għandu ħbieb u allura joqgħod ħafna waħdu. Kif diġà semmejt, il-ġenituri tiegħu ma tantx ikunu d-dar u dil-ħaġa jħossha sew miskin!

Darba waħda, Martina marret fuq sit elettroniku biex issir mudella u ltaqgħet ma' raġel jismu Donald. Dan kien joqgħod jiċċettja ma' Martina biex hi titgħallem biex issir mudella. Martina kienet bgħatitlu d-dettalji kollha fuqha  waqt li hi ma taf kważi xejn dwaru. Wara li saru ħbieb sew bdew jiltaqgħu ta' spiss sakemm fl-aħħar kien ser jipprova jabbuża minnha. Tal-inqa mat-tielet darba li pprova jabbuża minnha, Martina rnexxielha taħrab imma weġġgħet sew. Tal-inqas kulħdd ħa tagħlima u l-ġenituri bdew jagħtu aktar kas lejn uliedhom u Martina tgħallmet li qatt m'għandha tafda lil xi ħadd li ma tafx!

Nicole Azzopardi (Form 2.1)

----------

Dan il-ktieb jismu "Il-Każ kważi kollu tal-Aħwa De Molizz" u kitbitu Clare Azzopardi. Dan il-ktieb isselliftu mil-librerija tal-iskola u kelli seba' mitt sena biex naqrah għax kien fuq fomm kulħadd. Minn meta ġibtu ma tlaqtux minn idi għax ħallieni fuq ix-xwiek.

Hemm erba' karattri prinċipali li huma: Mandy u Wendy, li kienu tewmin, Saver u ħuh Klawdjo. Mandy u Wendy ma kinux iħobbu l-iskola. Iħobbu jiktbu ħafna l-limerikki u l-ħbieb tagħhom huma Mark, Hugh u Martina. Saver kien jgħix ġo post jimsu Frulli Frilli ma' ħuh Klawdjo. L-iskola kien jobgħodha u li kieku jista' jwaqqa' l-iskejjel kollha tad-dinja. It-tfal kienu jdejquh bil-kbir. Klawdjo ma kienx jinkwieta fuq l-iskola. Jgħix f'dinja għalih, f'dinja tal-ħolm. Ma' ħuh mhux dejjem jaqbel imma jkollu jagħmel dak li jgħidlu għax miskin daqxejn babbu.

Mandy u Wendy huma karattri tajbin, filwaqt li Saver u ħuh kienu karattri kattivi. Saver kien daħal bħala għalliem ġol-iskola ta' Frulli Frilli fejn kienu jmorru skola Mandy u Wendy. Ovvjament hu ma kien jaf xejn skola, allura waqt il-lezzjoni tiegħ, l-istudenti ma kienu jagħmlu xejn. Saver daħal bħala għalliem bi skop li jwaqqa' l-iskola. Mandy u Wendy għajnhom okriethom u ppruvaw jiskopru x'kellu f'moħħu. Billejl, Saver, bl-għajnuna ta' ħuh daħal l-iskola u mlewlhom il-klassijiet kollha wirdien, brim, żnażan mejtin fuq ħoġor it-tieqa u qalbilhom kollox ta' taħt fuq. B'hekk l-iskola kellha taqa' u Saver rebaħ iżda hu ħarab ma' ħuh għax kulħadd beda jissuspetta fihom. Kulħadd, anki l-pulizija għamlu lejl u nhar ifittxuhom imma għalxejn. L-iskola baqgħet ma reġatx inbniet u t-tfal spiċċaw jilagħbu barra.

Għandi seba' mitt sena biex inkompli naqra t-tieni ktieb fejn l-istorja tkompli. Nirrakkomandah lil kulħadd biex jaqrah u prosit kbira lill-awtriċi.

Jessica Caruana (Form 2.3)

----------

Il-ktieb "Bella Berger" ta' Rita Saliba huwa ktieb li kull persuna żagħżugħa għandha taqra. Minn meta qbadt il-ktieb f'idi ma poġġejtux 'l-isfel. Qrajt minnu kull meta stajt u meta spiċċajtu rrealizzajt li kienu saru s-sagħtejn ta' filgħodu. Naħseb indunajtu li għoġobni dan "Bella Berger". 

F'dan il-ktieb, il-protagonista hi tifla t'erbatax-il sena li tħobb tiekol il-bergers u tinħeba taħt il-ġinsijiet kbar. Din jisimha Belinda imma kulħadd jgħajtilha Bella. Dejjem xtaqet li kellha figura ta' ballerina bħal oħtha Darlene jew li kienet tiekol imma tibqa' rqiqa bħal ħabibtha Jasmine. Omm Bella kienet irqiqa wkoll imma missierha kien iħobb il-bergers daqsha. Xi karattri ewlenin tal-ktieb huma n-nanna Bianca, Marvin li kien ħabib ta' Bella, is-Ser Musù tad-drama, Shanon u Trudy (żewġ tfajliet kesħin) u Barbie, pupa li Bella kienet tkellimha kuljum. 

L-isbaħ parti tal-ktieb hi meta fotografu jgħid 'il Bella li għandha wiċċ perfett għal artiklu li kien ħiereġ fil-magazin "Moda u Sbuħija" u ħadilha ftit ritratti. Sadanittant, Jasmine kienet qiegħda toqgħod ma' Shanon u Trudy u mhux ma' Bella. Meta ħareġ il-"Moda u Sbuħija" tax-xahar, Bella nfaqgħet tibki meta rat li l-artiklu fejn kien ir-ritratt tagħha kien jismu, "L-Obeżità fit-Tfal u l-Addoloxxenti."

Bella ħadet għaliha u rrifjutat li tiekol. Waqt lezzjoni tad-drama taha ħass ħażin. Fl-aħħar tal-ktieb, Bella tgħallmet tħobb lilha nnifisha u rmiet 'il-Barbie 'l hemm. Bella bdiet tiffoka fuq id-drama u Jasmine ġiet tgħidilha skużani ta' kollox. Jasmine, Marvin u Bella reġgħu saru ħbieb kif kienu qabel. 

Joelle Farrugia (Form 2.2)

Ittra informali

7, Triq il-Fjorin,
Ħal Balzan,
BZN 9483

It-3 ta' Jannar, 2014

Għażiża Annalisa, 

Kif int? Nittama li tinsab tajba bħali. Jiena ferħana bħalissa, għaliex għadni kif irċivejt sorpriża meraviljuża! Għalkemm ninsab imħabbta bl-istudju, xorta waħda qed inħossni ser intir!

Din is-sorpriża tagħthieli ommi lbieraħ minħabba l-fatt li għalaq tnax-il sena. Missieri huwa msiefer fuq xogħol, u allura iktar ħadtha bi kbira! Din is-sorpriża kienet ġiżirana tad-deheb, li ser nilbisha għall-Ġriżma. Hija teżor għalija għax il-bużnanna tiegħi libsitha fil-gwerra u meta laqtitha bomba, ma mititx, u allura jiena naħseb li għandha xi fortuna. 

Kif ġietni x-xoqqa f'moxtha! Issa nilbisha għall-eżamijiet u żgur ngħaddi! Insomma, issa narak il-ġimgħa d-dieħla u nurihielek, u nħallik tmissha ukoll! Sellili għall-familja kollha.

Dejjem tiegħek,

Rachel. 

Miktuba minn Rachel Zammit (Form 1.3)

----------

86, Triq ix-Xitwa,

Il-Mosta, 

MST 1448

Id-29 ta' Jannar, 2014

Għażiża Elisa,

Kif int? Nispera li tinsab qawwija u sħiħa. F'din l-ittra ħa ngħidlek dwar sorpriża li kelli f'ħajti. 

Kelli għeluq snini u kont ħa nagħlaq tnax-il sena. Kien it-tletin ta' April u kien is-Sibt. Kif taf inti, l-iskola diġà kont qlajt ħafna rigali l-ġurnata ta' qabel u l-ġenituri tawni libsa li tista' tintlibes fir-rebbiegħa jew fis-sajf; par xorts, flokk u kartolina. Iz-zijiet, il-kuġini u n-nanniet flimkien xtrawli mowbajl. Sa fejn kont naf jien, dak kien kollox, imma sirt naf wara, li kien hemm iżjed. Il-ġenituri qaluli li kienu ser joħduni xi mkien speċjali għal għeluq snini. F'xi nofsinhar, wasalna r-restorant favorit tiegħi jismu 'Mamma Mia'. Eżatt kif dħalt, rajt lill-familja kollha tiegħi (iz-zijiet, il-kuġini u n-nanniet kollha) kienet hemm, u bdew ikantawli 'Ferħ u Awguri' flimkien! Tgħidx kemm ħadt gost u apprezzajt dak kollu li kienu organizzawli l-membri tal-familja tiegħi. Wara dan kollu, kilna ikla u wara qsamna l-kejk. Tgħidx kemm kien tajjeb l-ikel, speċjalment il-kejk! Dan kollu kien veru sorpriża għalija, u vera ħadt pjaċir! 

Nispera li ħadt gost taqra din l-ittra. U bilħaqq, grazzi tar-rigal sabiħ li tajtni!

Dejjem tiegħek,

Alicia. 

Miktuba minn Alicia Schembri (Form 1.1)

----------

9, Triq Isouard Xuereb,

Iż-Żurrieq,

ŻRQ 3122

Id-29 ta' Jannar, 2014

Għażiża Anna,

Kif int? Ilni naqra ma niktiblek. Taf xi ġrali? Il-ġenituri ġabuli kelba. Kienet sorpriża li qatt ma stennejtha u kemm fraħt meta rajt il-kelba għax vera kont ilni nixtieq waħda. 

Dan kollu ġara xahar ilu meta kont id-dar tan-nanniet ma' ommi u missieri. Meta ommi u missieri telqu, in-nannu mar magħhom. Kienu qaluli li kienu ħa jmorru jixtru żewġ pastizzi. Sakemm marru, mort naqra ktieb u rajt naqra televiżjoni. Wara siegħa, bdejt ngħid kemm ħa jdumu dawn biex jiġu għax kien qed jaqbadni l-ġuħ. 

Wara ftit, infetaħ il-bieb u bdejt nisma' passi strambi. Ommi bdiet tgħajjatli biex ninżel. Meta nżilt rajt kelba ħelwa, bajda u kannella. Mort ħdejha u bdiet tifraħ bija. In-nannu qalli li l-isem tagħha kien Nelly. Wara morna għand tal-ħanut tal-annimali u xtrajnielha l-ġugarelli għall-klieb u ikel tal-klieb. 

Kemm ħadt pjaċir nilgħab magħha. Jekk tista' erġa' iktibli lura malajr. 

Dejjem tiegħek,

Emily. 

Miktuba minn Emily Farrugia (Form 1.2)

Ittra formali

12, "Le Fayet,"
Triq tas-Salib,
Ħal Għaxaq,
GXQ 2040

Il-15 ta' Jannar, 2014

Skola Santa Dorotea,
Triq l-Imdina,
Ħaż-Żebbuġ,
ŻBĠ 9013

Sor Doreen Cuschieri, 

Nispera li tinsab tajba. Jien qed niktiblek din l-ittra biex nirringrazzjak għal kull ħaġa li tagħmel għall-iskola tagħna. Min jaf kemm tbati biex iżżomm l-iskola fuq saqajha. 

Nisma' ħafna nies li jfaħħru 'l-iskola tagħna u jien naf li kollox bis-saħħa tiegħek isir. L-iktar li jogħġbuni huma l-attivitajiet li tagħmlilna. Dawn ikunu interessanti ħafna. L-iktar waħda li togħġobni dik il-ġurnata fejn jippreżentaw iċ-ċertifikati lil dawk it-tfal li jkunu marru tajjeb fis-sena skolastika ta' qabel. Dakinhar, aħna t-tfal inkunu nistgħu naqsmu t-talenti tagħna mal-ħbieb u mal-ġenituri. Jogħġobni wkoll jum l-isport, l-iktar meta jiġu xi nies minn xi stazzjon tar-radju bħal '8.97 Bay' biex jagħmlulna xi ftit diski. B'hekk il-ġurnata ma tkunx monotona. 

Biex nagħlaq nixtieq nerġa' nirringrazzjak ta' kull ħaġa li tagħmel għall-iskola, napprezza ħafna u nittama li Alla jipprovdilek iktar saħħa biex tibqa' l-kap tal-iskola tagħna. 

Tislijiet,

(Firma) 

Kersty-Jo Zammit. 

----------

30, "Il-Panorama,"

Triq Wenzu Dyer,

Il-Ħamrun,

ĦMR 1234

Is-17 ta' Jannar, 2014

Lill-kap tal-iskola,

Skola Santa Dorotea,

Triq l-Imdina,

Ħaż-Żebbuġ,

ŻBĠ 1908

Għażiża kap tal-iskola,

Qed niktiblek din l-ittra biex nirringrazzjak ta' dawn l-attivitajiet li qed isiru fl-iskola. Kemm jien u kif ukoll sħabi, qed nieħdu gost immorru l-attivitajiet waqt il-brejk. L-aktar attività li nħobb immur hija dik tal-Eko Skola u d-drama għax fihom nitgħallem fuq in-natura u nesprimi lili nnifsi aħjar, fid-drama.

Nirringrazzjak ukoll għal dik il-ġurnata ddedikata lill-isports. Tgħidx kemm inkun ħerqana biex tasal għax nagħmlu ħafna attivitajiet li ma nagħmlux waqt il-lezzjoni tal-edukazzjoni fiżika. F'din l-attività anki l-ġenituri jkunu mistednin jiġu, għalhekk tkun aktar interessanti. Nammirak ukoll għax irnexxilek iddaħħal il-laqgħa tat-talb li jiena darba f'ġimgħa nkun qed nistennieha biex nitgħallem aktar dwar Sidna Ġesù. Attività oħra li nixtieq nibda nattendi hija dik taż-żfin għax jinteressani. L-aħħar ħaġa li xtaqt insemmilek hija dik tal-Klabb tal-Kotba. Attività interessanti ħafna għax barra li tippromwovi l-qari jiġu anki kittieba magħrufa Maltin, biex ikellmuna. 

Ħa nagħlaq din l-ittra billi nirringrazzja lilek u lill-kumplament tal-għalliema għax bis-saħħa tagħkom jien qed ingawdi minn ħafna attivitajiet sbieħ!

Tislijiet,

(Firma) 

Kyra Demanuele. 

----------

10, Triq ix-Xemx, 

Ħal Qormi,

QRM 2480

L-14 ta' Jannar, 2014

Sor D. Cuschieri,

Skola Santa Dorotea,

Triq l-Imdina,

Ħaż-Żebbuġ,

ŻBĠ 3012

Għażiża Sor Doreen Cuschieri,

Nispera li tinsab tajba. Jien jisimni Rouen Virgo u jiena studenta tat-tieni sena fis-sekondarja fl-iskola tiegħek. Ninsab kuntenta li għandi lilek bħala l-kap tal-iskola. Qed niktiblek din l-ittra biex nirringrazzjak ta' dak kollu li tagħmel fl-iskola. 

Nixtieq nibda billi ngħidlek li napprezza ħafna l-fatt li inti tiddedika ħafna ħin għalina. Nixtieq ngħid ukoll grazzi għall-attivitajiet li organizzajt għax l-istudenti jieħdu ħafna gost fl-attivitajiet bħall-ħarġiet, Jum il-Matematika, Jum l-Isport u oħrajn. Nixtiequ wkoll li jkollna aktar attivitajiet bħal dawn għax iktar nieħdu pjaċir. Naf li tagħmel ħafna biex tikkuntentana u li tħobbna ħafna biex tagħmel dan kollu għalina. 

Jiena u sħabi vera nħobbuha din l-iskola u ma jiddispjaċini xejn li nagħmel parti minnha. Irridek tkun taf li x-xogħol li tagħmel huwa apprezzat minn ħafna studenti u allura nerġa' ngħidlek grazzi ta' kollox. 

Tislijiet,

(Firma)

Rouen Virgo. 

Kompetizzjoni - 'Achievement Day' - Żmien

Għeżież studenti tal-ewwel sena, 

Kif tafu, din is-sena t-tema tal-'Achievement Day' ser tkun Żmien. Din is-sena ser issir kompetizzjoni għalikom l-istudenti tal-ewwel sena. 

Xogħolkom huwa li toħolqu mudell 3D tal-bomblu taż-żmien li qrajna dwaru fil-ktieb "Il-Munita tad-Deheb". 

"Ġo nofs l-għar raw oġġett ovali tal-ħadid. Kien kbir b'ħafna tubi ħerġin minnu. Kellu tliet twieqi u kien qiegħed jistrieħ fuq erba' saqajn tal-ħadid qisu banju ta' żmien ir-Reġina Vitorja... L-oġġett ovali kien qisu tal-ħrejjef... Il-bomblu kien mimli buttuni ta' kull kulur."

Dan il-mudell ma jridx ikun ikbar minn 50cm x 50cm. Tistgħu tużaw diversi tipi ta' materjali biex tibnuh, fosthom materjali rreċiklati. Persuna tista' tagħmel dan il-mudell waħedha jew fi grupp. Però dan ma jridx ikun grupp ta' aktar minn ħames persuni. 

Il-mudell għandkom iġġibuh l-iskola mhux aktar tard mis-7 ta' Mejju, 2014. Dawn ser jitħallewh fil-klassi tagħkom sakemm jittieħdu fil-kamra fejn ser jiġu esebiti. 

Dawn il-mudelli ser jiġu esebiti waqt l-'Achievement Day'. Għalhekk il-ġenituri tagħkom ikunu jistgħu jaraw ix-xogħol tagħkom u kif ukoll dak li jkunu għamlu sħabkom. 

Ir-rebbieħa ser jingħataw rigal. Għalhekk inħeġġiġkom biex tipparteċipaw. 

Saħħiet,

Ms Deandra. 

Komponiment fit-tielet persuna

Kien is-Sibt filgħodu. It-tewmin, Nina u Sara kienu mehdijin fil-kċina. Nina kienet qed tiżbarazza l-kċina u Sara kienet qed tipprepara l-ikel. 

Nina semgħet ħoss ħafif ħafna ta' tħaxwix. Qalet lil Sara u waqfu jissemgħu. Issa l-ħoss kien jinstema' aħjar, kien ħoss ta' brix. Mad-daqqa u l-ħin raw ġurdien għaddej fuq il-bank tal-kċina. Bil-fixkla li ħakmitha, Nina waqqgħet il-munzell platti li kienet se tpoġġi fid-dixx woxer u Sara waqqgħet id-dqiq li kienet qed tuża biex tagħmel l-għaġina għat-torti tal-irkotta.

Nina marret tiġri u qabdet l-ixkupa waqt li Sara qabdet taġen. Nina biex tipprova taqbad il-ġurdien bdiet tagħti daqqiet ta' xkupa mal-bank tal-kċina u tajret kull ma kien hemm fuq il-bank. Il-fruttiera mimlija larinġ, tuffieħ u għajn baqar waqgħet fl-art. Kemm kien hemm frott li beda jittrembel mal-bank u mal-art kollha tal-kċina. Imma l-ġurdien laħaq ħarab. Sara dehrilha li rat il-ġurdien tiela' mal-bankijiet tal-kċina u tat daqqa ta' taġen li laqtet mal-vetrina. Kull ma kien hemm fiha waqa' mal-art. Kien hemm ħoss qawwi ħafna ta' ħġieġ jinkiser. Bil-ħasda, il-ġurdien tela' fuq il-majkrowejv fejn kien hemm kollezzjoni ta' buqari tat-te. Nina u Sara marru jaqbżu fuq il-ġurdien meta fl-istess waqt ħabtu f'xulxin u waqqgħu l-buqari kollha. Reġgħu semgħu t-tħaxwix. Ħarsu 'l fuq u lemħu l-ġurdien jaħrab għal ġol-ġnien. 

Dak il-ħin ħarsu madwarhom u raw id-diżastru li għamlu. Mhux biss ma qabdux il-ġurdien imma ġabu l-kċina fi stat ta' ħerba. 

Nicole Riolo (Form 1.1)

----------

Sa minn mindu kienet żgħira, Klarissa, tifla ta' sitt snin kienet tħobb toqgħod tgħin lil ommha fil-kċina. Ommha, Marija, kienet tieħu gost ħafna tara lil bintha daqshekk imħeġġa biex tgħinha u għalhekk qatt ma qaltilha, "Le."

Fil-kċina, Klarissa u ommha kienu jagħmlu ħafna tisjir u ħlewwiet, fosthom; torti, kejkijiet, pasti u kif ukoll l-ikla tal-ġurnata. Klarissa kienet tieħu l-iktar gost meta jkunu qegħdin jippreparaw l-għaġin biz-zalza u kienet tieħu gost tmur iġġib l-ingredjenti minn ġol-ixkafef u ttihom lil ommha. Ommha, Marija, kienet toqgħod b'seba' għajnejn għat-tfal biex ma tweġġagħhiex. Waqt li tkun qed tgħalli l-għaġin, Klarissa kienet titla' bilqiegħda fuq il-bank għoli ta' ħdejn il-forn. Darba waħda, waqt li omm Klarissa kienet qed tgħalli, daqq it-telefon. 

Dak il-ħin stess beda jagħli l-misħun u l-ħoss ta' tbaqbiq ġibed l-attenzjoni ta' Klarissa, li f'dak il-mument ħarset ġol-borma. F'minuta, Klarissa tilfet il-bilanċ u biex iżżomm, bla ma taf kif, daħlet idha ġol-borma. Xħin ħasset il-ħruq, hi bdiet tibki u ommha xħin semgħet il-biki, telqet it-telefon u ġriet lejn il-kċina. Ħadet qatgħa kbira u wiċċha sar abjad karti, kif rat lit-tifla mismuta. Mill-ewwel ġriet lejn l-isptar. 

Din l-esperjenza għaddie iżda idejha baqgħatilha b'marka fuqha. It-tisjir sar l-aktar xogħol li jġibilhom memorji koroh. 

Emma Bondin (Form 1.2)

----------

Diksie u Piksie kienu żewġt iklieb kbar ħafna. It-tnejn kienu mqarbin ħafna b'pil abjad u iswed. Diksie kien 'pitbull', filwaqt li Piksie kien 'parolee'. Kienu jinżammu fi ġnien ġo dar kbira ta' wieħed jismu Aaron. Aaron dejjem kien isakkru l-bieb tad-dar għax kien jaf li l-klieb kienu jafu jiftħuh. Iżda darba nesa, ħareġ jixtri u wara xi għaxar minuti bdiet tqattar ix-xita u bħas-soltu l-klieb marru jipprovaw jiftħu l-bieb u sabuh miftuħ. 

Diksie u Piksie malajr daħlu ġewwa. Qagħdu jħarsu ftit madwarhom u poġġew mal-art. Bilkemm laħqet għaddiet minuti li ma xammewx il-laħam li kien sajjar Aaron għalih għal filgħaxija. 

Il-klieb iġġennu, fetħu l-friġġ u f'kemm ili ngħidlek il-kċina ġabuha ta' taħt fuq u għamlu ħerba sħiħa. Diksie u Piksie faqgħu żewġt ifliexken tal-ilma u billi saqajhom kienu mimlijin tajn u ilma, bdew jimmarkaw bil-passi kull fejn kienu qed jgħaddu. Qellbu l-barmil tal-iskart u ħarġu l-affarijiet kollha li kien hemm ġo fih. Il-kċina issa kellha riħa tinten pesti.

Wara li għaddiet xi siegħa, wasal Aaron u xħin daħal fil-kċina ħa qatgħa kbira. Sar abjad karti bix-xena li ra quddiem wiċċu... Qarras wiċċu u kemmex xofftejh. Aaron kien iridha dejjem warda, kollox perfett, imbagħad imur lura d-dar u jsib hekk!

Meta ra l-passi, malajr induna min kien qajjem dan il-ġenn u bħal iblah, beda jgħajjat mal-klieb u jagħmel qorti. Fl-istess ħin ma kienx it-tort tiegħu li nqala' dan il-ġenn, allavolja saret bit-traskuraġni tiegħu stess. Ma tantx dam jaħsibha u mal-ħaġra t-tajn beda jiżbarazza kollox. 

Il-kċina ġietu biz-zalza għax kellu jixtru forn, friġġ u mejda mill-ġdid għax sabhom mibruxin u mkissrin. Sakemm żbarazza kollox sar ilma imma meta lesta, kollox kien pinna u Aaron ħa r-ruħ. Minn dakinhar 'l hawn, qatt u qatt ma reġa' ħalla l-bieb miftuħ, u lil Diksie u Piksie dejjem ħallhielhom x'jieklu u x'jixorbu. 

Elisa Micallef Peplow (Form 1.3)